ރައްޔިތުންގެ މަޖިލީހަށް ހުށަހަޅައި ބަހުސްކުރަން ފަށާފައިވާ މާލީ އަދި އެހެނިހެން މަސްލަހަތުތައް ހާމަކުރުމުގެ ބިލު އޮތީ ސަރުކާރަކުން ބޭނުން ވެއްޖެނަމަ ރައްޔިތުންގެ މަޖިލީހުގެ މެމްބަރުންތަކެއްގެ ގޮނޑި ގެއްލުވައިލެވޭ ގޮތަށް ކަމަށް މަޖިލީހުގެ ކެންދޫ ދާއިރާގެ ޖޭޕީ މެމްބަރު އަލީ ހުސައިން މިއަދު ވިދާޅުވެއްޖެ އެވެ.
މާލީ ބަޔާން ހާމަކުރަން، ގާނޫނުއަސާސީ އާއި ގާނޫނުތަކުން ލާޒިމްކުރާ ފަރާތްތަކުން، އެ ބަޔާން ހާމަކުރުމުގައި ދޮގު ހައިދިފި ނަމަ 500،000ރ. ގެ ޖޫރިމަނާއަކާއި އެކު ވަޒީފާއިން ވަކިކޮށް ޖަލު ހުކުމެއް އަންނަ ގޮތަށް ގާނޫނެއް ހަދަން މަޖިލީހަށް ބިލެއް ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެމްބަރު އަދި މަޖިލީހުގެ ނައިބު ރައީސް އީވާ އަބްދުﷲ އެވެ. މަޖިލީހުގެ މިއަދުގެ ޖަލްސާގައި އެބިލަށް ކުރި ބަހުސްގައި އެމްޑީޕީގެ ބައެެއް މެމްބަރުންގެ ވެސް ކަންބޮޑުވުންތައް ހުއްޓެވެ.
ޖުމްލަ ގޮތެއްގައި އެ ބިލުގެ މަފްހޫމަށް ތާއީދު ކުރެއްވި ނަމަވެސް, އަލީ ހުސައިން ވިދާޅުވީ އެ ބިލުގައިވާ ބައެއް ބައިތައް ހުރީ ސަރުކާރުތަކަށް ދޭން ނުވާ ވަރުގެ ބޮޑެތި ބާރުތައް ލިބޭ ގޮތަށް ކަމަށާއި އެއީ ކަންބޮޑުވެވަޑައިގަންނަވާ ކަމެއް ކަމަށެވެ. ކޮންމެ ސަރުކާރަކީ ރައްޔިތުންގެ ހައްގުތަކަށާއި މިނިވަންކަމަށްޓަކައި މަސައްކަތްކުރާނެ ސަރުކާރެއް ކަމަށް ބަލާކަށް ނުވާނެ ކަމަށް ވެސް އޭނާ ވިދާޅުވި އެވެ.
ސަރުކާރަށް އެކަށީގެން ނުވާ ބާރުލިބޭ އެއް މާއްދާއަކީ އޭނާ ވިދާޅުވި ގޮތުގައި މާލީ ބަޔާންތައް ހުށަހަޅާ އިރު މައުލޫމާތު ފުރިހަަމަ ނުވެ އޮތުމުން އަޅާ ފިޔަވަޅެއްގެ ގޮތުގައި މަގާމުން ވަކިކުރެވޭ ގޮޮތަށް އޮތް މާއްދާ އެކެވެ.
"މީގައި ވަރަށް އެހެން ކަހަލަ ހާލަތެއް އެބަ އޮވޭ. ހުށަހަޅަން ޖެހޭ މައުލޫމާތު ހުށަނާޅައިފި ކަމަށް ވާނަމަ އިނގޭތޯ، މީގައި މިއޮންނަނީ ގާނޫނުގެ ދަށުން ހުށަހަަޅާ ބަޔާނެއްގައި ތެދުނޫން މައުލޫމާތެއް ހިމަނައިފި ނަމަ ނުވަތަ މައުލޫމާތު ފުރިހަމައަށް ހިމަނާފައި ނުވާ ނަމަ [ފިޔަވަޅު އަޅަން]، އިއްޒަތްތެރި ރައީސް މި ނުރައްކާވީ،" އަލީ ވިދާޅުވި އެވެ.
އޭނާ ވިިދާޅުވީ އެއީ ސަރުކާރަކަށް ދޭން ނުވާ ވަރުގެ ބާރެއް ކަމަށެވެ. އޭގެ މާނައަކީ އެއީ ވަރަށް ފުޅާ ދާއިރާއެއްގައި މާނަކުރެވިދާނެ ކަމަކަށް ވާތީ ސަރުކާރުން ބޭނުންވާ ނަތީޖާއެއް ނެރެވޭނެ ހާލަތެއް އެ މާއްދާގެ ސަަބަބުން އުފެދޭނެ ކަމެވެ. އަލީ ސިފަކުރެއްވި ގޮތުގައި އެއީ ގާނޫނު ތަންފީޒުކުރާ ފަރާތުގެ ހައިސިއްޔަތުން ސަރުކާރަށް "ދޭން ނުވާ ވަރުގެ ބޮޑު ލަޓިބުރިއެއް" ދިނުމެވެ.
އޭރުން ރައްޔިތުންގެ މަޖިލީހުގެ މެމްބަރަކު، ހަމަ ހިމަނަން ޖެހޭ އެއްޗެއް ހިމަނާފައި ނެތީއޭ ކިޔާފައި ރައްޔިތުންގެ މަޖިލީހުގެ މެމްބަރުން ހަމަ ރޯއިން އެއްކޮޅަށް، ބާރަ ވަރަކަށް މެމްބަރުން، ވިހިވަރަކަށް މެމްބަރުން، އެއިރެއްގައި އިދިކޮޅަށް ތިބިއްޔާ ތިބިހާ މެމްބަރުން ވަކިކުރުމަކީ، ދުއްވައިލުމަކީ ހަމަ ހިނގައިފާނެ ކަމެއް، ހިނގާނެ ކަމެއް. މިހައިތަނަށް ހިނގައިފައި އޮތް ކަންތައްތައް މިއީ އިނގޭތޯ،" އަލީ ހުސައިން ވިދާޅުވި އެވެ.
އޭނާ ވިދާޅުވީ މިހާރު އޮތް ސަރުކާރަށް ވެސް އަދި ފަހުން އަންނާނެ ސަރުކާރުތަކަށް ވެސް އެވަރުގެ ބާރުތަކެއް ދޭން އޭނާ ތާއީދު ނުކުރައްވާ ކަމަށެވެ.
ބޮޑެތި އަދަދުން ޖޫރިމަނާކޮށް އަދަބުދެވޭ ކަންތައްތައް
- މާލީ ބަޔާނުގައި ތެދުނޫން މައުލޫމާތެއް ހިމެނުން ނުވަތަ ފުރިހަމައަށް މައުލޫތު ނުހިމެނުން: އެގޮތަށް ކަންތައް ކުރާ ފަރާތްތައް ގިނަވެގެން 500،000ރ. އިން ޖޫރިމަނާ ކުރެވޭނެ އެވެ. ޖޫރިމަނާކުރުމުގައި ބަލާނީ ކަމުގެ ކުޑަބޮޑުމިނަށެވެ. އަދި ގިނަވެގެން ދެ އަހަރު ދުވަހަށް ޖަލަށް ލެވޭނެ އެވެ.
- ގާނޫނުގައި ބަޔާންކުރާ މުއްދަތުގެ ތެރޭގައި މާލީ ބަޔާން ހުށަނޭޅުން. އެގޮތަށް އަމަލުކޮށްފި ނަމަ ފުރަތަމަ ފަހަރު 100،000.ރ އިން ޖޫރިމަނާ ކުރެވޭނެ އެވެ. އަދި އެކަން ތަކުރާރުކުރާ ނަމަ ގިނަވެގެން 500،000.ރ އާ ހަަމައަށް ޖޫރިމަނާގެ އަދަދު ބޮޑު ކުރެވޭނެ އެވެ.އަދި ގިނަވެގެން ދެ އަހަރު ދުވަހަށް ޖަލަށް ލެވޭނެ އެވެ.
- ބަޔާންތަކުގެ ސައްހަކަން ކަށަވަރުކުރާ އިދާރާއިން އަންގާ އެންގުމަކާ ހިލާފުވުން: އެގޮތަށް ކަންތައް ކޮށްފި ނަމަ ފުރަތަމަ ފަހަރު 100،000ރ. އިން ޖޫރިމަނާކުރެވޭނެ އެވެ. އަދި އެކަން ތަކުރާރުކުރާ ނަމަ ގިނަވެގެން 500،000ރ. އިން ޖޫރިމަނާ ކުރެވޭނެ އެވެ. އަދި ގިނަވެގެން ދެ އަހަރު ދުވަހަށް ޖަލަށް ލެވޭނެ އެވެ.
