މޯލްޑިވްސް ކަސްޓަމްސްއިން ކްލިއަރެންސްގެ މަރުަހަލާތަކަށާއި އެކައުންޓިން ފަދަ މަސައްކަތްތަކަށް ބޭނުންކުރަމުން އައި "އަސިކުޑާ" ސިސްޓަމަށް ކުރިމަތިވި މައްސަލައަށް ވަގުތީ ހައްލެއް ހޯދުމުގެ ގޮތުން އެ ނިޒާމު މެދުވެރިކޮށް ކުރާ ބައެއް މަސައްކަތްތައް ކަސްޓަމްސްގެ މައި ޕޯޓަލްގެ ދަށަށް ބަދަލުކޮށްފި އެވެ.
ކަސްޓަމްސް އިން ބޭނުންކުރާ އަސިކުޑާ ނިޒާމަށް މައްސަލައެއް ކުރިމަތިވެފައިވާ ކަމަށް އެންމެ ފުރަތަމަ ކަސްޓަމްސް އިން ބުނީ މިދިޔަ ހޮނިހިރު ދުވަހު އެވެ. އަސިކުޑާ އަކީ ކަސްޓަމްސް އިން މުދާ ޑިކްލެއާކުރުމާއި ކްލިއަރެންސްގެ އެކި މަސައްކަތްތަކުގެ އިތުރުންް އެކައުންޓިން މަސައްކަތްތަކަށް ވެސް ހިދުމަތް ދިނުމަށް ބޭނުންކުރާ މުހިންމު ނިޒާމެކެވެ.
އެ ނިޒާމަށް ކުރިމަތިވި މައްސަލައިގެ ސަބަބުން މުދާ ޑިކްލެއާ ކުރާ ފޯމު ސްކޭންކުރުމަށްފަހު އަސިކުޑާ އަށް އަޕްލޯޑުކުރުމުގެ ބަދަލުގައި މިހާރު ޖެހޭނީ ކަސްޓަމްސްގެ މައި ޕޯޓަލްއަށް އަޕްލޯޑު ކުރަން ކަމަށް ކަސްޓަމްސްގެ މީޑިއާ އޮފިޝަލް ސުޕްރިޓެންޑެންޓް ފާތިމަތު ޝިފާޒާ މި ނޫހަށް ވިދާޅުވި އެވެ.
"ވަރަށް ކޮމްޕްލެކްސް ސިސްޓަމެއް އެއީ އަސްލު ހަގީގަތުގަ. ދެން މިހާރު އެ ދިމާވި މައްސަލައާ ހެދި ވަގުތީކޮށް ސްކޭންކޮށްފަ ޑޮކިއުމެންޓް ކަސްޓަމްސްގެ ޕޯޓަލްއަށް އަޕްލޯޑު ކުރެވޭނެ ގޮތަށް ވަނީ ހަމަޖެހިފަ،" ޝިފާޒާ ވިދާޅުވި އެވެ.
އަދިވެސް އެ މަަސައްކަތަށްޓަކައި ރެޖިސްޓާކުރަން ޖެހޭނީ އަދި ފޯމު ފުރިހަމަކުރަން ޖެހޭނީ ވެސް އަސިކުޑާ މެދުވެރިކޮށް ކަމަށް އޭނާ ވިދާޅުވި އެވެ. އެ ސިސްޓަމަށް މެދުވެރިވި މައްސަލައިގެ ސަބަބު އަދިވެސް ހޯދިފައި ނުވާކަމަށް ޝިފާޒާ ވިދާޅުވި އެވެ. އޭނާ ވިދާޅުވީ އެކަން ހައްލުކުރުމަށްޓަކައި ކަސްޓަމްސްގެ އައިޓީ ޓީމުތައް މިހާރު ވެސް މަސައްކަތްކުރަމުންދާ ކަމަށެވެ.
"އަސްލު އެ ސިސްޓަމްގެ އަޕްލޯޑުކުރާ ބައި ބަދަލުކުރީމަ މިހާރު ނޯމަލްކޮށް މަސައްކަތްކުރާ ކަމަށް އަޅުގަނޑަށް ވެސް މައުލޫމާތު ލިބެނީ. ދެން ދިމާވި މައްސަލައަކީ ކޮމްޕްލީޓް ޝަޓްޑައުނެއް ނޫން. ނަމަވެސް މަޑުމަޑުން ސިސްޓަމް ސްލޯވާން ފެށުން،" އަސިކުޑާއަށް ކުރިމަތިވި މައްސަލައިގެ ގޮތުގައި ޝިފާޒާ ވިދާޅުވި އެވެ.
ކުރިން އިންނާނީ 24 ގަޑިއިރު ޑޮކިއުމެންޓްތައް އަސިކުޑާ އަށް އަޕްލޯޑް ކުރެވޭ ގޮތަށް ކަމަށް އޭނާ ވިދާޅުވި އެވެ. ނަމަވެސް, އެ ނިޒާމު ލަސްވާން ފެށުމާއެކު ހިދުމަތަށް ބުރޫއަރަން ފެށި ކަމަށް އޭނާ ވިދާޅުވި އެވެ. އެ ހިސާބުން މައްސަލަ ހައްލުކުރުމުގެ މަސައްކަތް ފެށި ކަމަށް އޭނާ ވިދާޅުވި އެވެ.
މިހާރު ކަސްޓަމްސްގެ އަމާޒަކީ ކަސްޓަމްސްގެ ޕޯޓަލް އާއި އަސިކުޑާ ނިޒާމު ވެސް މޮނިޓާކޮށް ކުރިމަތިވި މައްސަލަ ހައްލުކުރުންކަމަށް އޭނާ ވިދާޅުވި އެވެ.
އަސިކުޑާއަކީ ނިޒާމަކީ އދ. ގެ ކޮންފަރެންސް އޮން ޓްރޭޑް އެންޑް ޑެވެލޮޕްމެންޓުން ތަރައްގީކުރި ނިޒާމެކެވެ.
