އިންޑިއާގައި ސްކޫލުތައް ހުޅުވިތާ ހަފްތާތަކެއް ފަހުން، އުމުރުން 12 އަހަރާއި 14 އަހަރާ ދެމެދުގެ ކުދިންނަށް ކޮވިޑް ވެކްސިން ދޭން ފަށައިފި އެވެ.
އެ ކުދިންނަށް ޖަހާނީ އިންޑިއާގައި އުފެއްދި ތިން ވަނަ ކޮވިޑް ވެކްސިން. ކޯބެވެކްސް އެވެ.
ބޮޑު ވަޒީރު ނަރެންދް މޯދީ ކުރެއްވި ޓްވީޓެއްގައި ވިދާޅުވީ މިއީ "ރައްޔިތުންނަށް ވެކްސިން ދިނުމަށް ކުރާ މަސައްކަތުގައި މުހިއްމު ދުވަހެއް" ކަމަށެވެ.
އިންޑިއާގައި ކޮވިޑް ވެކްސިން ޕްރޮގްރާމް ފެށީ ޖެނުއަރީ 2021 ގަ އެވެ. އޭގެ ފަހުން ޖުމްލަ 1.8 ބިލިއަން ޑޯޒް ވަނީ ޖަހާފަ އެވެ.
އާބާދީގެ 18 އަހަރުން މަތީގެ މީހުންގެ 90 ޕަސެންޓު ދެ ޑޯޒް ޖަހާފައިވާ އިރު، 99 ޕަސެންޓް މީހުން ވަނީ އެއް ޑޯޒް ޖަހާފަ އެވެ.
ފްރަންޓްލައިން މުވައްޒަފުންނާއި ސިއްހީ މަސައްކަތްތެރިންނާއި އުމުރުން 60 އަހަރުން މަތީގެ މީހުންނަށް ބޫސްޓާ ޑޯޒް ދޭން ފެށީ ޖެނުއަރީ ގަ އެވެ.
އޭގެ ފަހުން 10 މިލިއަން ސިއްހީ މަސައްކަތްތެރިން ފްރަންޓްލައިން މުވައްޒަފުން އަދި އުމުރުން 60 އަހަރުން މަތީގެ 10 މިލިއަން މީހުން ވަނީ ބޫސްޓާ ޑޯޒް ޖަހާފަ އެވެ.
އުމުރުން 15 އަހަރާއި 18 އަހަރާ ދެމެދުގެ ކުދިންނަށް ވެކްސިން ދޭން ފެށީ ވެސް ޖެނުއަރީ މަހު އެވެ. މިހާރު އެ އުމުރުން 75 ޕަސެންޓް ކުދިން ވަނީ ފުރަތަމަ ޑޯޒް ޖަހާފަ އެވެ.
މިހާތަނަށް އިންޑިއާގައި 43 މިލިއަން ކޮވިޑް ކޭސް ރިކޯޑްކޮށްފައިވެ އެވެ. އަދި އެ ބަލީގައި އިންޑިއާއިން މަރުވެފައި ވަނީ 515،000 މީހުންނެވެ.
މި ވަގުތު އިންޑިއާގައި ކޮންމެ ދުވަހަކު ވެސް 3000 ކޭސް ރިކޯޑް ކުރެ އެވެ. އޮމިކްރޯން ވޭރިއެންޓްގެ ސަބަބުން މިދިޔަ ޖެނުއަރީ މަހު ވަރަށް ބޮޑަށް ކޭށްތައް އިތުރުވެ، ބަލީގެ ތިން ވަނަ ރާޅެއް ކުރިމަތިވި އެވެ.
