ކުއަލަ ލަމްޕޫރް، މެލޭޝިއާ (މާޗް 8) - ކޮވިޑް ވެކްސިން ފުރިހަމަކޮށްފައިވާ ހުރިހާ އެންމެންނަށް އެޕްރީލް އެއް ވަނަ ދުވަހުން ފެށިގެން މެލޭޝިއާގެ ބޯޑަރުތައް ހުޅުވާލަން ނިންމާލައިފި އެވެ.
ފަތުރުވެރިކަމަށް ބަރޯސާވެފައިވާ ދެކުނު އިރުމަތީ އޭޝިއާގައި އޮންނަ މެލޭޝިއާގެ ދޮންވެލި ގޮނޑުދޮށްތަކާއި ގަސް ބޯ ފެހި ޖަންގަލިތައް ވަރަށް މަގްބޫލެވެ.
ކޮވިޑް ބަލިމަޑުކަން ފެތުރެން ފެށުމުން މެލޭޝިއާގެ ބޯޑަރު ބަންދު ކުރީ މާޗް 2020 ވަނަ އަހަރު އެވެ. ނަމަވެސް އެޕްރީލް މަހުން ފެށިގެން ކޮވިޑަށް ނެގެޓިވް ނަތީޖާއާ އެކު މެލޭޝިއާއަށް އެތެރެވެވޭނެ އެވެ.
"އެޕްރީލް 1، 2022 ގައި ބޯޑަރުތައް ހުޅުވާލަން ސަރުކާރުން ނިންމައިފި،" ބޮޑު ވަޒީރު އިސްމާއިލް ސަބްރީ ނޫސްވެރިންނަށް ވިދާޅުވި އެވެ.
"އަޅުގަނޑުމެން ދެކެނީ މި ނިންމުމާ އެކު އިގްތިސާދަށް ކުރިއެރުން ލިބި، ފަތުރުވެރިކަމުގެ ސިނާއަތު އަލުން ދިރެން ފަށާނެ ކަމަށް,"
ބޯޑަރު ހުޅުވާލަން ނިންމި ނަމަވެސް މެލޭޝިއާގެ ކޮވިޑް ކޭސްތަކުގެ އަދަދު އުޅެނީ ދުވާލަކު 25،000 އަށް ވުރެ މަތީގަ އެވެ. ނަމަވެސް ގިނަ ކޭސްތައް ސީރިއަސް ނުވެ އެވެ.
މެލޭޝިއާގެ އިތުރުން އަވަށްޓެރި ސިންގަޕޫރު، ތައިލޭންޑް އަދި ފިލިޕީންސް އިން ވެސް ވަނީ ކޮވިޑާ ގުޅިގެން ބޯޑަރު ބަންދުކޮށް އެޅި ގިނަ ފިޔަވަޅުތަކަށް ލުއި ދީފަ އެވެ.
ވިހި ވިހި ވަނަ އަހަރު މެލޭޝިއާގެ އިގްތިސާދު 5.6 ޕަސެންޓުން ދަށްވި އެވެ. އޭގެ ފަހުން މިދިޔަ އަހަރު 3.1 ޕަސެންޓުގެ ކުރިއެރުމެއް ލިބުނެވެ.
ދެކުނު އިރުމަތީ އޭޝިއާގެ އެންމެ މަގްބޫލް އެއް ބަޖެޓް އެއާލައިން، މެލޭޝިއާގެ އެއާ އޭޝިއާއިން ވަނީ ސަރުކާރުން ނިންމުމަށް މަރުހަބާ ކިޔާފަ އެވެ.
އެއާ އޭޝިއާ ގްރޫޕްގެ ޗީފް އެގްޒެކްޓިވް ބޯ ލިންގަމް ވިދާޅުވީ ބޯޑަރު ހުޅުވާލާ ފުރަތަމަ ހަފްތާގައި އެކަނިވެސް މިލިއަނެއްހާ ޕަސެންޖަރުން ދަތުރު ކުރާނެ ކަމަށް ލަފާކުރެވޭ ކަމަށެވެ.
އެޕްރީލް އެއް ވަނަ ދުވަހު ބޯޑަރު ހުޅުވާލުމުން، ވެކްސިން ފުރިހަމަކޮށްފައިވާ މީހުން ނެގެޓިވް ޕީސީއާރް ނަތީޖާއަކާ އެކު މެލޭޝިއާއަށް އެތެރެވެ، ކަރަންޓީނުވާކަށް ނުޖެހޭނެ އެވެ. ނަމަވެސް އެތެރެވާތާ 24 ގަޑިއިރުގެ ތެރޭގައި އެންޓިޖެން ޓެސްޓެއް ހަދަން ޖެހޭނެ އެވެ.
މީގެ ކުރިން ކަރަންޓީނު ނުވެ، މެލޭޝިއާއަށް އެތެރެވެވެނީ ހަމައެކަނި ސިންގަޕޫރުން ދަތުރު ކުރާ މީހުންނަށެވެ.
މެލޭޝިއާގައި މިހާތަނަށް ކޮވިޑްގެ 3.6 މިލިއަން ކޭސް ރިކޯޑުކޮށްފައިވާ އިރު، 33،000 އަށް ވުރެ ގިނަ މީހުން މަރުވެފައިވެ އެވެ.
އެ ގައުމުގެ އާބާދީގެ 32 މިލިއަން މީހުންގެ ތެރެއިން 80 ޕަސެންޓު ވަނީ ވެކްސިން ފުރިހަމަކޮށްފަ އެވެ.
