ސްޓެލްކޯގެ މެނޭޖިން ޑިރެކްޓަރު ކަމުގެ މަގާމުން ހަސަން މުގުނީ ވަކިކުރުމަށްފަހު، އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރަކަށް ބަދަލުކޮށްފި އެވެ.
ސްޓެލްކޯގެ އެމްޑީ މަގާމުން މުގުނީ ވަކިކޮށް އެ މަގާމަށް އަައްޔަން ކުރީ އިލެކްޝަން ކޮމިޝަންގެ ކުރީގެ ރައީސް އަހްމަދު ޝަރީފެވެ.
މުގުނީ ބަދަލުކުރެއްވީ ކުރިން ހުންނެވި މަގާމަށް ވުރެ ދަށް މަގާމަކަށެވެ. ސަރުކާރު ކުންފުނިތަކުގެ މެނޭޖިން ޑިރެކްޓަރު ކަމުގެ މަގާމުގައި ތިބޭ މީހުންގެ މުސާރަ ލައްކައަކާ ގާތްކުރެ އެވެ. ނަމަވެސް ސްޓޭޓް މިނިސްޓަރެއްގެ މުސާރަ އަކީ 32،000 ރުފިޔާ އެވެ. އެލެވެންސްގެ ގޮތުގައި 15،000 ޖެހޭއިރު، އެންމެ ގިނަވެގެން ވެސް ބައި ލައްކަ ރުފިޔާއަށް ވުރެ ގިނައިން ނުލިބެ އެވެ.
މުގުނީއާއެކު އެންވަޔަރްމެންޓް މިނިސްޓްރީގައި މިހާރު ހަ ސްޓޭޓް މިނިސްޓަރުން ތިއްބަވާނެ އެވެ.
މަގާމުން ވަކިކުރުމާ އެކު މުގުނީ ކުރެއްވި ޓްވީޓުގައި ވަނީ ސްޓެލްކޯގައި ހިދުމަތް ކުރުމުގެ ފުރުސަތު ދެއްވީތީ ރައީސް އިބްރާހިމް މުހައްމަދު ސޯލިހަށާއި އޭނާ ނިސްބަތްވެވަޑައިގަންނަވާ ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ޝުކުރު އަދާކުރައްވައިފަ އެވެ.
އޭނާ ވިދާޅުވީ ސްޓެލްކޯގައި މަސައްކަތްކޮށް، ކުންފުނި ހިންގުމުގައި ހޭދަކުރި ދުވަސްތަކުގައި ސްޓެލްކޯއަކީ ރާއްޖޭގެ އެއްވަނަ ކުންފުންޏަށް ވެގެން ގޮސްފައިވާތީ އެކަމާ ފަހުރުވެރިވާ ކަމަށެވެ.
މުގުނީގެ ވަނީ މެލޭޝިއާގެ ހެލްޕް ޔުނިވަސިޓީން ބެޗެލަ އޮފް ސައިންސް ހާސިލްކުރައްވާ، އެމެރިކާގެ ބްރޭންޑައިސް އިންޓަނޭޝަނަލް ބިޒްނަސް ސްކޫލުން މާސްޓަ އޮފް ބިޒްނަސް އެޑްމިނިސްޓްރޭޝަން ފުރިހަމަކުރައްވާފަ އެވެ.
