ޑުބާއީ، ޔޫއޭއީ (މާޗް 6) - މަނީ ލޯންޑާ ކުރާ ގައުމުތަކުގެ "ގްރޭ ލިސްޓުގައި" ޔުނައިޓެޑް އަރަމް އެމިރޭޓްސް (ޔޫއޭއީ) ހިމެނުމާ އެކު "ހަރުދަނާ ފިޔަވަޅުތަކެއް" އަޅަން އެ ގައުމުން ވައުދުވެއްޖެ އެވެ.
ގަލްފު ސަރަހައްދުގެ އެންމެ މުއްސަނދި އެއް ގައުމު، މަނީ ލޯންޑާއާ ގުޅޭ "ގްރޭ ލިސްޓުގައި" ހިމެނީ ފްރާންސްގައި ހުންނަ ފައިނޭންޝަލް އެކްޝަން ޓާސްކް ފޯސް (އެފްއޭޓީއެފް) އިންނެވެ.
ޔޫއޭއީއާ އެކު އެ ލިސްޓުގައި ހިމެނެނީ 23 ގައުމެވެ. އޭގެ ތެރޭގައި ޔަމަން، ސީރިއާ، އަދި ދެކުނު ސޫދާން ފާހަގަކުރެވެ އެވެ.
ގްރޭސް ލިސްޓު ގައުމުތަކުގެ "ނިޒާމުގައި ހިމެނޭ ބަލިފައިތަކުގެ ސަބަބުން މަނީ ލޯންޑާ ކުރުމާއި ޓެރަރިސްޓުންނަށް ފައިނޭންސް ކުރުމާއި، ހަތިޔާރު އިތުރު ކުރަން ފައިނޭންސް ކުރުމަށް މަގުފަހިވާ" ކަމަށް އެފްއޭޓީއެފުން ނެރުނު ބަޔާނެއްގައި ބުންޏެވެ. އެ ގައުމުތަކުން ދަނީ އެފްއޭޓީއެފްއާ ގުޅިގެން ނިޒާމު ހަރުދަނާ ކުރުމުގެ މަސައްކަތް ކުރަމުންނެވެ.
ޔޫއޭއީގެ އޮފިޝަލުން ބުނީ އެފްއޭޓީއެފްގެ ޓާސްކްފޯސް އިން ކަނޑައަޅާފައިވާ ޝަރުތުތައް ފުރިހަމަ ކުރަން މަސައްކަތް ކުރަމުންދާ ކަމަށާއި އޭގެ ތެރޭގައި ދައުވާ ކުރުން އިތުރު ކުރުމާއި، ދަތިކުރުމުގެ ފިޔަވަޅުތަކަށް "ފިލައިގެން" އުޅޭ ފަރާތްތައް ދެނެގަތުން ހިމެނޭ ކަމަށެވެ.
"ދުނިޔޭގެ މާލީ ނިޒާމު ރައްކާތެރިކޮށް ދެމެހެއްޓުމާ މެދު ޔޫއޭއީިން ވަރަށް ސީރިއަސްކޮށް ވިސްނާ،" އެ ގައުމުގެ މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުމާ ދެކޮޅު އޮފީހުގެ އޮފިޝަލަކު ބުންޏެވެ.
