ޓެކްސީ ދަތުރުތަކުގެ އަގުތަކަށް ބަދަލު ގެނައުމަށް ގޮވާލާ އިހުތިޖާޖުކުރަމުންދާ ޑްރައިވަރުންތައް މާލޭގައި ކާރު ރެލީއެއް ބާއްވަން ކުރި މަސައްކަތަށް ފުލުހުން ހުރަސް އަޅައިފި އެވެ.
އެ އިހުތިޖާޖުގައި ބައިވެރިވާ ޓެކްސީ ޑްރައިވަރެއް ނަން ނުޖެހުމަށް އެދި "އަދަދު" އަށް ބުނީ މާލޭގައި ރެލީއެއް ބޭއްވުމަށް ޑްރައިވަރުން މާލެއަށް ދަތުރުކުރަމުން ދަނިކޮށް ފުލުހުން އެ ޑްރައިވަރުންނަށް ހުރަސް އަޅާފައިވާ ކަމަށެވެ.
"މިހާރު އެންމެން މި ތިބީ ބްރިޖު ކައިރީ. ވަރަށް ބާރުބޮޑުކޮށް އޮތީ މިތަން. ބްރިޖަށް އެރުނަ ނުދިން. ފުލުހުން ބުނީ ތިނޫން ގޮތަކަށް އަންނާށޯ މާލެ ދަންޏާ. އެންމެން އެއްކޮށް އެހެން އައިމަ،" އޭނާ ބުންޏެވެ.
ޓެކްސީ ޑްރައިވަރުން ކުރިޔަށް ގެންދަން އުޅުނު ރެލީއެއް ފުލުހުން ހުއްޓުވާފަ. ފޮޓޯ: އަދަދު
ގާތްގަނޑަށް 100 އެއްހާ ކާރު ބައިވެރިވާކަމަށް މައުލޫމާތު ލިބިފައިވާ އެ އިހުތިޖާޖުގައި ޑްރައިވަރުން ގޮވާލި ކަންކަމަށް މިނިސްޓްރީގެ ފަރާތުން ޖަވާބެއް ލިބިފައިވާކަމަށް ވެސް އެ ޑްރައިވަރު ބުންޏެވެ. ނަމަވެސް އެއީ އެއްވެސް ގޮތަކަށް ޑްރައިވަރުން ބަލައިގަންނަ ޖަވާބެއް ނޫންކަމަށް އޭނާ ބުނެ އެވެ،
"މިނިސްޓްރީން ބުނީ ފެށޭ ހަފްތާގެ ކޮންމެވެސް ދުވަހަކުން އެ އަގުތަކަށް ގޮތެއް ނިންމާނެކަމަށް. އެ ކޮން ދުވަހެއްކަމެއް ކޮން ގޮތަކަށް ނިންމާކަމެއް ކަން އަހަރުންނަކަށް ނޭނގެ. ދެން އަހަރުންވީ އަދިވެސް ބޮޑު ހަރަދުގަ ދަތުރުކުރަން އެ ދުވަސް އަންނަންދެން،" އޭނާ ބުނެ އެވެ.
އޭނާ ބުނީ މިނިސްޓްރީން އެދެވޭ ޖަވާބެއް ނުދޭތީވެ، ޑްރައިވަރުން އަދިވެސް ތިބީ އިހުތިޖާޖާއިގެން ކުރިޔަށް ދާ ގޮތަށް ކަމަށެވެ. ޑްރައިވަރުންގެ ހުށަހެޅުންތަކަށް މިނިސްޓްރީގެ ފަރާތުން މީޑިއާއަށް އަދި ވަކި އެއްޗެއް ހާމައެއް ނުކުރެ އެވެ. އަދި ފުލުހުން ވެސް ހުޅުމާލެއިން ހުއްޓުވި ރެލީއާ ގުޅޭގޮތުން ވަކި އެއްޗެއް ނުބުނެ އެވެ.
