ވޮޝިންޓަން، އެމެރިކާ (މާޗް 9) - އޫރެއްގެ ހިތަށް ޖެނެޓިކް ބަދަލުތަކެއް ގެނައުމަށް ފަހު، އެ ހިތް ލެއްވި މީހާ މަރުވެއްޖެ އެވެ.
ފަރުވާއިން ރަނގަޅު ނުކުރެވޭ ހިތުގެ ބޮޑު ބައްޔެއް ހުރި އެމެރިކާގެ ޑޭވިޑް ބެނެޓް އޫރުގެ ހިތް ލެއްވި ސާޖަރީއަށް ފަހު ދިރިހުރީ ދެ މަހެވެ.
އޭނާގެ ޑޮކްޓަރުން ބުނީ އުމުރުން 57 އަހަރުގެ ބެނެޓްގެ ހާލަތު ގޯސްވަމުން ގޮސް، މާޗް އަށް ވަނަ ދުވަހު އޭނާ މަރުވެފައިވާ ކަމަށެވެ.
ސާޖަރީގެ ސަބަބުން އޮތް ނުރައްކާތައް ބެނެޓްއަށް އިނގެ އެވެ. އެހެންކަމުން އެއީ އޭނާ ނެގި ބޮޑު "ރިސްކެއް"ގެ ގޮތުގައި ޑޮކްޓަރުން ސިފަކުރެ އެވެ.
ސާޖަރީ ހެދުމުގެ ކުރިން ހަ ހަފްތާ އޭނާ އޮތީ އެޑްމިޓްކޮށްފަ އެވެ. އަދި ދުނިޔޭގައި ދިރި ހުރީ މެޝިނެއްގެ އެހީގަ އެވެ. އޭނާގެ ބަލީގެ ހާލަތު ގޯސްކަމުން، އިންސާނެއްގެ ހިތުގެ ޓްރާންސްޕްލާންޓަށް ޝަތުރު ހަމައެއް ނުވެ އެވެ.
އެހެންވެ، ބެނެޓްގެ ހުއްދައާ އެކު އެމެރިކާގެ ކަމާ ބެހޭ އިދާރާއިން ވަނީ އޫރެއްގެ ހިތް ލައްވައި، "އެކްސްޕެރިމެންޓް" ކުރުމުގެ ފުރުސަތު ޑޮކްޓަރުންނަށް ދީފަ އެވެ.
އެ ސާޖަރީ ހެދީ ޖެނުއަރީ ހަތް ވަނަ ދުވަހު އެވެ. އޭގެ ފަހުން އޭނާ ދުވަސްތައް ހޭދަކުރީ އާއިލާއާ އެކު ހޮސްޕިޓަލުގަ އެވެ. ނަމަވެސް ހާލަތު ގޯސްވަމުން ގޮސް، ދެވޭނެ އިތުރު ފަރުވާއެއް ނެތް ކަމަށް ޑޮކްޓަރުން ނިންމި އެވެ.
ގުނަވަނުގެ ޓްރާންސްޕްލާންޓަކީ ގިނަ ބަޔަކަށް ބޭނުންވާ ޕްރޮސީޖާއެއް ނަމަވެސް، ގުނަވަން ނުލިބޭތީ އެތައް ހާސް ބަޔަކު ތިބެން ޖެހެނީ ވެއިޓް ލިސްޓުގަ އެވެ.
އެހެންވެ، ޑޮކްޓަރުން އުއްމީދު ކުރީ އޫރުގެ ހިތް ލައްވައިގެން ކުރި ސާޖަރީއަށް ފަހު، ޖަނަވާރުގެ ގުނަވަންތައް އިންސާނުންނަށް ޓްރާންސްޕްލާންޓް ކުރުމުގައި ކުރިއެރުން ހޯދުމަށެވެ.
