"މޯލްޑިވްސް ސްޕޯޓްސް އެވޯޑްސް" ގެ ހަފްލާ ބާއްވަން ކުޅިވަރު އެކުވެނި ސިންތެޓިކް ޓްރެކް ބަންދުކުރަނީ އެކަން ކުރަން ހޭދަވާ އެންމެ ކުޑަ މުއްދަތަށް ކަމަށް ކުޅިވަރާ ބެހޭ ވަޒީރު އަހުމަދު މަހުލޫފް ވިދާޅުވެއްޖެ އެވެ.
މިނިސްޓްރީން ކޮށްފައިވާ އިއުލާނުގައިވާ ގޮތުން މި މަހު 17 ވަނަ ދުވަހު ބާއްވާ އެވޯޑް ހަފްލާ އަށް ސިންތެޓިކް ޓްރެކް ބަންދުކުރަނީ މި މަހު 11-19 އަށެވެ.
މޯލްޑިވްސް ސްޕޯޓްސް އެވޯޑްސް ހަފްލާގައި 550 އަށް ވުރެ ގިނަ މީހުން ބައިވެރިވާއިރު، އެހާ ގިނަ މީހުންނާ އެކު ބާއްވާ އެ ފަދަ ބޮޑު އިވެންޓެއް ބާއްވަން އެންމެ އެކަށޭނެ ތަނަކަށް އޮތީ ސިންތެޓިކް ޓްރެކް ކަމަށް މިނިސްޓަރު މަހުލޫފް ވިދާޅުވި އެވެ.
"ގާލާ ބޭއްވުމަށް ރީތި ސިންތެޓިކް ޓްރެކް ވަގުތީގޮތުން ބަންދުކުރަންޖެހޭތީ ޓްރެކް ބޭނުންކުރާ ފަރާތްތަކުގެ އަރިހުން މަޢާފަށް އެދެން.މިގޮތަށް ނިންމަންޖެހުނީ ހެންވޭރު، ގަލޮޅު ދަނޑު އަދި ކާނިވާ ސަރަހައްދު ވެސް މިހަފްލާ އަށް ކުޑަވުމުން،" މަހުލޫފް ވިދާޅުވި އެވެ.
"ހަފްލާގެ ތައްޔާރީތަކަށް ކުރަންޖެހޭ ބައިވަރު އަދި ބުރަ މަސައްކަތަށް ތާށިވެ ދަތިވި ނަމަވެސް ޓްރެކް އެއްކޮށް ބަންދު ކުރާނީ އެންމެ ކުރު މުއްދަތަށް،"
މިދިޔަ އަހަރުގެ ކުރީކޮޅުގައި އިންޑިއާގެ ފޮރިން މިނިސްޓަރު ޑރ. ސުބްރަމަންޔަން ޖައިޝަންކަރު، ރާއްޖެ ވަޑައިގެން ބޭއްވި އިވެންޓް ވެސް ކުރިއަށްދިޔައީ ސިންތެޓިކް ޓްރެކުގަ އެވެ.
މިނިސްޓަރު މަހުލޫފް ވިދާޅުވީ ދުނިޔޭގެ ގިނަ ގައުމުތަކުގައި ކުޅިވަރު އެވޯޑު ތަކަކީ ވަރަށް ކުލަގަދަ ކޮށް ކުރާ ކަމެއް ކަމަށެވެ. އެ ގޮތުން ރާއްޖޭގެ ގައުމީ ކުޅިވަރު އެވޯޑްސްގައި އެކުވެރި ބައެއް ގައުމު ތަކުގެ ވަޒީރުން އަދި ވަރުގަދަ ކުޅިވަރު ޝަހުސިއްޔަތުތައް ފެނިގެންދާނެ ކަމަށެވެ.
"މަސައްކަތް މި ކުރަނީ ތަފާތު އަދި ރާއްޖޭގައި ބާއްވާ އެންމެ ބޮޑު އަދި ފުރިހަމަ ހަފްލާއަށް ހެދޭތޯ. މިކަމުގެ ސަބަބުން ކުޅިވަރު އެތުލީޓުންނަށް ވަރަށް ބޮޑު ހިތްވަރެއް ލިބި ކުޅިވަރުގެ ކުރިއެރުމަށް ދެވޭ ބާރަކަށް ވާނެ. އަދި މި ހަފްލާގައި ބައިވެރިވާ ލެޖެންޑުން މެދުވެރިކޮށް އެތަށް މިލިއަން ބައެއްގެ މެދުގައި ރާއްޖެ، ކުޅިވަރުގެ ޒަރިއްޔާއިން އިޝްތިހާރުވެގެން ދާނެ،" މަހުލޫފް ވިދާޅުވި އެވެ.
ރާއްޖޭގައި މިހާތަނަށް ބޭއްވޭ އެންމެ ޝަރަފްވެރި ކުޅިވަރު އެވޯޑް ހަފްލާގައި ދުނިޔޭގެ ލެވަލްގެ މަޝްހޫރު ގިނަ އެތުލީޓުންނެއް ބައިވެރިވާނެ އެވެ. މިހާތަނަށް ޔޫތު މިނިސްޓަރު އަހުމަދު މަހުލޫފް އިއުލާނުކުރައްވާފައިވާ ގޮތުން، ބްރެޒިލްގެ ފުޓްބޯޅަ ތަރި ރޮބާޓޯ ކާލޯސް އާއި ވޮލީ ޗެމްޕިއަން ގިލްބާޓޯ ގޮޑޯއި (ގީބާ) އަދި ޕްރޮފެޝަނަލް ވީލް ޗެއާ ޓެނިސް އެތުލީޓް ރީޑް، ސްޕެއިނުގެ ފުޓްބޯޅަ ލެޖެންޑް މިކޭލް ސަލްގާޑޯ، އިނގިރޭސިވިލާތަށް އުފަން، ވީލްޗެއާ ޓެނިސް ތަރި ލޫސީ ސުކާ އަދި ސްވިޑެންގެ ކާމިޔާބު ފެތުންތެރިޔާ ސާރާ ހޮޔޯސްޓްރޯމް ސްޕޯޓްސް އެވޯޑަށް ރާއްޖެ އަންނާނެ އެވެ.
މީގެ އިތުރުން މިނިސްޓަރު މަހުލޫފް މިއަދު ވިދާޅުވީ ބަންގްލަދޭޝްގެ ކުޅިވަރާބެހޭ ވަޒީރު ޒާހިދު އަހްސަން ރަސަލް ރާއްޖެ ވަޑައިގަންނަވާނެ ކަމަށެވެ.
