ނިއު ދިއްލީ، އިންޑިއާ (މާޗް 1) - ޔޫކްރެއިންގައި ތާށިވެފައި ހުރި އިންޑިއާގެ ދަރިވަރަކު އަންގާރަ ދުވަހުގެ ހަމަލާތަކުގައި މަރުވެފައިވާ ކަމަށް އިންޑިއާއިން ބުނެފި އެވެ.
އިންޑިއާ ފޮރިން މިނިސްޓްރީގެ ތަރުޖަމާނު އަރިންދަމް ބަގްޗީގެ ޓްވީޓެއްގައި ވިދާޅުވީ އަންގާރަ ދުވަހުގެ ހެނދުނު ރަޝިއާއިން ހަރްކީވްއަށް ދިން ހަމަލާތަކުގައި އިންޑިއާގެ ދަރިވަރަކު މަރުވެފައިވާ ކަމަށެވެ.
އިންޑިއާގެ ނޫސްތަކުން ބުނީ މަރުވީ އުމުރުން 21 އަހަރުގެ ނަވީން ޝެހަރައްޕަ ގްޔަނަގޫޑަރް ކަމަށެވެ. ކަރްނާޓަކާއަށް ނިސްބަތްވާ އެ ޒުވާނާ ޔޫކްރެއިންގައި އުޅުނީ ސިއްހީ ދާއިރާއިން މަތީ ތައުލީމް ހާސިލް ކުރުމަށެވެ.
ނަވީން ޝެހަރައްޕަ ގްޔަނަގޫޑަރް
އިންޑިއާގެ ރައްޔިތުން ރައްކާތެރިކަމާ އެކު އެނބުރި ގައުމަށް އާދެވޭނެ ގޮތް ފަހިކޮށްދިނުމަށް ރަޝިއާ އާޢި ޔޫކްރެއިންގެ ސަފީރުންނަށް ތަކުރާރުކޮށް ގޮވާލާ ކަމަށް އިންޑިއާއިން ބުންޏެވެ.
މިދިޔަ ބުރާސްފަތި ދުވަހު ރަޝިއާއިން ޔޫކްރެއިނަށް ދޭން ފެށި ހަމަލާތަކުގައި ހިފަން މަސައްކަތް ކުރާ އެއް ތަނަކީ ދެ ވަނައަށް އެންމެ ބޮޑު ސިޓީ ހަރްކީވް އެވެ.
އެގޮތުން އަންގާރަ ދުވަހު އެ ސިޓީއަށް ދިން ހަމަލާތައް ވަރުގަދަކޮށް، ސިޓީގެ މެދުގައި އޮންނަ މައިދާނަށް ބޮޑެތި ގެއްލުންތަކެއް ލިބުނެވެ.
ހަނގުރާމަ ފެށުމުގެ ކުރިން 20،000 އެއްހާ އިންޑިއާ ރައްޔިތުން ޔޫކްރެއިންގައި ތިއްބެވެ. އޭގެ ތެރެއިން 8،000 މީހުން ވަނީ އަނބުރާ ގައުމަށް ގޮސްފަ އެވެ. ސަރުކާރުގެ އެހީގައި 1،400 މީހުން ވެސް ގެންދިޔަ އެވެ.
އިންޑިއާގެ ނޫސްތަކުން ބުނާ ގޮތުގައި ޔޫކްރެއިންގެ ބޯޑަރު ހުރަސްކޮށް ކައިރި ގައުމުތަކަށް އެތެރެވާން ބައެއް ދަރިވަރުންނަށް ވަނީ ހުރަސްތަކާ ކުރިމަތިވެފަ އެވެ. އެގޮތުން ޔޫކްރެއިންގެ ބޯޑަރު ގާޑުން ފައިސާއަށް ޑިމާންޑު ކުރާ ކަމަށް ނޫސްތަކުން ބުންޏެވެ.
