ވަގުތީ އަމުރަކަށް އެދެއްޖިނަމަ، އެ މައްސަލަ ހުށަހަޅާ ދުވަހު އެކަމުގައި ގޮތެއް ކަނޑައަޅަން ޖެހޭނެ ކަމަށް ސުޕްރީމް ކޯޓުން ދަށު ކޯޓުތަކަށް އަންގައިފި އެވެ.
ވަަގުތުން ގޮތެއް ކަނޑައަޅަން ޖެހޭ ބާވަތުގެ ޖިނާއީ، މަދަނީ އަދި އާއިލާ މައްސަލަތަކުގައި ކޯޓު އަމުރު ދޫކުރުމުގެ އަމަލުކުރާނެ ގޮތުގެ ޕްރެކްޓިސް ޑައިރެކްޝަނެއް މިއަދު އުއްތަމަ ފަނޑިޔާރު މުއުތަސިމް އަދުނާން ސޮއިކުރެއްވުމަށްފަހު ނެރުއްވި އެވެ.
އެ އުސޫލުގައިވާ ގޮތުން ޖިނާއީ މައްސަލައެއްގައި، ފުލުހުން ކޯޓު އަމުރަކަށް އެދިއްޖަ ހާލަތުގައި، އެ އަމުރަކަށް އެދި ކޯޓަށް ފޯމު ހުށަހަޅާ ދުވަހު، އެކަމުގައި ގޮތެއް ނިންމަން ޖެހެ އެވެ.
"...ކޯޓުގެ އިހްތިޔާރުން ބޭރުގެ ކަމެއް ދިމާވެގެން އެ ތާރީހުގައި އެ އަމުރު ނެރުމާމެދު ކޯޓުން ގޮތެއް ނުނިމިއްޖެނަމަ، އެންމެ ލަސްވެގެން ވިދިގެން އަންނަ ދުވަހު އެ އަމުރު ނެރުމާ މެދު ކޯޓުން ގޮތެއް ނިންމަންވާނެ،" ޖިނާއީ މަސައްލަތަކުގައި ވަގުތީ އަމުރަކަށް އެދޭ ދުވަހު އަމުރު ދިނުމާ މެދު ގޮތެއް ނިންމަން ޖެހޭނެ ކަމަށް މިއަދު ސުޕްރީމް ކޯޓުން ކަނޑައެޅި އެވެ.
މަދަނީ އަދި އާއިލީ މައްސަލަތައްކުގައި ވަގުތީ އަމުރަކަށް އެދިއްޖެ ނަމަ، ކޯޓަށް މައްސަލަ ލިބޭ ދުވަސް ގުނަން ފަށަނީ ކަމާބެހޭ ސެކްޝަނަކަށް އެ މައްސަލަ ދާ ހިސާބުންނެވެ.
"އާންމު ދިރިއުޅުމުގައި ކޮންމެ ދުވަހަކު ބޭނުންވާ ހިދުމަތަކާ ގުޅޭ ކަމެއް، ނުވަތަ ވަގުތުން ފިޔަވަޅު ނާޅައިފިނަމަ ފޫނުބެއްދޭވަރުގެ ބޮޑު ގެއްލުމެއް ލިބުމުގެ އިހްތިމާލު ފާޅުކަން ބޮޑު ގޮތެއްގައި ފެންނަން އޮތް ކަމެއްނަމަ، އެ އަމުރަކަށް އެދި ހުށަހެޅި ހުށަހެޅުން މައްސަލަ ބަލާ ސެކްޝަނަށް ލިބޭ ތާރީހުގައި، އެ އަމުރު ނެރުމާމެދު ގޮތެއް ނިންމަންވާނެ،" ސުޕްރީމް ކޯޓުގެ ޕްރެކްޝަން ޑައިރަކްޝަންގައި އިރުޝާދު ދީފައި ވެއެވެ.
އެފަދަ މައްސަލައެއް އެންމެ ލަސްވެގެންވެސް ތިން ދުވަސް ތެރޭ ނިންމަން ޖެހެ އެވެ. އަދި ސެކްޝަނަށް ހުށަހެޅޭ ދުވަހު އެކަމުގައި ގޮތެއް ނުނިމިއްޖެ ހާލަތުގައި ލަސްވި ސަބަބު އެ މައްސަލަ ބައްލަވާ ފަނޑިޔާރެއްގެ ފައިލްގައި ލިޔަން ޖެހެ އެވެ.
