ގަވާއިދުން ޝާއިއު ނުކުރާ 47 ނޫހެއްގެ ހުއްދަ ހޯމް މިނިސްޓްރީން މިއަދު ބާތިލްކޮށްފި އެވެ.
ހޯމް މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ މިއަދުން ފެށިގެން އުވަލީ، ނޫސް މަޖައްލާތެކޭ ގަވާއިދުގައިވާ ގޮތުގެ މަތިން ޝާއިއު ކުރަމުންނުދާ މަޖައްލާތައް ކަމަށެވެ.
ހުއްދަ ބާތިލް ކުރި 47 ނޫސް މަޖައްލާގެ ތެރެއިން އެންމެ ފާހަގަކުރެވެނީ މީގެ ދެ އަހަރު ކުރިން މަސައްކަތް ހުއްޓާލި "މޯލްޑިވްސް އިންޑިޕެންޑެންޓް" އެވެ. އަލް ޖަޒީރާގައި މިވަގުތު މަސައްކަތްކުރާ ދިވެހި ނޫސްވެރިޔާ ޒަހީނާ ރަޝީދުގެ އެޑިޓަރުކަމުގެ ދަށުން އިނގިރޭސި ބަހުން ނެރުމުން އައި އެ ނޫހަކީ ކަރަންޓް އެފެއާޒް ހަބަރުތައް ތަފްސީލާ އެކު ގެނެސްދިން ނޫހެކެވެ.
މީގެ އިތުރުން ރައީސުލްޖުމްހޫރިއްޔާގެ އޮފީހުން 2016 ވަނަ އަހަރު ނެރެން ފެށި "ސަރުކާރުގެ ހަބަރު" ވެސް އެ ލިސްޓުގައި ހިމެނެ އެވެ. އެ ނޫހުގެ އެޑިޓަރަކީ އޭރު ރައީސް އޮފީހުގެ މީޑިއާގައި އިސްކޮށް އުޅުއްވި މިހާރު ޕީއެސްއެމްގެ މެނޭޖިން ޑިރެކްޓަރު އަލީ ހާލިދެވެ.
ކުރީގެ މަޝްހޫރު ނޫސްވެރިޔާ މުހައްމަދު ރަފީގު (ރިވަރިން) އެޑިޓަރުކަމުގައި 2016 ވަނަ އަހަރު ރަޖިސްޓްރީކޮށްފައިވާ "އުދަރެސް އޮންލައިން" އާއި "ފިޔެސް ނިއުސް" ވެސް އެ ލިސްޓުގައި ހިމެނެ އެވެ. "އުދަރެސް" އާއި "ފިޔެސް" އަކީ ކުރީގެ މަޝްހޫރު ދެ މަޖައްލާ އެވެ. އެ ނަންތައް ހިމެނޭ ގޮތަށް ރިވަރިން ރަޖިސްޓްރީކުރި ދެ ނޫސް މާބޮޑަށް ފާހަގައެއް ނުވެ އެވެ.
މީގެ އިތުރުން "މިއަދު" ނޫހުގެ ސިސްޓާ ނޫހެއްގެ ގޮތުގައި 2017 ވަނަ އަހަރު ރަޖިސްޓްރީކޮށްފައިވާ "މިއަދު ބިޒްނަސް ރިވިއު އޮންލައިން" ވެސް ވަނީ އުވާލުމުގެ ފުރުސަތު އޮތް ލިސްޓަށް އަރައިފަ އެވެ. މީއީ މަޝްހޫރު ވިޔަފާރިވެރިޔާ ގާސިމް އިބްރާހިމްގެ އައިލެންޑް ބްރޯޑްކާސްޓިން ކޮމްޕެނީން ނެރުނު ނޫހެކެވެ.
