ނިއު ދިއްލީ، އިންޑިއާ (މާޗް 7) - އުއްތަރް ޕްރަދޭޝްގެ ޕާލިމެންޓް އިންތިހާބުން ބޮޑު ވަޒީރު ނަރެންދްރަ މޯދީގެ ބީޖޭޕީ ޕާޓީއަށް ކުރި ލިބޭނެ ކަމަށް ޕޯލްތަކުން ދައްކައިފި އެވެ.
ހަތަރު ޕޯލެއްގެ ނަތީޖާއިން ދެއްކި ގޮތުގައި އުއްތަރް ޕްރަދޭޝްގެ ޕާލިމެންޓުގެ 403 ގޮނޑީގެ ތެރެއިން 240 ގޮނޑި ބީޖޭޕީއަށް ލިބޭނެ އެވެ. އެ ސްޓޭޓުގައި ބީޖޭޕީގެ ވެރިޔަކީ ހިންދޫ ފާދިރީ ޔޯގީ އަދިތްޔަނަތް އެވެ.
ގާތްގަނޑަކަށް 200 މިލިއަން މީހުން ދިރިއުޅޭ ސްޓޭޓުގައި ނެގި ވޯޓުގެ ރަސްމީ ނަތީޖާ އިއުލާނު ކުރާނީ ބުރާސްފަތި ދުވަހު އެވެ. އިންތިހާބުގެ ވޯޓުލުން ނިމުނީ ހޯމަ ދުވަހު އެވެ.
އެންމެ ފަހުން އޮތް އުއްތަރް ޕްރަދޭޝްގެ އިންތިހާބުގައި 2017 ވަނަ އަހަރު ވެސް ބީޖޭޕީއަށް ބޮޑު ކާމިޔާބެއް ލިބުނެވެ. އެ ފަހަރު ބީޖޭޕީން ޕާލިމެންޓުގެ 312 ގޮނޑި ހޯދި އެވެ.
އެ ސްޓޭޓުގައި ބީޖޭޕީއާ އެންމެ ވާދަވެރި ސަމަޖްވާދީ (ސޯޝަލިސްޓް) ޕާޓީއަށް ކާމިޔާބު ކުރެވޭނެ ކަމަށް ބެލެވެނީ 150 ގޮނޑި އެވެ.
އެނެލިސްޓުން ބުނާ ގޮތުގައި އުއްތަރް ޕްރަދޭޝްގެ އިންތިހާބުގެ ނަތީޖާއަކީ މޯދީއާ މެދު އާއްމުން ދެކޭ ގޮތް ވަޒަންކުރުމަށް މުހިއްމު ނަތީޖާއެކެވެ. ދެ ވަނަ ދައުރަކަށް 2019 ވަނަ އަހަރު އިންތިހާބުވެވަޑައިގެންނެވި މޯދީ 2024 ވަނަ އަހަރު ތިން ވަނަ ދައުރަކަށް ވެސް ކުރިމަތިލައްވާނެ ކަމަށް ބެލެވެ އެވެ.
