ތެލުގެ އަގު ބޮޑުވެފައިވާތީ މާލޭގައި ޓެކްސީ ދުއްވާ އަގު ބޮޑު ކުރުމަށް ޓެކްސީ ޑްރައިވަރުން ހުށަހެޅި ބަދަލުތަކަށް ޓްރާންސްޕޯޓު މިނިސްޓްރީން މިރޭ 20:00 އާ ހަމަޔަށް ޖަވާބެއް ނުދީފިނަމަ، އިހުތިޖާޖު ހުއްޓުމެއް ނެތި ކުރިޔަށް ގެންދަން ޓެކްސީ ޑްރައިވަރުން ނިންމައިފި އެވެ.
ޓެކްސީ ޑްރައިވަރުން ދަނީ ތެޔޮ ހަރަދު ބޮޑުވެފައިވާކަމަށް ބުނެ މިއަދު 13:00 އިން ފެށިގެން ދަތުރުކުރުން ހުއްޓާލައި ހުޅުމާލެ ރުއްގަނޑު ސަރަހައްދުގައި އިޖުތިޖާޖުކުރަމުންނެވެ. އެ އިހުތިޖާޖު ރޭވުމުގައި އިސްކޮށް ހަރަކާތްތެރިވާ ޓެކްސީ ޑްރައިވަރެއްކަމުގައިވާ އަހުމަދު ޝަމާލް "އަދަދު" އަށް ބުނީ ޑްރައިވަރުން ތިބީ އަގުތަކުގެ މައްސަލައިގައި ގޮތް ދޫކުރާ ގޮތަކަށް ނޫން ކަމަށެވެ.
"މިހާރު ސެންޓަރުތައް ވެސް ބަންދުކޮށް އެޕްލިކޭޝަންތައް ވެސް ބޭނުންނުކުރެވޭނެ. އެގޮތަށް ނިންމީ މިރޭ 20:00 އާ ހަމަޔަށް. އެހާއިރަށް މިނިސްޓްރީން ޖަވާބެއް ނުދީފިނަމަ ހަމަ ކުރިޔަށް ގެންދާނަން،" އޭނާ ބުންޏެވެ.
ޝަމާލް ބުނީ އަދި މިހާތަނަށް ޓްރާންސްޕޯޓު މިނިސްޓްރީގެ ފަރާތުން އެއްވެސް ޖަވާބެއް ލިބިފައި ނުވާ ކަމަށެވެ. އަދި ޑްރައިވަރުން އަދިވެސް ދަނީ ހުޅުމާލެ ރުއްގަނޑު ސަރަހައްދުގައި ހިމޭން އިހުތިޖާޖު ކުރަމުން ކަމަށް އޭނާ ބުނެ އެވެ. އޭނާ އިތުރަށް ބުނީ މިނިސްޓްރީގެ އަމަލުތައް ހުންނަ ގޮތުން ޑްރައިވަރުން ވެސް އިތުރު ފިޔަވަޅުތައް އަޅަމުން ގެންދާނެ ކަމަށެވެ.
"ހަމަ މިނިސްޓްރީގެ ފަރާތުން ކުރާ ކަމަކަށް ބަލާފަ އަޅުގަނޑުމެން ވެސް އިތުރަށް ހަރުކަށިކުރަން މިތިބީ ނިންމައިގެން،" ޝަމާލް ބުންޏެވެ.
ތެލުގެ ހަރަދުތަައް ރާއްޖޭގައި އިތުރުވެފައިވާއިރު ޑްރައިވަރުން ވަނީ މާލޭގެ އެތެރޭގެ ދަތުރުތަކުގެ އަގުތައް 30ރ. އަށް އިތުރުކުރަން މިނިސްޓްރީއަށް ހުށަހަޅާފަ އެވެ. ނަމަވެސް ހުޅުމާލެ ފޭސް އެކެއް އަދި ފޭސް ދޭއްގެ އެތެރޭގެ އަގުތަކަށް ބަދަލެއް ގެންނާކަށް ހުށައެއްނާޅަ އެވެ.
އޭގެ އިތުރުން ވެސް ބްރިޖު ހުރަސްކޮށް މާލެއިން ހުޅުމާލެއަށް ނަމަ 100ރ. އަދި މާލެއިން އެއާޕޯޓަށް ނަމަ 80ރ. ނަގަން ވަނީ ހުށަހަޅާފަ އެވެ. އަދި މާލެއިން ހުޅުލޭގެ ސީޕްލޭން ޓާމިނަލަށް ނަމަ 100ރ. ގެ ރޭޓުން ނެގުމަށް ވަނީ ހުށަހަޅާފަ އެވެ.
އަދި ހުޅުމާލެ އެއް ފޭސް އިން އަނެއް ފޭސްއަށް ދާނަމަ 40ރ. އަދި ހުޅުމާލެ ފޭސް ދެއަކުން އެއާޕޯޓުގެ ސީޕްލޭން ޓާމިނަލަށް ވެސް 120ރ. އަދި މާލެއިން ހުޅުމާލެ ފޭސް ދެއަކަށް ވެސް 120ރ. ނެގުމަށް ވަނީ ހުށަހަޅާފަ އެވެ.
ނަމަވެސް،، ޑްރައިވަރުން އަގުތައް ހުށަހެޅުމުގެ ކުރިން ވެސް މިނިސްޓްރީން ވަނީ އަގުތަކަށް ބަދަލު ގެނައުމުގެ ވިސްނުމެއް ނެތް ކަމަށް ބުނެފަ އެވެ. އަދި އާންމުންގެ ބައެއް މީހުން ވެސް ވަނީ ޓެކްސީ ޑްރައިވަރުން ހުށަހެޅި އަގުތަކާއި ދޭތެރޭ ހިތްހަމަނުޖެހުން ފާޅުކޮށްފަ އެވެ.
