އިންޑިއާއަށް އޮޅިގެން މިދިޔަ ބުދަ ދުވަހު ޕާކިސްތާނަށް މިސައިލެއް ފޮނުވުނީ "ޓެކްނިކަލް މައްސަލައަކާ" ހެދި ކަމަށް އިންޑިއާ ސަރުކާރުން ބުނެފި އެވެ.
އިންޑިއާ ސަރުކާރުން ބުނީ އެ ހާދިސާއާ މެދު "ފުންކޮށް ހިތާމަ ކުރާ" ކަމަށާއި އެއްވެސް މީހަކު މަރުވެފައި ނުވާތީ ހިތްހަމަޖެހޭ ކަމަށެވެ.
ޕާކިސްތާނުގެ ސިފައިން ބުނީ "ބާރު ދުވެލީގައި ދަތުރު ކުރި އެއްޗެއް" އިރުމަތީ މިއާން ޗަންނޫ ސިޓީ ކައިރިއަށް ވެއްޓިފައިވާ ކަމަށާއި އޭގެ ސަބަބުން ފްލައިޓްތައް ނުރައްކަލަށް ހުށަހެޅުނު ކަމަށެވެ.
އިންޑިއާ އާއި ޕާކިސްތާނުގައި ވެސް ނިޔުކްލިއާ ހަތިޔާރު ހުރެ އެވެ.
"އިންޑިއާ ސަރުކާރުން މިކަން ވަރަށް ސީރިއަސްކޮށް ނަގައި، އެންމެ މަތީ ފަންތީގެ ތަހުގީގެއް ހިންގަން ވަނީ އަމުރުކޮށްފައި،" އިންޑިއާގެ ޑިފެންސް މިނިސްޓްރީގެ ބަޔާނެއްގައި ބުންޏެވެ.
ޕާކިސްތާން ސަރުކާރުން އިންޑިއާއަށް ދިން އިންޒާރުގައި ބުނީ "އެފަދަ އިހުމާލުތަކުގެ ހިތި ނަތީޖާއާ މެދު ވިސްނަން ޖެހޭ" ކަމަށާއި އެފަދަ ކަމެއް ތަކުރާރު ނުކުރުމަށް ގޮވާލާ ކަމަށެވެ.
ޕާކިސްތާނުގެ ފޮރިން މިނިސްޓްރީން ހުކުރު ދުވަހު އިންޑިއާގެ ޗާޖް ޑެ އެފެއާޒް ހާޒިރުކޮށް، ރަސްމީކޮށް ޝަކުވާ ހުށަހަޅާފައިވާ ކަމަށެވެ.
އޭގެ އިތުރުން އެ ހާދިސާ ހިނގައިދިޔަ ގޮތުގެ ތަހުގީގު ހިންގުމަށް ފަހު، ހޯދުންތައް ޕާކިސްތާން ސަރުކާރާ ހިއްސާ ކުރުމަށް ވެސް ގޮވާލި އެވެ.
