މި މަހު 17 ވަނަ ދުވަހު ބާއްވާ "މޯލްޑިވްސް ސްޕޯޓްސް އެވޯޑްސް 2022" ގައި ބައިވެރިވެވަޑައިގެންނެވުމަށް ސްރީ ލަންކާގެ ކުޅިވަރާބެހޭ ވަޒީރު ނަމާލް ރާޖަޕަކްސަ އާއި ބަންގްލަދޭޝްގެ ކުޅިވަރު މިނިސްޓަރު ޒާހިދު އަހްސަން ރަސަލް އަދި ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ ރާއްޖެ ވަޑައިގަންނަވާނެ ކަމަށް ރާއްޖޭގެ ޔޫތު މިނިސްޓަރު އަހުމަދު މަހުލޫފް އިއުލާނުކުރައްވައިފި އެވެ.
މޯލްޑިވްސް ސްޕޯޓްސް އެވޯޑްސް ހަފްލާގައި 550 އަށް ވުރެ ގިނަ މީހުން ބައިވެރިވާއިރު، ގައުމުތަކުގެ ކުޅިވަރުގެ އިސް ވެރިންގެ އިތުރުން ކުޅިވަރުގެ ގިނަ މަގުބޫލު ސަހުސިއްޔަތުންނެއް ބައިވެރިވާނެ އެވެ. މިނިސްޓަރު މަހުލޫފް ވިދާޅުވީ މިއީ ރާއްޖޭގައި ބޭއްވޭ މި ފަދަ އެންމެ ބޮޑު އިވެންޓަށް ވާނެ ކަމުގެ ޔަގީންކަން އެބައޮތް ކަމަށެވެ.
ދާދިފަހުން ރާއްޖޭގެ ކުޅިވަރަށް ފުރުސަތު ފަހިކޮށްދޭން ބަންގްލަދޭޝަށް މިނިސްޓަރު މަހުލޫފް ވަޑައިގެންނެވިއިރު، ސްޕޯޓްސް އެވޯޑަށް ބަންގްލަދޭޝްގެ ކުޅިވަރު މިނިސްޓަރު ޒާހިދު ވަޑައިގަންނަވާ ގޮތަށް މި ވަނީ ހަމަޖެހިފަ އެވެ. މިދިޔަ އޮކްޓޫބަރު މަހު ރާއްޖޭގައި ބޭއްވި ސާފް ޗެމްޕިއަންޝިޕްގައި ރާއްޖެ އާއި ސްރީ ލަންކާ ކުޅުނު މެޗަށް ލަންކާގެ ކުޅިވަރާބެހޭ ވަޒީރު ނަމާލް ރާއްޖެ ވަޑައިގެންނެވި އެވެ. އަދި ނަމާލްގެ ދައުވަތެއް ގަބޫލުކުރައްވައި މިނިސްޓަރު މަހުލޫފް ވަނީ ނޮވެމްބަރު މަހު ލަންކާގައި ބޭއްވި ރާޖަޕަކްސަ ޓްރޮފީ މުބާރާތުގެ ހުޅުވުމުގެ ރަސްމިއްޔާތުގައި ބައިވެރިވެވަޑައިގަންނަވައިފަ އެވެ.
ސައުދީގެ އަންހެން ޓީމު ބައިނަލްއަގުވާމީ ފުޓްބޯޅައިގެ ފުރަތަމަ މެޗުތައް މިދިޔަ މަހު ކުޅުނީ ރާއްޖޭގަ އެވެ. ސައުދީ އާއި ރާއްޖޭގެ ދެމެދުގައި ކުޅިވަރުގެ ރޮނގުން ހާއްސަ ގާތް ކަމެއް އޮތްއިރު، ސައުދީ އަރަބިއްޔާގެ ކުޅިވަރުގެ ވައިސް މިނިސްޓަރު ބަދޭރް އަލްހާދީ ރާއްޖެ ވަޑައިގަންނަވަނީ އެ ގައުމުގެ ކުޅިވަރު މިނިސްޓަރު ޕްރިންސް އަބްދުލް އަޒީޒް ބިން ތުރްކީ އަލް ފައިސަލްގެ ފަރާތްޕުޅުން ހާއްސަ މަންދޫބެއްގެ ގޮތުގަ އެވެ.
ރާއްޖޭގައި މިހާތަނަށް ބޭއްވޭ އެންމެ ޝަރަފްވެރި ކުޅިވަރު އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ގިނަ އެތުލީޓުންނެއް ބައިވެރިވާއިރު، މިހާތަނަށް އިއުލާނުކޮށްފައިވާ ގޮތުން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް އާއި ވޮލީ ޗެމްޕިއަން ގިލްބާޓޯ ގޮޑޯއި (ގީބާ) އަދި ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މޯލްޑިވްސް ސްޕޯޓްސް އެވޯޑްސްގެ އޮންލައިން މީޑިއާ ޕާޓްނަރަކީ "އަދަދު" ނޫހެވެ.
މުޅިން އަލަށް ބާއްވާ އެވޯޑުގައި އަހަރުގެ އެންމެ މޮޅު ކުޅިވަރު އެތުލީޓް (އަންހެން/ފިރިހެން)، ކޮންމެ ކުޅިވަރެއް ވަކިވަކިން އެންމެ މޮޅު ކުޅުންތެރިޔާ (އަންހެން/ފިރިހެން)، ސްޕެޝަލް އެބިލިޓީ އެތުލީޓް (އަންހެން/ފިރިހެން)، އެންމެ މޮޅު ކޯޗު (އަންހެން/ފިރިހެން)، އަހަރުގެ އެންމެ މޮޅު ޓެކްނިކަލް އޮފިޝަލް (އަންހެން/ފިރިހެން)، އެންމެ މޮޅު ސިއްހީ އެހީތެރިޔާ (އަންހެން/ފިރިހެން)، އެންމެ އުންމީދީ އެތުލީޓް (އަންހެން/ފިރިހެން)، އެންމެ މޮޅު ކުޅިވަރު ނޫސްވެރިޔާ، އެންމެ މޮޅު ކުޅިވަރު ފޮޓޯ ޖާނަލިސްޓް، އަހަރުގެ އެންމެ ފާހަގަކޮށްލެވޭ ކުޅިވަރު އެސޯސިއޭޝަން، އެންމެ ފާހަގަކޮށްލެވޭ ސްޕޯޓްސް ބްރޯޑްކާސްޓަރު، އެންމެ ފާހަގަކޮށްލެވޭ ސްޕޯޓްސް އޮންލައިން މީޑިއާ އަދި ލައިފް ޓައިމް އެޗީވްމަންޓް އެވޯޑް ދީނުމަށްވަނީ ހަމަޖެހިފަ އެވެ. ޖުމްލަ އެއްކޮށް 100 އަށް ވުރެ ގިނަ އެވޯޑް ދޭނެ އެވެ.
މި އެވޯޑްތަކަށް ނަންތައް ނޮމިނޭޓްކުރާނީ ގައުމީ ކުޅިވަރު އެސޯސިއޭޝަން ތަކުންނެވެ. އެސޯސިއޭޝަންތަކުން ހުށަހަޅާ ނަންތަކުގެ ތެރެއިން އެވޯޑް ލިބޭ ފަރާތެއް ހޮވާނީ އެ ކަމަށް ކަނޑައަޅާފައިވާ ޖަޖުންގެ ޕެނަލަކުންނެވެ.
