ބެއިޖިން، ޗައިނާ (ފެބްރުއަރީ 28) - ރަޝިއާ އާއި ޔޫކްރެއިންގެ އޮފިޝަލުން މަޝްވަރާ ކުރަން ބެލަރޫސްއަށް ޖަމާވުމާ އެކު ހާލަތު އިތުރަށް ގޯސްވިޔަ ނުދީ ކޮންޓްރޯލް ކުރަން ޗައިނާއިން ގޮވާލައިފި އެވެ.
ރަޝިއާ ސިފައިން ޔޫކްރެއިނަށް އަރައި ހަމަލާ ދޭން ފެށީ މިދިޔަ ބުރާސްފަތި ދުވަހު އެވެ. އާދީއްތަ ދުވަހު ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނެސްފައިވާ އިރު، އެ ގައުމުގެ އިސްނެގުމަށް މަޝްވަރާ ފަށަން ވަނީ ތައްޔާރުވެފަ އެވެ.
ޔޫކްރެއިނާއި ރަޝިއާގެ މަންދޫބުން ބައްދަލުކުރަން ހަމަޖެހިފައި ވަނީ ޔޫކްރެއިނާ ބެލަރޫސް ގުޅޭ ބޯޑަރު ސަރަހައްދުންނެވެ.
ޗައިނާ ފޮރިން މިނިސްޓްރީގެ ޖަރުޖަމާނު ވާންގް ވެންބިން ހޯމަ ދުވަހު ވިދާޅުވީ ހަމަޖެހުން ގެނެސް، ހާލަތު ގޯސްވިޔަ ނުދޭން ޗައިނާއިން ބާރު އަޅާ ކަމަށެވެ.
"ޔޫކްރެއިންގެ ހާލަތަށް އަންނަމުންދާ ބަދަލު މި ދަނީ ވަރަށް ކައިރިން ބަލަމުން. ހަމަނުޖެހުން ކުޑަކޮށް، ސިޔާސީ ހައްލެއް ހޯދަން ކުރާ ހުރިހާ މަސައްކަތަކަށް ޗައިނާގެ ފުރިހަމަ ތާއީދު އެބަ އޮތް."
ހުޅަނގުގެ ގައުމުތަކުން ރަޝިއާއާ ދެކޮޅަށް ދަތިކުރުމުގެ ފިޔަވަޅު އަޅާފައި ވާތީ ޗައިނާއިން ބުނީ "އެކަމަށް ތާއީދު ނުކުރާ" ކަމަށެވެ. ޗައިނާއިން މެދުކެނޑުމެއް ނެތި ވިޔަފާރީގެ މުއާމަލާތްތައް ރަޝިއާއާ އެކު ކުރާނެ ކަމަށް ވެސް ބުންޏެވެ.
