މީގެ ދެ ހަފްތާ ކުރިން ރަޝިއާގެ ސިފައިން ޔޫކްރެއިނަށް އަރައި ފެށި ހަނގުރާމައިގެ ސަބަބުން ދުނިޔޭގެ މާކެޓުގައި ތެލުގެ އަގުތައް ދަނީ ހިފެހެއްޓުމެއް ނެތި އުފުލެމުންނެވެ. ތެޔޮ އުފައްދާ ގަލްފުގެ އަރަބި ގައުމުތަކަށް އަގު ތިރިކުރެވިދާނެ ހެއްޔެވެ؟ އަދި ތިރިކުރުމުގެ ގާބިލްކަން އޮތް ނަމަ އެކަން ކުރަން ބޭނުންވޭ ހެއްޔެވެ؟
ޖެރުމަނުވިލާތުގެ އިކޮނޮމީ މިނިސްޓަރު ރޮބަޓް ހޭބެކް އަންގާރަ ދުވަހު އޯޕެކްއަށް ގޮވާލީ "އުފެއްދުންތެރިކަން އިތުރު" ކުރުމަށެވެ. "އަވަސް އެދުމެއް"ގެ ގޮތުގައި ސައުދީ އަރަބިއްޔާ އިސްވެ ހިންގާ އޯޕެކްގައި ޖަރުމަނުން އެދުނީ މާކެޓަށް އަންނަމުންދާ ލޮޅުންތައް ކުޑަކުރުމަށެވެ. ލޮޅުން އަރަނީ ސަޕްލައި ނުލިބުމުގެ ބިރާ ހެދި އެވެ.
އެމެރިކާއަށް ރަޝިއާގެ ތެލާއި ގޭސް އިމްޕޯޓް ކުރުން ހުއްޓާލަން ނިންމާފައިވާ އިރު، އިނގިރޭސިވިލާތުން ބުނީ ރަޝިއާގެ ތެލުގެ އިމްޕޯޓްތައް 2022 ވަނަ އަހަރު ނިމެންވާ އިރަށް މަދު ކުރަމުންދާނެ ކަމަށެވެ.
ދުނިޔޭގައި އެންމެ ގިނައިން ގޭސް އުފައްދަނީ ރަޝިއާ އިންނެވެ. އަދި ސައުދީއަށް ފަހު ދެ ވަނައަށް އެންމެ ގިނައިން ތެޔޮ އުފައްދަނީ ވެސް ރަޝިއާ އިންނެވެ.
އެމެރިކާގެ ނޫސްތަކުން ބުނާ ގޮތުގައި އެ ގައުމުގެ އިސްވެރިޔަކު ވަރަށް އަވަހަށް ސައުދީ އަރަބިއްޔާއަށް ދާނެ ކަމަށް ބެލެވެ އެވެ. ސައުދީއަކީ އެމެރިކާ އާއި ރަޝިއާއާ ވެސް ގާތް ގުޅުމެއް ބާއްވާ ގައުމެކެވެ. އެމެރިކާއިން ބޭނުން ވަނީ ތެލުގެ އުފެއްދުންތެރިކަން އިތުރު ކުރަން އޯޕެކް ގައުމުތަކަށް ބާރު އެޅުމަށެވެ.
ސަޕްލައި އިތުރު ކުރުމުގެ ގާބިލްކަން އެބަ އޮތް ތަ؟
އެނާޖީ އިންޓެލިޖެންސްގެ އެނެލިސްޓް އެމޭނާ ބޭކާ ވިދާޅުވީ ރަޝިއާގެ ތެލުގެ އެކްސްޕޯޓްތައް ވަރަށް ބޮޑަށް ވެއްޓިފައިވާ ކަމަށެވެ. އެގޮތުން މިހާރު އެކްސްޕޯޓްތަކުގެ ތެރެއިން ދުވާލަކު ތިން މިލިއަން ފީފާ މަދުވެފައިވާ ކަމަށް ލަފާކުރެވެ އެވެ. އޭގެ އިތުރުން ކުރިއަށް އޮތް ހަފްތާއެއްގެ ތެރޭގައި ދުވާލަކު އިތުރު ދެ މިލިއަން ގެއްލޭނެ ކަމަށް ބެލެވެ އެވެ.
މިހާރު އުފައްދާ މިންވަރަށް ވުރެ އިތުރަށް ތެޔޮ ސަޕްލައި ކުރުމުގެ ގާބިލްކަން އޮތް އޯޕެކް ގައުމުތަކަކީ ސައުދީ އަރަބިއްޔާ އަދި ޔޫއޭއީ އެވެ. ކުވެއިތާއި އިރާގަށް ވެސް ކޮންމެވެސް ވަރަކަށް ސަޕްލައި އިތުރު ކުރުމުގެ ގާބިލްކަން ލިބިގެންވެ އެވެ.
އެ ހަތަރު ގައުމު އެކުވެގެން ރިޒާވް ކެޕޭސިޓީގެ ގޮތުގައި އުފެއްދޭނީ ދުވާލަކު 2.5-3 މިލިއަން ފީފާ އެވެ. އެހެންކަމުން އެއީ ރަޝިއާއިން މަދުވާ އަދަދާ އެއް ވަރުގެ ކެޕޭސިޓީއެއް ނޫނެވެ.
ގަލްފުން ސަޕްލައި އިތުރުކޮށްފި ނަމަ އަގު ތިރިވާނެ ތަ؟
ކަރުދާހުގައި އޮންނަ ގޮތަށް ހުރިހާ ކަމެއް ހިނގާ ނަމަ އަގު ތިރިވާނެ އެވެ. ނަމަވެސް ރިޒާވް ކެޕޭސިޓީ ބޭނުން ކުރުމަކީ، ސަޕްލައިއަށް އިތުރަށް ހުރަސް އެޅޭ ނަމަ. ތެޔޮ އުފައްދާ ގައުމުތަކުގެ މަސައްކަތަށް ޕްރެޝަރު ބޮޑުވެ، އަގަށް އަސަރު ކުރަން މެދުވެރިވާނެ ސަބަބެކެވެ.
"އަގުތައް މާ ބޮޑަށް ތިރިވާނެ ކަމަކަށް ނުފެނޭ. ސަޕްލައިއަށް އަންނަ ކޮންމެ ލޮޅުމަކާ އެކު މާކެޓުތަކުގެ ނާޒުކުކަން ދާނީ އިތުރުވަމުން،" މާކެޓް ރިސާޗް ކުންފުނި ސީމާކިޓްސްގެ ޔޫސުފް އަލް ޝަމަރީ ވިދާޅުވި އެވެ.
އޭނާ ލަފާކުރައްވާ ގޮތުގައި ހަނގުރާމައިގެ ސަބަބުން ހުރި ނުރައްކާތަކާ ހެދި ކުރިއަށް އޮތް ތަނުގައި ތެލުގެ އަގު 100 ޑޮލަރަށް ވުރެ ތިރި ވާނެ ކަމަށް ނުބެލެވެ އެވެ.
ސަޕްލައި އިތުރު ކުރަން ފަސްޖެހެނީ ކީއްވެ؟
ގަލްފު ގައުމުތައް ބޭނުން ވަނީ އޯޕެކް އާދި ރަޝިއާ އިސްވެ އޮންނަ އޯޕެކް ޕްލަސް ގްރޫޕާ ވެސް ގުޅިގެން ކުރިއަށް ދާށެވެ. އެއީ ތެލުގެ އަގާ ގުޅޭ "ހަނގުރާމައެއް" ނުފަށައި ވޭތޯ ބަލައި، މާކެޓުގެ ކޮންޓްރޯލް ދޫވިޔަ ނުދީ ހިފެހެއްޓުމަށެވެ.
ޑުބާއީގައި ހުންނަ ގަމަރް އެނާޖީގެ ސީއީއޯ ރޮބިން މިލްސް ވިދާޅުވީ އޯޕެކް ޕްލަސް ގައުމުތަކުގެ ގިނަ މެމްބަރުން މިހާރު ވެސް ނެރެނީ "މެކްސިމަމް" ސަޕްލައި ކަމަށެވެ. އެހެންކަމުން އެ ގައުމުތަކަށް ސަޕްލައި އިތުރު ކުރުމުގެ ގާބިލްކަމެއް ނެތެވެ. އޭގެ އިތުރުން ރަޝިއާއަކީ ވެސް އެ ގްރޫޕްގެ މެމްބަރެކެވެ. އެހެންކަމުން ރަޝިއާއާ ދެކޮޅު ވިސްނުމަކަށް އެއްބާރުލުން ލިބޭ ފަދަ ފިޔަވަޅެއް އެ ގްރޫޕުން އަޅާނެ ކަމަށް ނުފެނެ އެވެ.
ސައުދީ އަރަބިއްޔާ އާޢި ޔޫއޭއީއިން މިހާތަނަށް ރަޝިއާއާ ދެކޮޅަށް ވާހަކަތަކެއް ނުދައްކަ އެވެ. އޭގެ އިތުރުން ސިޔާސީ އަދި ސެކިއުރިޓީ މައްސަލަތަކުގައި އެމެރިކާއިން އެންމެ އެކަށީގެންވާ މިންވަރަށް އެއްބާރުލުން ނުދޭ ކަމަށް އަރަބި ގައުމުތަކުން ދެކެ އެވެ.
ސައުދީ އާއި ޔޫއޭއީއަކީ ޔަމަނުގެ ހޫތީންނާ ދެކޮޅު އަސްކަރީ ކޯލިޝަނުގެ މެމްބަރުންނެވެ. އެ މީހުން ދެކެނީ ހޫތީންނާ ދެކޮޅަށް އެމެރިކާއިން އެކަށީގެންވާ ހަރުދަނާ ވިސްނުމެއް ނުގެންގުޅޭ ކަމަށެވެ.
