ބެއިޖިން، ޗައިނާ (މާޗް 5) - ޗައިނާގެ އަސްކަރިއްޔާއަށް ކުރާ ހޭދަ މި އަހަރު 7.1 ޕަސެންޓުން އިތުރު ކުރަން ނިންމައިފި އެވެ.
އެމެރިކާއަށް ފަހު ދެ ވަނައަށް އެންމެ ގިނައިން އަސްކަރިއްޔާއަށް ހަރަދު ކުރާ ގައުމަކީ ޗައިނާ އެވެ. ސަރުކާރުގެ ބަޖެޓު ރިޕޯޓުން ދައްކާ ގޮތުގައި 2022 ވަނަ އަހަރު 230 ބިލިއަން ޑޮލަރު އަސްކަރީ ކަންކަމަށް ހާއްސަ ކުރާނެ އެވެ.
މިދިޔަ އަހަރު ވެސް ޗައިނާގެ އަސްކަރިއްޔާއަށް ކުރާ ހޭދަ 6.8 ޕަސެންޓުން އިތުރު ކުރި އެވެ. ފަހަކަށް އައިސް ކޮންމެ އަހަރަކު ވެސް އެ ޕަސެންޓޭޖު އިތުރުވަމުންދާކަން ފާހަގަކުރެވެ އެވެ.
ޗައިނާގެ ބޮޑު ވަޒީރު ލީ ކެގިއާންގް ހޮނިހިރު ދުވަހު އިއުލާނު ކުރެއްވި ގޮތުގައި މި އަހަރު އެ ގައުމުގެ ޖީޑީޕީ ހުންނާނެ ކަމަށް ލަފާ ކުރެވެނީ 5.5 ޕަސެންޓުގަ އެވެ.
ޗައިނާގެ ޕާލިމެންޓު ހުޅުވުމުގެ ގޮތުން ދެއްވި ބަޔާނުގައި ލީ ވިދާޅުވީ ސަރުކާރުން "އަސްކަރީ ތަމްރީން ފުޅާކޮށް، ހަނގުރާމައަށް ތައްޔާރު ފައުޖެއް ބިނާކުރަން ބޭނުން ވަނީ ޗައިނާގެ އިސްތިގްލާލާއި، ސަލާމަތީ ތަރައްގީއާ ގުޅުން ހުރި ކަންކަން ހާސިލް ކުރުމަށް" ކަމަށެވެ.
ޗައިނާގެ އަމާޒަކީ އެމެރިކާ އާއި ހުޅަނގުގެ ގައުމުތައް ފަހަތަށް ވައްޓާލުމަށް ފަހު އެންމެ ޒަމާނީ ފައުޖެއް ބިނާ ކުރުމެވެ.
ޗައިނާ އާއި ވާދަވެރި ގައުމުތަކާ ދެމެދު އޮންނަ ނުތަނަވަސްކަން ފަހަކަށް އައިސް ވަނީ އިތުރުވާން ފަށާފަ އެވެ. އެގޮތުން އިންޑިއާ އާއި އެމެރިކާއާ އެކު އޮތް ގުޅުން ދަނީ ގޯސްވަމުންނެވެ.
ދެކުނު ޗައިނާ ކަނޑުގައި ރަށްތަކެއް އަޅަމުންދާ މައްސަލައިގައި އެ ސަރަހައްދުގެ ގައުމުތައް ކަންބޮޑުވާ އިރު، އިންޑިއާ އާއި ޗައިނާ ގުޅޭ ހިމަލަޔާ ފަރުބަދަ މަތީގެ ބޯޑަރުގައި ދެ ގައުމުގެ ސިފައިންގެ ކުރިމަތިލުންތައް ވެސް ފަހަކަށް އައިސް ވަނީ އިތުރުވެފަ އެވެ.
އޭގެ އިތުރުން ޓައިވާނުގެ މައްސަލައިގައި ޗައިނާއިން ދެކޭ ގޮތުގެ ވާހަކަ ދެއްކުން ތަކުރާރުކޮށްފައިވާ ކަމަށް އެނެލިސްޓުން ބުނެ އެވެ. ޗައިނާއިން ދެކެނީ ޓައިވާނަކީ އެ ގައުމުގެ ބަޔެއްގެ ގޮތުގަ އެވެ.
ޗައިނާއިން އަސްކަރިއްޔާއަށް ކުރާ ހޭދަ އިތުރު ކުރި ނަމަވެސް، އަދިވެސް އެންމެ ބޮޑު އަސްކަރީ ބަޖެޓެއް އޮތީ އެމެރިކާގަ އެވެ. އެމެރިކާގެ 2022 ވަނަ އަހަރުގެ އަސްކަރީ ބަޖެޓަކީ 700 ބިލިއަން ޑޮލަރެވެ.
