ކިޔެވް، ޔޫކްރެއިން (މާޗް 2) - ޔޫކްރެއިންގެ ދެކުނުގެ މުހިއްމު ބަނދަރެއް ހިމެނޭ ސިޓީއެއް ރަޝިއާގެ ސިފައިން ހިފައިފި އެވެ.
ހާސަންއަކީ މީގެ ހަފްތާއެއް ކުރިން ރަޝިއާ ސިފައިން ޔޫކްރެއިނަށް އެރި ފަހުން ހިފުނު ފުރަތަމަ ސިޓީ އެވެ. މޭޔަރު އައިގޯ ކޮލްޔީހައޭވް ވިދާޅުވީ ރަޝިއާ ސިފައިން ސިޓީ ކައުންސިލް އިމާރާތަށް ވަދެ، ކާފިއު ހިންގަން ފަށާފައިވާ ކަމަށެވެ.
ފޭސްބުކްގައި ކުރެއްވި ޕޯސްޓެއްގައި މޭޔަރު ވިދާޅުވީ 280،000 މީހުންގެ އާބާދީއެއް އޮންނަ ސިޓީ ހިފާފައިވާ ކަމަށާއި، އާއްމުންގެ ގަޔަށް ބަޑި ނުޖެހުމަށް ރަޝިއާ ސިފައިންނަށް ގޮވާލާ ކަމަށެވެ.
ހާސަން ސިޓީ އޮންނަ ހިސާބު ދައްކުވައިދޭ ޗާޓެއް.
ބްލެކް ސީގެ އައްސޭރިފަށުގައި އޮންނަ އެ ސިޓީގައި ޔޫކްރެއިންގެ ސިފައިން ނެތް ކަމަށް ވެސް އޭނާ ވިދާޅުވި އެވެ. އޭނާ ރައްޔިތުންނަށް ގޮވާލެއްވީ ރަޝިއާ ސިފައިންގެ ޝަރުތުތައް ބަލައިގަތުމަށެވެ.
titledesc
ގިނަ ސިޓީތަކަކަށް ހަމަލާދެމުންދާ އިރު، ހަނގުރާމައިގައި މިހާތަނަށް އެންމެ ވަރުގަދަ ހަމަލާތަކެއް ބަދަލު ކުރީ ބުދަ ދުވަހު އެވެ.
ރަޝިއާއިން ހަނގުރާމައިގެ ޖަރީމާ ހިންގާފައިވާ ކަމަށް ބެލެވޭތީ ދަ ހޭގްގައި ހުންނަ ބައިނަލްއަގްވާމީ ކްރިމިނަލް ކޯޓު (އައިސީސީ) އިން ވަނީ ތަހުގީގެއް ފަށާފަ އެވެ.
ބުދަ ދުވަހުގެ ރޭ ރަޝިއާއިން ވަނީ އެ ގައުމަށް ހަނގުރާމައިގެ ލިބުނު ކަމަށް އަންދާޒާ ކުރެވޭ ގެއްލުމުގެ ތަފާސްހިސާބު އާއްމުކޮށްފަ އެވެ. އެގޮތުން 498 ސިފައިން މަރުވެ، 1،597 މީހުންނަށް އަނިޔާވެފައިވެ އެވެ.
ޔޫކްރެއިނުން ބުނާ ގޮތުގައި އެ ގައުމުގެ އާއްމު ރައްޔިތުންގެ ތެރެއިން 2،000 އަށް ވުރެ ގިނަ މީހުން ވަނީ މަރުވެފަ އެވެ. އޭގެ އިތުރުން މިލިއަނަކަށް ވުރެ ގިނަ މީހުން ޔޫކްރެއިން ދޫކޮށް ގޮސްފައިވާ ކަމަށް އދ. އިން ލަފާކުރެ އެވެ.
