މޮސްކޯ، ރަޝިއާ (މާޗް 5) - ރަޝިއާގެ ގައުމީ އެއާލައިން، އެއިރޯފްލޮޓްގެ ބައިނަލްއަގްވާމީ ހުރިހާ ދަތުރެއް މާޗް އަށް ވަނަ ދުވަހުން ފެށިގެން ވަގުތީ ގޮތުން މެދުކަނޑާލަން ނިންމައިފި އެވެ.
އެއިރޯފްލޮޓުން ނެރުނު ބަޔާނެއްގައި ބުނީ "ހާލަތު ހުރި ގޮތުން ފްލައިޓްތައް އޮޕަރޭޓް ކުރުމަށް ހުރަސް އެޅިފައިވާ" ކަމަށާއި "ވަގުތީ ގޮތުން ބައިނަލްއަގްވާމީ ފްލައިޓްތައް ސަސްޕެންޑް ވާނީ މާޗް އަށް ވަނަ ދުވަހުން ފެށިގެން" ކަމަށެވެ.
ނަމަވެސް ރަޝިއާގެ އެތެރޭގެ އުދުހުން އެއްވެސް ބަދަލެއް ނެތި ކުރިއަށް ދާނެ ކަމަށާއި އަވައްޓެރި ބެލަރޫސްއަށް ވެސް ފްލައިޓްތައް އޮންނާނެ ކަމަށް ބުންޏެވެ.
އެއިރޯފްލޮޓްގެ ސަބްސިޑަޔަރީ ބަޖެޓު އެއާލައިން ޕޮބެޑާއިން ވެސް ބުނީ މާޗް އަށް ވަނަ ދުވަހުން ފެށިގެން ބައިނަލްއަގްވާމީ ދަތުރުތައް މެދުކެނޑޭނެ ކަމަށެވެ.
ހޮނިހިރު ދުވަހު ރަޝިއާގެ ސިވިލް އޭވިއޭޝަން އިދާރާއިން އެއާލައިންތަކަށް ލަފާދިނީ އެހެން ގައުމުތަކަށް ކުރާ ދަތުރުތައް މެދުކަނޑާލުމަށެވެ. އެއީ ރަޝިއާއިން ޔޫކްރެއިނަށް އެރުމުން އުފެދުފައިވާ ހަނގުރާމައިގެ ސަބަބުން އަޅާފައިވާ ދަތިކުރުމުގެ ފިޔަވަޅުތަކާ އެކު އެއާލައިންތަކުގެ ބޯޓުތައް ހިފެހެއްޓުމުގެ ފުރުސަތު އޮތުމުންނެވެ.
އެހެން ގައުމުތަކުގެ ތިބި ރަޝިއާގެ ރައްޔިތުން އެނބުރި ގައުމަށް ދާން އެދޭ ނަމަ، ދަތިކުރުމުގެ ފިޔަވަޅުގައި ބައިވެރިނުވާ ގައުމެއް މެދުވެރިކޮށް ދަތުރު ކުރުމަށް ލަފާދިނެވެ. އެފަދަ ގައުމުތަކުގެ ތެރޭގައި ފާހަގަކުރީ އަޒަރްބައިޖާން، އަރްމީނިއާ، ކަޒަކިސްތާން، ގަތަރް، ޔޫއޭއީ، ތުރުކީ އަދި ސާބިއާ އެވެ.
