ބެއިޖިން، ޗައިނާ (މާޗް 13) - ފެބްރުއަރީ 2020 ވަނަ އަހަރަށް ފަހު ޗައިނާގެ ކޮވިޑް ކޭސްތައް ރެކޯޑް އަދަދަކަށް މަތިވެއްޖެ އެވެ.
ނޭޝަނަލް ހެލްތު ކޮމިޝަނުން ބުނީ އާދީއްތަ ދުވަހު 3،393 ކޭސް ރިޕޯޓުކޮށްފައިވާ ކަމަށެވެ. އެއީ ހޮނިހިރު ދުވަހުގެ ކޭސްތަކާ އަޅާ ބަލާއިރު ދެ ގުނަ މަތި އަދަދެކެވެ.
ކޮވިޑް ފަތުރާ ވައިރަސް އެންމެ ފުރަތަމަ ފެނުނު ޗައިނާއިން ގެންގުޅެނީ "ޒީރޯ ކޮވިޑް" ގެ ހަރުކަށި ސިޔާސަތެކެވެ. އޭގެ ދަށުން ސިޓީތައް ލޮކްޑައުންކޮށް، ދަތުރު ކުރުމުގައި ހުރަސްތައް އަޅައި، އެއް ފަހަރާ ގިނަ އަދަދެއްގެ މީހުން ޓެސްޓު ކުރަމުންދެ އެވެ.
ޗައިނާގައި މިހާރު ބަލި ފެތުރެމުން ދަނީ ހަލުވިކަމާ އެކު ދައުރުވާ އޮމިކްރޯން ވޭރިއެންޓްގެ ސަބަބުންނެވެ. ގިނަ ފިޔަވަޅުތައް ތަންފީޒު ކުރި ނަމަވެސް، ބަލި ކޮންޓްރޯލް ނުކުރެވި ގިނަ ދުވަސްތަކެއް ދަނީ ވަމުންނެވެ.
ޖިލިންގެ ރައްޔިތުން މިހާރު ހަ ފަހަރަށް ޓެސްޓުކޮށްފައިވާ އިރު، އާދީއްތަ ދުވަހު އެ ސިޓީއިން އޮމިކްރޯންއާ ގުޅުން ހުރި 500 އަށް ވުރެ ގިނަ ކޭސް ރިޕޯޓުކުރި އެވެ.
އެ ސިޓީ ކައިރީގައި އޮންނަ ޗަންގްޗުން ސިޓީ މިދިޔަ ހުކުރު ދުވަހު ވަނީ ލޮކްޑައުންކޮށްފަ އެވެ. އެއީ ނުވަ މިލިއަން މީހުންގެ އާބާދީއެއް އޮންނަ ސިޓީއެކެވެ.
ޗައިނާގެ ނޫސްތަކުން ބުނާ ގޮތުގައި ޖިލިން މޭޔަރާއި ޗަންގްޗުން ހެލްތު ކޮމިޝަނުގެ ވެރިޔާ ވަނީ ހޮނިހިރު ދުވަހު މަގާމުން ވަކިކޮށްފަ އެވެ.
ޖިލިން ޕްރޮވިންސްގައި އޮންނަ ކުޑަ ދެ ސިޓީކަމުގައިވާ، ސިޕިންގް އާއި ޑުންހުއާ ވެސް ވަނީ މިދިޔަ ބުރާސްފަތި ދުވަހު ލޮކްޑައުންކޮށްފަ އެވެ.
ރަޝިއާ އާއި އުތުރު ކޮރެއާއާ ގުޅޭ ބޯޑަރުގައި އޮންނަ ހުންޗުން ސިޓީ ލޮކްޑައުން ކުރީ މާޗް އެއް ވަނަ ދުވަހު އެވެ.
ޝިންހުއާ ނިއުސް އެޖެންސީން ބުނީ އެ ސިޓީގެ ކޮވިޑް ބަލި މީހުންނަށް ފަރުވާ ދިނުމަށް ތިން ވަގުތީ ހޮސްޕިޓަލް ހުޅުވާފައިވާ ކަމަށެވެ.
