ލަންޑަން، އިނގިރޭސިވިލާތް (މާޗް 15) - ރަޝިއާގެ ސިފައިން ޔޫކްރެއިނަށް އަރައި ފަށާފައިވާ ހަނގުރާމަ އާޢި ދުނިޔޭގެ ތެލުގެ ސަޕްލައިއާ ގުޅޭ މުހިއްމު މަޝްވަރާތަކަށް އިނގިރޭސި ބޮޑު ވަޒީރު ބޮރިސް ޖޯންސަން ސައުދީ އަރަބިއްޔާއަށް ވަޑައިގަންނަވަން ހަމަޖެހިއްޖެ އެވެ.
ރިޕޯޓުތައް ބުނާ ގޮތުން މި ހަފްތާގައި ޖޯންސަން އާއި ސައުދީ ވަލީ އަހުދު އަމީރު މުހައްމަދު ބިން ސަލްމާން ބައްދަލުކުރައްވާނެ އެވެ. ޖޯންސަން ބޭނުންވެވަޑައިގަންނަވަނީ ސައުދީ އަރަބިއްޔާގެ ތެލުގެ ސަޕްލައި އިތުރު ކުރެވޭނެ ގޮތެއް ހޯދުމަށެވެ.
ޖޯންސަން ވިދާޅުވީ ހަކަތައިގެ ވަސީލަތްތައް ބޭނުންކޮށްގެން ރަޝިއާއިން ހުޅަނގުގެ ގައުމުތަކަށް ބިރު ދެއްކުން ހުއްޓުވުމަށް ގައުމުތަކެއް ހިމެނޭ މުޅިން އާ ކޯލިޝަނެއް ބޭނުންވާ ކަމަށެވެ.
"ހަކަތަ އުފައްދާ އެހެން ގައުމުތަކާ އެކު ވާހަކަ ދައްކައިގެން، ރަޝިއާގެ ހަތަކައިގެ ވަސީލަތްތަކެއް ބަރޯސާ ނުވެ ކުރިއަށް ދެވޭތޯ ބަލަން ޖެހޭ."
ޖޯންސަންގެ ތަރުޖަމާނު ވިދާޅުވީ ސައުދީ ވަލީ އަހުދާ އެކު އޮންނަ ބައްދަލުވުމުގައި ސައުދީ އަރަބިއްޔާގެ އިންސާނީ ހައްގުތަކުގެ ހާލަތާ ގުޅޭ ކަންބޮޑުވުންތައް ވެސް ހުށަހަޅާނެ ކަމަށެވެ.
އޭގެ އިތުރުން ރަޝިއާގެ ރައީސް ލެޑިމިއަ ޕުޓިންގެ އަމަލުތައް ކުށްވެރި ކުރައްވައި، ދަތި ކުރުމުގެ ފިޔަވަޅުތައް ވަރުގަދަ ކުރުމަށް އެދޭނެ ކަމަށް ވެސް ތަރުޖަމާނު ފާހަގަކުރެއްވި އެވެ.
ރަޝިއާގެ ތެލުގެ އިމްޕޯޓްތައް އެމެރިކާއިން މަނާކޮށްފައިވާ އިރު، އިނގިރޭސިވިލާތުން ވެސް ބޭނުން ވަނީ 2022 ވަނަ އަހަރު ނިމުމުގެ ކުރިން ރަޝިއާގެ ތެލާއި ގޭހުގެ އިމްޕޯޓްތައް ހުއްޓާލުމަށެވެ.
އިނގިރޭސިވިލާތަށް ބޭނުންވާ ތެލުގެ 8.0 ޕަސެންޓް ގެންނަނީ ރަޝިއާއިންނެވެ. ނަމަވެސް އެއާ ހިލާފަށް ޔޫރަޕްގެ އެހެން ގައުމުތައް ރަޝިއާގެ ތެލާއި ގޭހަށް ވަރަށް ބޮޑަށް ބަރޯސާވެ އެވެ.
