އަންނަ ބުރާސްފަތި ދުވަހު މާލޭގައި ބާއްވާ "މޯލްޑިވްސް ސްޕޯޓްސް އެވޯޑްސް 2022" ހަފްލާގައި ދުނިޔޭގެ ފުޓްބޯޅަ އަށް ހާއްސަ އިޓަލީގެ ނޫސްވެރިޔާ، ފަބްރީޒިއޯ ރޮމާނޯ ބައިވެރިވާގޮތަށް ހަމަޖެހިއްޖެ އެވެ.
ޔޫތު މިނިސްޓަރު އަހުމަދު މަހުލޫފް މިރޭ ވަނީ ރާއްޖޭގައި ފުރަތަމަ ފަހަރަށް ހުރިހާ ކުޅިވަރެއް ޝާމިލުވެގެން ބޭއްވޭ ފުރަތަމަ ކުޅިވަރު އެވޯޑް ހަފްލާގައި އިޓަލީ އަށް އުފަން ފަބްރީޒިއޯ ރޮމާނޯ ބައިވެރިވާނެ ކަމަށް ނިންމައިފަ އެވެ. މިނިސްޓަރުގެ ސޯޝަލް މީޑިއާގައި ހިއްސާކުރެއްވި ޕޯސްޓަށް ފަބްރީޒިއޯ ރޮމާނޯ ބުނީ ވަރަށް އަވަހަށް ރާއްޖެ އަންނާނެ ކަމަށެެވެ.
އިޓަލީގެ ފުޓްބޯޅައިގެ މަގުބޫލު ސިޓީއެއް ކަމަށްވާ މިލާނަށް އުފަން ފަބްރީޒިއޯ އަކީ ދުނިޔޭގެ ފުޓްބޯޅައިގެ ހަބަރުތަކަށް ބަލާއިރު، އެންމެ އިތުބާރު ހިފޭ މަސްދަރެެވެ. އަދި ބައެއް މީޑިއާތަކުން ހަބަރެއްގެ ސައްހަކަން ކަށަވަރުކުރަން ބޭނުންކުރާ ވަސީލަތަކީ ފަބްރީޒިއޯ ރޮމާނޯގެ ސޯޝަލް މީޑިއާ ޕްލެޓްފޯމެވެ. ދުނިޔޭގެ ފުޓްބޯޅައިގެ ޓްރާންސްފާ ހަބަރުތައް ކަވަރުކުރުމުގައި ފަބްރީޒިއޯ ރޮމާނޯ އެތައް އިރެއް ހޭދަކުރާއިރު، އެކި ގައުމުތަކުގެ މީޑިއާތަކުގައި އޭނާ އަންނަނީ ޓޯކްޝޯތަކުގައި ބައިވެރިވަމުންނެވެ. އަދި ކްލަބްތަކުގެ ރަސްމީ މީޑިއާ ޗެނަލްތަކުގައި ވެސް ފަބްރީޒިއޯ ރޮމާނޯ ބައިވެރިވާ ޝޯތައް ހިނގަ އެވެ.
ފަބްރީޒިއޯ ރޮމާނޯ، 29، ރަސްމީކޮށް މަސައްކަތްކުރަމުން އަންނަނީ ސްކައިސްޕޯޓްސް އިޓާލިއާގަ އެވެ.
ކުޅިވަރު އެކުވެނި އެއް ނަމްބަރު ދަނޑު، މާލެ ސިންތެޓިކް ޓްރެކްގައި ބާއްވާ އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ކުޅިވަރު ސަހުސިއްޔަތުން ބައިވެރިވާނެ އެވެ. މީގެ އިތުރުން އެކި ގައުމުތަކުގެ ކުޅިވަރާ ބެހޭ ވުޒާރާތަކުގެ އިސްވެރިން ވެސް ބައިވެރިވެވަޑައިގަންނަވާނެ އެވެ.
މިނިސްޓަރު މަހުލޫފް މީގެ ކުރިން އިއުލާނުކުރައްވާފައިވާ ގޮތުން، ސްރީ ލަންކާގެ ކްރިކެޓް ލެޖެންޑް ސަނަތު ޖަޔަސޫރިޔާ، ސްރީ ލަންކާގެ ކުރީގެ ނެޓްބޯޅަ ކުޅުންތެރިޔާ ތަރްޖިނީ، ޕޫލް ބިލިއާޑްގެ ދުނިޔޭގެ ޗެމްޕިއަނެއް އޮސްޓްރިއާގެ އަލްބިން އޮސްކަން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް، ވޮލީ ޗެމްޕިއަން ގިލްބާޓޯ ގޮޑޯއި (ގީބާ)، ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ކްރޮއޭޝިއާގެ ޓީޓީ ލެޖެންޑް ޒޯރާން ޕްރިމޯރަކް، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މީގެ އިތުރުން އެވޯޑް ހަފްލާގައި ބައިވެރިވެވަޑައި ގެންނެވުމަށް ސްރީ ލަންކާގެ ކުޅިވަރާބެހޭ ވަޒީރު ނަމާލް ރާޖަޕަކްސަ އާއި ބަންގްލަދޭޝްގެ ކުޅިވަރު މިނިސްޓަރު ޒާހިދު އަހްސަން ރަސަލް އަދި ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ ރާއްޖެ ވަޑައިގަންނަވާނެ އެވެ.
