މީގެ ހަފްތާއެއް ކުރިން ރަޝިއާގެ ސިފައިން ޔޫކްރެއިން އަރައި ދޭން ފެށި ހަމަލާތަކާ މެދު ދުނިޔޭގެ ގިނަ ގައުމުތަކުން ކަންބޮޑުވެ އެވެ. އެއީ ދެ ވަނަ ބޮޑު ހަނގުރާމައަށް ފަހު ދުނިޔޭގައި އޮތް "އާއްމު ގަވާއިދު" ރޫޅާލައި ގައުމެއް އަޅުވެތިކުރުމިގެ އަމަލެއްގެ ގޮތުގައި ސިފަކުރެ އެވެ.
ދެ ވަނަ ބޮޑު ހަނގުރާމައަށް ފަހު ދުނިޔޭގެ ގައުމުތައް އެކުގައި މަސައްކަތް ކުރަން އުފެއްދި އދ. އިން މިހާތަނަށް ވަނީ ރަޝިއާގެ އެ އަމަލާ ދެކޮޅަށް ދެ ގަރާރަކަށް ވޯޓަށް އަހާފަ އެވެ. ފުރަތަމަ ސަލާމަތީ މަޖިލީހަށް ހުށަހެޅި ގަރާރު ފެއިލްވީ ރަޝިއާއިން ވީޓޯ ކުރުމުންނެވެ.
އެއަށްފަހު ސަލާމަތީ މަޖިލީހުގެ އެދުމަށް، އދ. ގެ އާއްމު މަޖިލީހުން ވަނީ ގަރާރާ މެދު ބަހުސް ކުރަން މެމްބަރު ހުރިހާ ގައުމަކަށް ހުޅުވާލައި، އެ ގައުމުތަކުގެ މެދުގައި ވޯޓަށް އަހާފަ އެވެ. އެއާ އެކު މެޖޯރިޓީ ގައުމުތަކުން މި މައްސަލައިގައި ދެކޭ ގޮތް ވަނީ ހާމަވެފަ އެވެ.
ބުދަ ދުވަހުގެ ރޭ ގަރާރަށް ވޯޓަށް އެހުމުން، ފާސްވީ އދ. ގެ މެމްބަރު 193 ގައުމުގެ ތެރެއިން 141 ގައުމުގެ ވޯޓުންނެވެ. ގަރާރާ ދެކޮޅަށް ވޯޓު ދިނީ ފަސް ގައުމުންނެވެ. އަދި ވަކި އަތަކަށް ނުޖެހެނީ 35 ގައުމުންނެވެ.
ގަރާރަށް ތާއީދުކޮށް ވޯޓު ދިން މެޖޯރިޓީގެ ތެރޭގައި ދިވެހިރާއްޖެ ހިމެނެ އެވެ. އެހެން ނަމަވެސް، ދެކުނު އޭޝިއާގައި ރާއްޖޭގެ އަވައްޓެރިންގެ ގޮތުގައި އޮތް ހަތަރު ގައުމަކުން ވޯޓު ދިނީ ތަފާތުކޮށެވެ. އެގޮތުން ބަންގްލަދޭޝް، އިންޑިއާ، ޕާކިސްތާން އަދި ސްރީލަންކާއިން ނިންމީ ވަކި ކޮޅަކަށް ވޯޓު ނުދިނުމަށެވެ.
ވަކި ކޮޅަކަށް ވޯޓު ނުދޭ ގައުމުތަކުގެ ލިސްޓުގައި ދެން ހިމެނޭ މުހިއްމު ގައުމުތަކަކީ ޗައިނާ، ކިއުބާ، އިރާން، އިރާގް އެވެ. ދެކުނު އޭޝިއާ ސަރަހައްދުން ރާއްޖެއާ އެއް ގޮތަށް ވޯޓު ދިން ގައުމުތަކަކީ އަފްގާނިސްތާނާއި ނޭޕާލް އެވެ.
ގައުމުތަކުން ވޯޓު ދިން ގޮތުގެ ތަފްސީލް.
ގަރާރާ ދެކޮޅަށް އަދި ރަޝިއާއަށް ތާއީދުކޮށް ވޯޓު ދިން ފަސް ގައުމަކީ ބެލަރޫސް، ނޯތު ކޮރިއާ، އެރިޓްރިއާ، ރަޝިއާ އަދި ސީރިއާ އެވެ. ގަރާރަށް ވޯޓަށް އެހުމުގެ ކުރިން ވެސް އެ ގައުމުތަކުން ވަނީ ރަޝިއާއަށް ތާއީދުކުރާކަން ހާމަކޮށްފަ އެވެ.
އާއްމު މަޖިލީހަށް ހުށަހަޅާފައިވާ ގަރާރަކީ ގާނޫނީ ގޮތުން އަމަލު ކުރުން މަޖުބޫރު ގަރާރެއް ނޫނެވެ. ނަމަވެސް ގަރާރު ފާސްވުމުން ރަޝިއާއަށް ކުރިމަތިވެފައިވާ ފިއްތުން އިތުރުވާނެ އެވެ.
ރަޝިއާއިން ޔޫކްރެއިނަށް އަރައި ދެމުންދާ ހަމަލާތަކާ ގުޅިގެން ރަޝިއާއިން ބުނެފައިވަނީ އެއީ އދ. ގެ ޗާޓަރުގެ 51 ވަނަ މާއްދާގައި ބުނާ "އަމިއްލަ ދިފާއު"ގެ ދަށުން ހިންގާ އޮޕަރޭޝަނެއް ކަމަށެވެ.
ނަމަވެސް ހުޅަނގުގެ ގައުމުތަކުން އެ ވާހަކަ ދޮގުކުރުމަށް ބުނީ އދ. ގެ ޗާޓަރުގެ ދެ ވަނަ މާއްދާއާ ރަޝިއާއިން ހިލާފުވެފައިވާ ކަމަށެވެ. އެ މާއްދާގައި ބުނެފައި ވަނީ މައްސަލައެއް ހައްލު ކުރަން ބިރުދެއްކުމާއި ބާރުގެ ބޭނުންކޮށްގެން ނުވާނެ ކަމަށެވެ.
ޔޫކްރެއިނާ ގުޅިގެން ޔޫރަޕްގެ ގައުމުތަކުން ގަރާރުގެ ލިޔުން ތައްޔާރު ކުރިއިރު، އެއަށް ގިނަ އިސްލާހުތަކެއް ވެސް ގެނެސްފައިވެ އެވެ. އެގޮތުން ރަޝިއާގެ އަމަލު "ކުށްވެރި" ކުރުމުގެ ބަދަލުގައި "އެންމެ ހަރުކަށި އިބާރާތުން ހިތްހަމަނުޖެހުން" ފާޅުކުރާ ކަމަށް ބަދަލުކޮށްފައިވެ އެވެ.
އޭގެ އިތުރުން ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނައުން އދ. އިން "ކުށްވެރި ކުރާ" ކަމަށް ގަރާރުގައި ހިމަނާފައިވެ އެވެ. ގަރާރުގައި ގޮވާލަނީ ރަޝިއާގެ ސިފައިން ވަގުތުން ޔޫކްރެއިނުން ފައިބާ ސުލްހައަށް މަސައްކަތް ކުރުމަށެވެ.
