އާރްލެސް، ފްރާންސް (މާޗް 4) - ޔޫކްރެއިންގެ މުސްތަގްބަލު އޮތީ ޔޫރަޕިއަން ޔޫނިއަން (އީޔޫ) ގެ ތެރޭގައި ކަމަށާއި ވީ އެންމެ އަވަހަކަށް ޔޫކްރެއިނަށް އީޔޫގެ މެމްބަރުކަން ދޭން ޖެހޭނެ ކަމަށް އީޔޫ ކޮމިޝަންގެ ނައިބު ރައީސް ހުކުރު ދުވަހު ވިދާޅުވެއްޖެ އެވެ.
"މިހާރު މިއީ ވަރުގަދަ މެސެޖެއް ދޭންވީ ވަގުތު. މިއީ ޔޫކްރެއިންގެ ރައްޔިތުނަކީ ޔޫރަޕުގެ ރައްޔިތުންކަން އަންގައިދޭންވީ ވަގުތު. އަޅުގަނޑުމެން ބޭނުމީ ވީ އެންމެ އަވަހަކަށް މެމްބަރުކަން ދޭން،" މާރޯސް ސެފްކޮވިޗް ވިދާޅުވި އެވެ.
މި ހަފްތާގައި ޔޫކްރެއިންގެ ރައީސް ވޮލޮޑިމިރް ޒެލެންސްކީ އީޔޫ ޕާލިމެންޓުގައި އެދިވަޑައިގެންނެވީ ލަސްނުކޮށް އެ ގައުމަށް މެމްބަރުކަން ދިނުމަށެވެ. ރަޝިއާއިން ޔޫކްރެއިނަށް އަރައި ފަށާފައިވާ ހަނގުރާމައާ ހެދި ޔޫރަޕްގެ ޕާލިމެންޓު މެމްބަރުން ވެސް ބޭނުން ވަނީ ޔޫކްރެއިނަށް މެމްބަރުކަން ދިނުމަށެވެ.
އެހެން ނަމަވެސް، އީޔޫގެ މެމްބަރު ކަމަށް އެދި ހުށަހަޅާ ގައުމުތައް ފުރިހަމަ ކުރަން ޖެހޭ ހުރިހާ އިޖުރާއަތެއް ޔޫކްރެއިނުން ވެސް ފުރިހަމަ ކުރަން ޖެހޭނެ އެވެ. ހަނގުރާމައެއް ކުރިއަށް ދިޔަ ނަމަވެސް، އެ އިޖުރާއަތުތައް އަވަސް ކުރެވޭނެ ގޮތެއް ނެތެވެ.
"އެންމެ މުހިއްމު ކަމަކީ ވަރުގަދަ ސިޔާސީ ސިގްލަނެއް ފޮނުވައި، އީޔޫއަށް މެމްބަރުކަން ދިނުމަށް އަޅުގަނޑުމެން ވިސްނަމުންދާކަން ހާމަކުރުން. އަޅުގަނޑުމެން ދެކެނީ ޔޫކްރެއިނަކީ މުސްތަގްބަލުގައި އީޔޫގެ ދައުލަތެއްގެ ގޮތުގައި،" ސެފްކޮވިޗް ވިދާޅުވި އެވެ.
ކިޔެވްގައި ހުންނަވައި ވީޑިއޯ މެދުވެރިކޮށް އީޔޫ ޕާލިމެންޓަށް ދެއްވި ހިތާބުގައި މާޗް އެއް ވަނަ ދުވަހު ޒެލެންސްކީ ވިދާޅުވީ "ވަގުތުން މެމްބަރުންކަން ބޭނުންވާ" ކަމަށާއި ގައުމުން "ހަނގުރާމަ ކުރަމުން ދަނީ ދިރި ހުރުމަށް" ކަމަށެވެ.
