ސިވިލް ކޯޓުގެ ގާޒީ ކަމަށް އަލަށް އައްޔަންކުރި ޒުލައިހާ ޝީޒާ އަދި އަހުމަދު ނިމާލް ޖުނައިދު، ފަނޑިޔާރުކަމުގެ ހުވާކުރުމާ އެކު ސުޕްރީމް ކޯޓުން އެ ދެ ބޭފުޅުންނަށް ނަސޭހަތް ދެއްވައިފި އެވެ.
ޖުޑީޝަލް އެޑްމިނިސްޓްރޭޝަންގެ މީޓިން ރޫމްގައި މިއަދު ބޭއްވި ރަސްމިއްޔާތުގައި އެ ދެ ގާޒީންނަށް ހުވާ ލައިދެއްވީ ހައިކޯޓުގެ އިސްފަނޑިޔާރު ހާތިފް ހިލްމީ އެވެ. މަގާމުގެ ފަތްކޮޅު ހަވާލުކުރެއްވީ ޖޭއެސްސީގެ ރައީސް ހިސާން ހުސައިނެވެ. އެ ޖަލްސާގައި ބަންޑާރަ ނައިބާއި، އުއްތަމަ ފަނޑިޔާރު ވެސް ބައިވެރިވަޑައިގެންނެވި އެވެ.
އެއަށްފަހު ސުޕްރީމް ކޯޓުގެ ދެ ފަނޑިޔާރަކު ވާހަކަދެއްކެވި އެވެ. ފަނޑިޔާރު ޑރ. މުހައްމަދު އިބްރާހިމް ސިފަކުރެއްވި ގޮތުގައި ފަނޑިޔާރުކަމުގެ މަސައްކަތަކީ ވަރަށް އެކަނިވެރި ޒިންމާއެކެވެ. އެއީ އެ މަގާމާ ހަވާލުވުމަށްފަހު، އާންމު އިޖްތިމާއީ ގިނަ ކަންކަން މަނާވެގެން ދާތީ އެވެ.
"ފަނޑިޔާރަކަށް ވުމަށްފަހު އަލަށް ރައްޓިހިންނެއް ނުހޯދޭނެ، ހަދިޔާއެއް ބަލައި ނުގަނެވޭނެ، ވިޔަފާރީއެއް ނުކުރެވޭނެ، މީހަކު އަތުން ލޯނެއް ނުނެގޭނެ،" ފަނޑިޔާރަކަށްވާ ހިސާބުން އާންމު އިޖްތިމާއީ ގުޅުންތަކުގެ ތެރެއިން ގިނަ ކަންކަން އެއްކޮށް މަނާވެގެން ދާނެކަން ފަނޑިޔާރު ފާހަގަކުރެއްވި އެވެ.
titledesc
ދެން ވާހަކަ ދެއްކެވި ސުޕްރީމް ކޯޓުން ޖޭއެސްސީއަށް ކަނޑައަޅާފައިވާ މެމްބަރު އައިޝާ ޝުޖޫން އެވެ. އޭނާ ވިދާޅުވި ގޮތުގައި ފަނޑިޔާރު ކަމަކީ ބުރަ އަދި ބޮޑު މަސައްކަތެކެވެ. އަދި އެއީ އަމިއްލަ މަންފާއަށާއި ކުރިއެރުމަށް އެދިގެން އަދާކުރެވޭނެ ޒިންމާއެއް ނޫންކަން ފާހަގަކުރެއްވި އެވެ.
"ފަނޑިޔާރު ކަމަކީ ކަންކުރެވޭ ގޮތުން މީހުންގެ އިހްތިރާމާއި އިތުބާރު ލިބޭ، އަދި ހިންހަމަ ނުޖެހުމާއި ބަދުބަސްވެސް ރައްދުވާ ކަމެއް،" މަސައްކަތުގައި ފަރުވާތެރިވުމަށް ނަސޭހަތްތެރިވަމުން ޝުޖޫން ވިދާޅުވި އެވެ.
އޭގެ އިތުރުން ފަނޑިޔާރަކަށްވާ ހިސާބުން އެމީހެއްގެ ވިސްނުމާއި އަމަލު ވަކި ގޮތަކަށް ބައްޓަންކުރަން ޖެހޭނެކަން ފާހަގަކުރެއްވި އެވެ. އެގޮތުން ވަކީލެއްގެ ގޮތުގައި މަސައްކަތްކުރުމާއި، ފަނޑިޔާރަކަށްވާ ހިސާބުން މަސައްކަތްކުރަން ޖެހިވަޑައިގަންނަވާ ގޮތް ވަރަށް ތަފާތުވާނެ ކަމަށް ވިދާޅުވި އެވެ. ނަމަވެސް, ގިނަ ފަހަރަށް މަގާމާ ހަވާލުވާއިރު އެކަންކަމަށް އެއްވެސް ބޭފުޅަކު ތައްޔާރު ނުވާކަންވެސް ފާހަކުރެއްވި އެވެ.
ނަމަވެސް ނިޒާމުގެ ވަށައިގެންވާ ކަންކަމަށާއި، މަގާމުގެ ހުރިހާ މަސްއޫލިއްޔަތަށް ހޭނި، "ޖަޖް މޫޑް އޮން" ވާން ދުވަސްކޮޅެއް ނެގުމަކީ އެކަށީގެންވާ ކަމެއް ކަމަށް ސުޖޫން ވިދާޅުވި އެވެ. އޭނާ ވިދާޅުވި ގޮތުގައި ފަނޑިޔާރެއްގެ އެންމެ ބޮޑު އެއް މަސްއޫލިއްޔަތަކީ ކޯޓުތަކަކީ މީހުން އިތުބާރު ކުރާ ތަނަކަށް ހެދުމެވެ.
އަލަށް އައްޔަނުކުރި ދެ ގާޒީންގެ ތެރެއިން ޒުލައިހާ ޝީޒާ އަކީ މެލޭޝިއާގެ ހެލްޕު ޔުނިވާސިޓީން ބެޗެލާ އޮފް ލޯ (އޮނާސް) ހާސިލުކުރައްވާފައި ހުންނެވި ބޭފުޅެކެވެ. އަދި އޭނާ ވަނީ ޔުނިވާސިޓީ އޮފް ލަންޑަންގެ ބާކްބެކް ކޮލެޖުން މާސްޓާސް އޮފް ލޯ އިން ކޮންސްޓިޓިއުޝަނަލް ޕޮލިޓިކްސް، ލޯ އެންޑް ތިއަރީ ވެސް ހާސިލުކުރައްވާފަ އެވެ.
އޭގެ އިތުރުން ވެސް ޒުލައިހާ ވަނީ ބަންޑާރަ ނައިބުގެ އޮފީހުގައި ސްޓޭޓް ކައުންސެލާ، ސީނިއާ ސްޓޭޓް އެޓާނީ އަދި ސްޓޭޓް އެޓާނީގެ މަގާމުގައި ތިން އަހަރަށްވުރެ ގިނަ ދުވަހު ހިދުމަތް ކުރައްވާފަ އެވެ.
ސިވިލް ކޯޓަށް ދެން އައްޔަނުކުރި ފަނޑިޔާރު އަހުމަދު ނިމާލްއަކީ ވިލާ ކޮލެޖުގެ ބެޗެލާ އިން ޝަރިއާ އެންޑް ލޯ (އޮނާސް) ހާސިލު ކުރައްވާފައިވާ ބޭފުޅެކެވެ. ނިމާލް ވަނީ މީގެ ކުރިން ފަރްހާން ޒަމީލް އެންޑް ނިމާލް ލޯ ފާމްގެ މެނޭޖިން ޕާޓްނަރުގެ ގޮތުގައި އެއް އަހަރަށްވުރެ ދިގު މުއްދަތަކަށް މަސައްކަތް ކުރައްވާފަ އެވެ.
