ރަޝިއާގެ ސިފައިން ޔޫކްރެއިނަށް އަރައި ހަމަލާ ދޭން ފެށީ މީގެ ފަސް ދުވަސް ކުރިންނެވެ. އާދީއްތަ ދުވަހާ ހަމައަށް އައި އިރު، މަޝްވަރާގެ ވާހަކަ ދެކެވެން ފެށި އެވެ. އެހެންކަމުން ގައުމުތަކަށް ސިހުން ލިބުނީ ރަޝިއާގެ ރައީސް ލެޑިމިއަ ޕުޓިން ނިޔުކްލިއާ ހަތިޔާރުގެ ވާހަކަ ވިދާޅުވުމުންނެވެ.
ޓީވީ މެދުވެރިކޮށް އާދީއްތަ ދުވަހުދެއްވި ހިތާބެއްގައި ޕުޓިން ވިދާޅުވީ ރަޝިއާގެ ނިޔުކްލއާ "ޑެޓެރެންޓް ފައުޖު" އެންމެ މަތީ އެލާޓަށް ގެނެސް، ތައްޔާރީ ހާލަތުގައި ތިބި ކަމަށެވެ. އެއާ އެކު އެމެރިކާ އާއި ނޭޓޯ ހިމެނޭ ގޮތަށް ހުޅަނގުގެ ބާރުތަކުން ނުރުހުން ފާޅުކުރި އެވެ.
ޕުޓިންގެ ނިންމެވުމުން ދައްކުވައިދެނީ ހަނގުރާމަ މަޑުޖެހެން އަދިވެސް ގާތް ނުވާ ކަމެވެ. އަދި އެއީ "ސައިކޮލޮޖިކަލް ހަނގުރާމައެއް" ހިންގުމުގެ ނިޔަތުގައި ޕުޓިން ދެއްވި ނުރައްކާތެރި އިންޒާރެއްގެ ގޮތުގައި އެނެލިސްޓުން ސިފަކުރެ އެވެ.
ރަޝިއާގެ ނިޔުކްލިއާ ފައުޖު ތައްޔާރީ ހާލަތަށް ގެނައުމުން އދ. އިން ބުނީ ނިޔުކްލިއާ ހަތިޔާރު ބޭނުން ކުރުމުގެ ވިސްނުމަކީ "ސިކުނޑިއަށް ގެނެވޭ ވަރުގެ ކަމެއް ނޫން" ކަމަށެވެ. އަދި ޔޫކްރެއިންގެ ސަރުކާރުން ބުނީ އެއީ މަޝްވަރާއާ ދިމާކޮށް ދިން އިންޒާރެއް ކަމަށެވެ.
"ނޭޓޯ ގޮތަށް ރަޝިއާގެ ނިޔުކްލިއާ ހަތިޔާރުގެ ބައެއް ވެސް ހުންނަނީ އަބަދުވެސް ތައްޔާރީ ހާލަތުގައި. ބޭނުން ޖެހިއްޖެ ނަމަ އެންމެ 10 މިނެޓުގެ ތެރޭގައި ލޯންޗު ކުރެވޭނެ،" ޖެނީވާ ސެންޓާ ފޯ ސެކިއުރިޓީ ޕޮލިސީގެ ނިޔުކްލިއާ ހަތިޔާރު މަދު ކުރުމާ ބެހޭ ތަޖުރިބާކާރު މާކް ފިނޯޑް ވިދާޅުވި އެވެ.
އޭނާ ލަފާ ކުރައްވާ ގޮތުގައި ރަޝިއާގެ ނިޔުކްލިއާ ހަތިޔާރުތައް މިހާރު ވާނީ މިސައިލްގައި ހަރުކޮށްފަ އެވެ. އަދި ނިޔުކްލިއާ ބޮންތައް ވާނީ ހަނގުރާމަ މަތީ ޖެޓުތަކާއި ސަބްމެރީންތަކަށް ބަރުކޮށްފަ އެވެ.
ބުލެޓިން އޮފް ދަ އެޓޮމިކް ސައިންޓިސްޓްސްގައި މިދިޔަ ހުކުރު ދުވަހު ޝާއިއުކުރި ލިޔުމެއްގައި ތަޖުރިބާކާރުން ހާންސް ކްރިސްޓެންސެން އަދި މެޓް ކޯޑާ ވިދާޅުވީ ރަޝިއާއިން އަބަދުވެސް ތައްޔާރީ ހާލަތުގައު 1،600 ނިޔުކްލިއާ ހަތިޔާރު ބަހައްޓާ ކަމަށެވެ.
"ރަޝިއާގެ ސްޓްރެޓެޖިކް ފައުޖު އަބަދުވެސް އޮންނަީ ތައްޔާރަށް. އެހެންވީމާ ސުވާލަކީ އިތުރު ސަބްމެރީނާއި ބޮން އަޅާ އުޅަނދުތައް ޕުޓިން ނެރުއްވީތޯ،" އާދީއްތަ ދުވަހު ކުރެއްވި ޓްވީޓެއްގައި ކްރިސްޓެންސެން ވިދާޅުވި އެވެ.
އެލާޓް މަތިކޮށް އާއްމުކޮށް އިއުލާން ކުރީ ކީއްވެ؟
އެނެލިސްޓުން ބުނާ ގޮތުގައި ނިޔުކްލިއާ ހަތިޔާރުގެ މައުޝޫއު ޕުޓިން ނެންގެވީ ޔޫކްރެއިންގައި ރަޝިއާގެ ފައުޖަށް ލިބެމުންދާ ނާކާމިޔާބީއާ ގުޅިގެން، "ސައިކޮލޮޖިކަލް ހަނގުރާމައެއް" ހިންގުމުގެ ބޭނުމުގަ އެވެ. މަގްސަދަކީ ބިރު ދެއްކުމާއި، ބައިބައިވުން އުފެއްދުމެވެ.
"ރަޝިއާއިން އޮތީ ފޫހިވެފައި ޔޫކްރެއިނުން ދިފާއުގައި ހަނގުރާމަ ކުރާތީ،" ޕެރިހުގައި ހުންނަ ޖޯން ޖޯސް ފައުންޑޭޝަން ތިންކް ޓޭންކުގެ ޑޭވިޑް ހަލްފާ ވިދާޅުވި އެވެ.
"ކުރިން ހީކުރި ގޮތަށް ފަސޭހަކަމާ އެކު ކާމިޔާބު ހޯދައި ބިމުގެ ބޮޑު ހިސާބުތަކެއް ލިބެމުން ނުދޭ. އޭގެ ބަދަލުގައި ރަޝިއާއަށް ކުރިމަތިވީ ޒަމާނީ ގެރިއްލާ ހަނގުރާމަވެރިންނާ. ބެލެވެނީ ގިނަ އަދަދެއްގެ ރަޝިއާ ސިފައިން މަރުވެއްޖެ ކަމަށް."
ވޮޝިންޓަންގައި ހުންނަ ސެންޓާ ފޯ ސްޓްރެޓެޖިކް އެންޑް އިންޓަނޭޝަނަލް ސްޓަޑީޒްގެ އެލިއޮޓް އޭ ކޯހެން ވިދާޅުވީ ރަޝިއާގެ އަސްކަރީ ވެރިން އުއްމީދު ކުރެއްވީ މިއަށް ވުރެ ފަސޭހަކޮށް ކުރިއަށް ދިޔުމަށް ކަމަށެވެ.
"ހަނގުރާމަ ފެށިތާ ހަތަރު ދުވަސް ފާއިތުވި އިރު، ވައިގެ ސަރަހައްދުން ކުރި ނުލިބުމަކީ ހާލަތު ވަރަށް ބޮޑަށް ސާފުވާ ކަމެއް. ހަނގުރާމައިގެ މައިދާނުން ބަލިކަށިވާ މަންޒަރު ފެންނަން ފަށައިފި. ސިޓީއެއް ނުހިފޭ އަދި ސިޓީއަކަށް ވަދެ ބާރު ނުދެމެހެއްޓޭ."
ހުޅަނގުން އަޅާފައިވާ ދަތިކުރުމުގެ ފިޔަވަޅުތަކާއި ޔޫކްރެއިނަށް ދޭ އެހީއާ މެދު ރަޝިއާ ޔަގީނުން ވެސް ހިތްހަމައެއް ނުޖެހޭނެ އެވެ. އެހެންވީމަ ނިޔުކްލިއާ ހަތިޔާރާ ގުޅޭ އިއުލާނެއް އާއްމުކޮށް ކުރުމުގެ ބޭނުމަކީ ބައިބައިވުން އުފެއްދުމެވެ.
އެގޮތުން ގައުމުތަކުގެ މެދުގައި ބައިބައިވުން އުފެއްދުމުގެ އިތުރުން ގައުމުތަކުގެ ސަރުކާރާއި ރައްޔިތުންނާ ދެމެދު "ނިޔުކްލިއާ ބިރުވެރިކަމުގެ ބޭނުން ހިފައި" ފާރެއް ބިނާކުރުމަކީ ޕުޓިންގެ ވިސްނުން ހުރި ގޮތް ކަމަށް އެނެލިސްޓުން ގަބޫލުކުރެ އެވެ.
ރަޝިއާއިން ނިޔުކްލިއާއާ މެދު ގެންގުޅޭ ވިސްނުން އެފުށް މިފުށަށް؟
ޕުޓިންގެ ނިޔުކްލިއާ އިންޒާރާ މެދު ސުވާލު އުފެދެނީ އެއީ ރަޝިއާއިން ގެންގުޅޭ ޒަމާންވީ ވިސްނުމާ މުޅިން ހިލާފު ނިންމުމަކަށް ވާތީ އެވެ.
ވިހިވިހި ވަނަ އަހަރު ޕުޓިން ވަނީ ރަޝިއާއަށް ނިޔުކްލިއާ ހަތިޔާރު ބޭނުން ކުރެވޭނެ "އުސޫލުތައް" ކަނޑައަޅާފަ އެވެ. އެގޮތުން ހިމެނެނީ ހަތަރު ހާލަތެކެވެ. ނަމަވެސް މިހާރު ކުރިއަށްދާ ހަނގުރާމައިގައި އެތަނުން އެއްވެސް ކަމެއް ނުހިނގަ އެވެ.
titledesc
އޭގެ އިތުރުން ރަޝިއާއިން މިދިޔަ ޖެނުއަރީ މަހު އދ. ގެ ސަލާމަތީ މަޖިލީހުގެ ދާއިމީ ފަސް މެމްބަރުންނާ އެކު ސޮއކުރި ލިޔުމެއްގައި ބުނީ "ނިޔުކްލިއާ ހަނގުރާމައަކީ މޮޅުވެވޭނެ ހަނގުރާމައެއް ނޫން ކަމަށާއި، އެފަދަ ހަނގުރާމައަކަށް ދުވަހަކުވެސް ގޮސްގެން ނުވާނެ" ކަމަށެވެ.
އެކަމަކު އެ ލިޔުން ސީރިއަސްކޮށް ނަގައި، ގައުމުތަކުން ނިޔުކްލިއާ ހަތިޔާރު މަދު ކުރުމުގެ ބޮޑު މަސައްކަތެއް ފެށި މަންޒަރެއް ނުފެނެ އެވެ.
އެހެންކަމުން، މި ވަގުތު ދުނިޔޭގެ ހާލަތު އޮތް ގޮތުން ނިޔުކްލިއާ ހަތިޔާރު ގެންގުޅޭ ގައުމެއްގެ ލީޑަރަކަށް "އޮޅިގެން ނުވަތަ ނުބައި މާނައެއް ދޭހަވެގެން ނުވަތަ ގަސްދުގައި އޮޅުވާލައިގެން" ނިޔުކްލިއާ ހަމަލާތަކެއް ބަދަލު ކުރުމުގެ ނުރައްކާ ވަރަށް ބޮޑު ކަމަށް އެނެލިސްޓުން ދެކެ އެވެ.
