ބުރުގާ އެޅުމަކީ އިސްލާމްދީނުގެ އަސާސެއް ނޫން ކަމަށް އިންޑިއާގެ ކަރްނާޓަކާ ސްޓޭޓުގެ ހައި ކޯޓުން ކަނޑައަޅައިފި އެވެ.
އެގޮތަށް ކަނޑައެޅީ އެ ސްޓޭޓުގެ ސްކޫލުތަކާއި ކޮލެޖްތަކަށްދާ ދަރިވަރުން ބުރުގާ އެޅުން މަނާކުރި މައްސަލަ ހޫނުވެފައި ވަނިކޮށެވެ.
މައްސަލަ ހޫނުވެ މިދިޔަ ޖެނުއަރީ މަހު މުޒާހަރާ ކުރަން ފެށި އެވެ. އޭގެ ސަބަބުން ގިނަ ދުވަސްތަކެއް ވަންދެން ސްކޫލުތަކާއި ކޮލެޖުތައް ބަންދު ކުރަން ވެސް ޖެހުނެވެ.
ހޯމަ ދުވަހު ކޯޓުން ގޮތެއް ކަނޑައެޅުމާ ދިމާކޮށް، ކަރްނާޓަކާގެ ސަރުކާރުން އެއްވުންތައް މަނާކޮށް، ބައެއް ހިސާބުތަކުގައި ތައުލީމު ފޯރުކޮށްދޭ މަރުކަޒުތައް ބަންދުކުރި އެވެ.
މައްސަލަ ހައި ކޯޓާ ހަމައަށް ފޯރީ، ބުރުގާ އެޅުމުގެ ހައްގު އިންޑިއާގެ ގާނޫނު އަސާސީން ލިބިދޭ ކަމަށް ބުނެ، މުސްލިމް އަންހެނުންތަކެއް ޕެޓިޝަން ހުށަހެޅުމުންނެވެ.
ނަމަވެސް ކޯޓުން ޕެޓިޝަންތައް ބަލައި ނުގަނެ، ދަރިވަރުންގެ ޔުނިފޯމް ހުންނަންވީ ގޮތް ކަނޑައެޅުމުގެ ބާރު ކަރްނާޓަކާ ސަރުކާރަށް ލިބިދޭ ކަމަށް ބުންޏެވެ.
ހައި ކޯޓުން ބުރުގާ އެޅުމާ ދެކޮޅަށް ނިންމުމުން، އެ މައްސަލަ ސުޕްރީމް ކޯޓުގައި އިސްތިއުނާފް ކުރާނެ ކަމަށް ބެލެވެ އެވެ.
މައްސަލަ އެންމެ ފުރަތަމަ ބެއްލެވި ފަނޑިޔާރު ވަނީ މިއީ ނާޒުކު މައްސަލައަކަށް ވާތީ ފަނޑިޔާރުންގެ ބެންޗަކުން ކުރިއަށް ގެންދިޔުމަށް ފެބްރުއަރީ ނުވަ ވަނަ ދުވަހު ހަވާލުކޮށްފަ އެވެ.
އެ ބެންޗުން ވަނީ މައްސަލަ ކުރިއަށް ދިޔަ މުއްދަތުގައި ދަރިވަރުންނަށް ބުރުގާ ހިމެނޭހެން، އެއްވެސް ދީނީ ހެދުމެއް ނުލެވޭނެ ކަމަށް ވެސް އިއުލާންކޮށްފަ އެވެ. އެކަމާ ގިނަ ދަރިވަރުންތަކެއް ހިތްހަމަނުޖެހި، ކްލާހާއި އިމްތިހާންތަކަށް ނުގޮސް މަޑުކުރި އެވެ.
ބުރުގާ މައްސަލައަކީ އިންޑިއާ މައިނޯރިޓީންގެ ތެރޭގައި ހިމެނޭ މުސްލިމުންނާ ދެކޮޅަށް ބޮޑު ވަޒީރު ނަރެންދްރަ މޯދީގެ ހިންދޫ ސަރުކާރުން ހިންގާ އިތުރު ޖަރީމާއެއްގެ ގޮތުގައި ބައެއް ފަރާތްތަކުން ސިފަކުރެ އެވެ.
މޯދީ ސަރުކާރުގެ މިނިސްޓަރަކު ވަނީ ހައި ކޯޓުގެ ނިންމުމަށް މަރުހަބާ ކިޔައި، އެއާ އެއް ގޮތަށް އަމަލު ކުރުމަށް ވެސް ގޮވާލައްވާފަ އެވެ.
ބުރުގާ އެޅުން މަނާ ކުރުމުން މުޒާހަރާ ކުރަނީ. -- ފޮޓޯ: އުމޭޝް މަރްޕައްލީ
މައްސަލަ ފެށުނީ ކަރްނާޓަކާގެ އުދުޕީ ޑިސްޓްރިކްޓުގައި ސަރުކާރުން ހިންގާ ކޮލެޖެއްގެ ފުރާވަރު އުމުރުގެ ހަ ދަރިވަރުން ކްލާސް ގަޑީގައި ބުރުގާ ނަގަން އެންގުމުންނެވެ.
ކޮލެޖުން ބުނީ ކެމްޕަހުގައި އުޅޭ އިރު ބުރުގާ އެޅުމުގެ ހުއްދަ އޮތް ނަމަވެސް، ކްލާސް ތެރޭގައި ބުރުގާ ނޭޅޭނެ ކަމަށެވެ. ނަމަވެސް އެ ކުދިން ވަނީ ހިތްހަމަނުޖެހި، ކޮލެޖު ބޭރުގައި މުޒާހަރާކޮށްފަ އެވެ.
އުދުޕީ ޑިސްޓްރިކްޓަކީ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) ގެ މައި މަރުކަޒެކެވެ. އެހެންކަމުން، އެ ތަނުގައި ހިންދޫންގެ ބާރު ވަރަށް ގަދަ އެވެ.
އެ ކޮލެޖުގެ ދަރިވަރުން ފެށި މުޒާހަރާ، ކަރްނާޓަކާ ސްޓޭޓުގެ އެހެން ކޮލެޖުތަކުގައި ވެސް ފެތުރުނެވެ. ކަރްނާޓަކާ ސްޓޭޓުގެ ސަރުކާރު ވެސް ހިންގަނީ ބީޖޭޕީންނެވެ.
މުސްލިމް ދަރިވަރުންގެ މުޒާހަރާއަށް ރައްދުގައި ހިންދޫ ދަރިވަރުން އެ މީހުންގެ ދީނުގައި ބޭނުން ކުރާ ކުލައިގެ ޝޯލް އަޅައިގެން ކޮލެޖަށް ދާން ފެށި އެވެ.
