މުޅި ރާއްޖެ އަށް ހުޅުވާލައިގެން ބޭއްވޭ މަޝްހޫރު ފުޓްސަލް މުބާރާތް، ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2022 ގައި ރޭ ކުޅުުނު މެޗުން ގދ. ތިނަދޫ އަތުން 3-0 އިން މޮޅުވެ، ފުރިހަމަ ރެކޯޑަކާ އެކު ވާދޫ އިން އަތޮޅު ޗެމްޕިއަންކަން ހޯދައިފި އެވެ.
ގދ. އަތޮޅުގެ ފަސް ޓީމު މުބާރާތުގައި ބައިވެރިވެފައިވާތީ އެ އަތޮޅުގެ މުބާރާތް ރޭވިފައި އޮތީ ލީގު ބުރެއް ކުޅެގެން އެއް ވަނަ ހޯދާ ޓީމަކަށް ޗެމްޕިއަންކަން ދޭ ގޮތަށެވެ. ރޭގެ މެޗަށް ނުކުތްއިރު، ވާދޫ އިން ވަނީ މަޑަވެލި، ހޯޑެއްދޫ އަދި ގައްދޫ ބަލިކޮށްފަ އެވެ. ރޭ ތިނަދޫ އަތުން ވާދޫ މޮޅުވެ، ޗެމްޕިއަންކަން ހޯދިއިރު، އަދި އެ އަތޮޅު ބުރުގައި ބާކީ ދެ މެޗު އެބައޮތެވެ. އެކަމަކު، އެ މެޗުތަކުގެ ނަތީޖާ ކޮންމެ ގޮތަކަށް ނުކުތަސް ވާދޫއާ ހަމަކުރެވޭނެ ޓީމެއް ނެތުމުން ތަށި ހަވާލުކުރީ އެވެ.
ލަނޑު ޖެހުމަށް ފަހު ވާދޫ ޓީމުގެ ނައްޓު އާއި އެ ޓީމުގެ އެހެން ކުޅުންތެރިއަކު އުފާފާޅުކުރަނީ.-- ފޮޓޯ: އަބްދުﷲ އިޔާން/ އަދަދު
ވާދޫ އަށް ރޭގެ މެޗުގައި ނަޝާހު އަހުމަދު (ނައްޓު) ދެ ގޯލު ޖަހައިދިނެވެ. މެޗުގެ މޮޅު ކުޅުންތެރިޔާގެ މަގާމު ލިބުނީ އަނެއް ގޯލު ޖެހީ މުސައްނިފު މުހައްމަދު އަށެވެ.
ރޭ ގދ އަތޮޅުގެ އަނެއް މެޗުގައި ގައްދޫ ވަނީ 1-0 އިން މަޑަވެލި ބަލިކޮށްފަ އެވެ. ގައްދޫގެ ހަމައެކަނި ގޯލު ޖެހީ އަހުމަދު ރިފްޝާން އެވެ. މެޗުގެ މޮޅު ކުޅުންތެރިއަކަށް ހޮވުނީ ވެސް ރިފްޝާން އެވެ.
ގއ. އަތޮޅު ބުރުގައި ރޭ ކަނޑުހުޅުދޫ ވަނީ 5-1 އިން ގެމަނަފުށި ބަލިކޮށްފަ އެވެ. އަދި އެ އަތޮޅު ދާންދޫ އާއި ދެއްވަދޫ ކުޅުނު މެޗު ނިމިފައިވަނީ 2-2 އިން އެއްވަރުވެގެންނެވެ.
ކަނޑުހުޅުދޫގެ ގޯލުތައް ޖެހީ ކްލަބް އީގަލްސް އަށް ކުޅެމުން އަންނަ އަލީ އަޒްވާން އަބްދުލް އަޒީޒް ދެ ގޯލާއި އައްޒާމް އަލީ ދީދީ، އިސްމާއިލް އަންވަރުގެ އިތުރުން ގެމަނަަަފުށީގެ އަހުމަދު ޝާމް އަތުން ބައިކޮޅަށް ވަން ގޯލެކެވެ. ގެމަނަފުށީގެ ގޯލު ކާމިޔާބުކުރީ އާދަމް އަރީޝް އެވެ. ދާންދޫގެ ދެ ގޯލު ޖެހީ ޖާވިދު އަލީ އާއި އިސްމާއިލް ނަސީރު އެވެ. ދާންދޫ ކޮޅަށް ދެއްވަދޫގެ ގޯލުތައް ޖެހީ އަހުނަފް ރަޝީދާއި ލަމާން ޒުހައިރު އެވެ.
އޮމަދޫ އަތޮޅު ފައިނަލަށް، ބުރުނި އަތުން ވޭމަންޑޫގެ ބަލި
ތ. އަތޮޅުގައި ރޭ އޮމަދޫ އިން ވަނީ 5-3 އިން ކިނބިދޫ ބަލިކޮށް އަތޮޅު ފައިނަލުން ޖާގަ ހޯދައިފަ އެވެ. ގާދިފުއްޓާއި އޮމަދޫގެ ޕޮއިންޓް އެއްވަރުވި ނަމަވެސް ލަނޑުގެ ތަފާތުން އޮމަދޫ ކުރިހޯދައި، ފައިނަލުގެ ޖާގަ ލިބުނީ އެވެ.
އޮމަދޫ ޓީމަށް ރޭގެ މެޗުގައި ގޯލުތައް ޖަހައިދިނީ މުހައްމަދު އަލާއު ދެ ގޯލާއި އަހުމަދު ނަޝްވާނާއި އިސްމާއިލް މިމްރާހު މުއީންގެ އިތުރުން ކިނބިދޫގެ މުހައްމަދު އަނަސް އަތުން ބައިކޮޅަށް ޖެހި ގޯލެކެވެ. ކިނބިދޫގެ ގޯލުތައް ޖެހީ އަލީ ޝާމް، އަލީ ހަމްދޫން ހުސެއިން އަދި މުހައްމަދު ޝާފިއު އެވެ.
އޮމަދޫ އާއި ކިނބިދޫ ކުޅުނު މެޗުގެ ތެރެއިން.-- ފޮޓޯ: އަބްދުﷲ އިޔާން/ އަދަދު
ތ. އަތޮޅު އަނެއް ގްރޫޕްގެ އެއް ވަަނަ ހޯދައި ތިމަރަފުށިން ފައިނަލުގެ ޖާގަ ހޯދާފައިވާއިރު، ރޭގެ މެޗު ބުރުންޏާއި ތިމަރަފުށްޓައް މުހިންމު ވެފައި އޮތީ މޮޅެއް ހޯދުމަށެވެ. މެޗުގައި ބުރުނިން ކުރިހޯދިއިރު، ލަނޑުތައް ޖެހީ މުހައްމަދު އިބްރާހިމް އާއި މުހައްމަދު ނާހިލް ނޫހު އެވެ. ވޭމަންޑޫގެ ހަަމައެކަނި ގޯލު ޖެހީ ހުސެއިން މައުމޫން އެވެ.
މުބާރާތުގައި މިރޭ ވެސް ހަ މެޗެއް ކުޅޭނެ އެވެ. ފުރަތަމަ 20:15 ގައި ފަށާ ދެ މެޗުގައި ބައްދަލުކުރާނީ ރ. ދުވާފަރާއި އިނގުރައިދޫ އަދި ބ. ހިތާދޫ އާއި ތުޅާދޫ އެވެ. އޭގެ ފަހުން 21:15 ގައި ފަށާ ދެ މެޗުގައި ލ. ކަލައިދޫ އާއި ގަން ކުޅޭއިރު، އަނެއް މެޗުގައި ލ އިސްދޫ ކުޅޭނީ އެ އަތޮޅު މާމެންދޫއާ އެވެ. އަދި 22:15 ގައި ފަށާ ފަހު ދެ މެޗަކީ އދ. އަތޮޅު މެޗުތަކެވެ. އެއް މެޗުގައި މާމިގިލި ކުޅޭނީ ހަންޏާމީދޫއާ އެވެ. އަނެއް މެޗުގައި ދަގެނތި ނުކުންނާނީ ކުނބުރުދޫއާ ދެކޮޅަށެވެ.
