މިދިޔަ ބުރާސްފަތި ދުވަހު ރަޝިއާގެ ސިފައިން ޔޫކްރެއިނަށް އަރައި ހަމަލާ ދޭން ފެށުމުން ރަޝިއާއާ ދެކޮޅަށް އިއުލާނު ކުރި އެންމެ ފުރަތަމަ އެއް ފިޔަވަޅަކީ ވައިގެ ސަރަހައްދަށް ވަނުން މަނާކުރުމެވެ. އެގޮތުން ޔޫރަޕްގެ ގިނަ ގައުމުތަކުން ވަނީ އެ ފިޔަވަޅު އަޅަން ފަށާފަ އެވެ.
ހުކުރު ދުވަހު އިނގިރޭސިވިލާތުން ބުނި ގޮތުގައި ރަޝިއާގެ ޕްރައިވެޓް ޖެޓުތައް ހިމެނޭ ގޮތަށް އެއްވެސް ފްލައިޓެއް އެ ވަގުތުން ފެށިގެން އިނގިރޭސި ވައިގެ ސަރަހައްދަށް ވަނުން މަނާވާނެ އެވެ.
ޗެކް ރިޕަބްލިކް، ޕޮލޭންޑް އަދި ބަލްގޭރިއާއިން ބުނީ ހޮނިހިރު ދުވަހުން ފެށިގެން ރަޝިއާގެ އެއްވެސް ވައިގެ އުޅަނދަކަށް އެ ގައުމުތަކުގެ ވައިގެ ސަރަހައްދަށް އެތެރެ ނުވެވޭނެ ކަމަށެވެ.
އޭގެ އިތުރުން އެސްޓޯނިއާ، ލެޓްވިއާ، ލިތުއޭނިއާ، ސްލޮވީނިއާ އަދި ރޮމޭނިއާއިން ވެސް ހަމަ އެ ދުވަހު އެ ފިޔަވަޅު އިއުލާނު ކުރި އެވެ.
"އަނިޔާވެރިވާ ދައުލަތެއްގެ ފްލައިޓްތަކަށް ޑިމޮކްރެޓިކް ވައިގެ ސަރަހައްދަކުން ޖާގައެއް ނުލިބޭނެ،" އެސްޓޯނިއާގެ ބޮޑު ވަޒީރު ކާޖާ ކަލާސް ކުރެއްވި ޓްވީޓުގައި ވިދާޅުވި އެވެ.
އާދީއްތަ ދުވަހު އޮސްޓްރިއާއިން ބުނީ އެ ގައުމުގެ ވައިގެ ސަރަހައްދާއި އެއާޕޯޓުގެ ބިންތައް ރަޝިއާގެ ފްލައިޓްތައް ބޭނުން ކުރުން މަނާކޮށްފައިވާ ކަމަށެވެ.
"ޔޫކްރެއިނަށް އަރައިގެން ކުރަމުންދާ ހަނގުރާމަ ބަލައިނުގަންނަކަން ލެޑިމިއަ ޕުޓިންއަށް އަންގައި ދިނުމަށް ކުރަން ޖެހޭ ހުރިހާ ކަމެއް މި ދަނީ ކުރަމުން،" ޗާންސެލަރު ކާލް ނެހަމާގެ ޓްވީޓުގައި ވިދާޅުވި އެވެ.
އޮސްޓްރިއާގެ އިތުރުން ޖަރުމަނުވިލާތުން ވެސް ބުނީ އާދީއްތަ ދުވަހުން ފެށިގެން ތިން މަސް ވަންދެން ރަޝިއާގެ ހުރިހާ ފްލައިޓެއް މަނާ ވާނެ ކަމަށެވެ.
ފްރާންސުން ބުނީ އާދީއްތަ ދުވަހުގެ ރެއިން ފެށިގެން ރަޝިއާގެ ބޯޓުތަކަށް ވައިގެ ސަރަހައްދު ބަންދު ވާނެ ކަމަށެވެ. ބެލްޖިއަމްއިން ވެސް ބުނީ ރަޝިއާގެ ބޯޓުތަކަށް މަރުހަބާ ނުކިޔާނެ ކަމަށެވެ.
"ޔޫރަޕްގެ ވައިގެ ސަރަހައްދަކީ ހުޅުވާލެވިފައިވާ ސަރަހައްދެއް. އެކަމަކު ހުޅުވާލެވިފައި ވަނީ އެހެން މީހުންނާ ގުޅިގެން އުޅޭ ފަރާތްތަކަށް، އެހެން މީހުންނަށް އަނިޔާވެރިވާ ފަރާތްތަކަކަށް ނޫން،" ބޮޑު ވަޒީރު އެލެގްޒެންޑާ ޑެ ކްރޫ ވިދާޅުވި އެވެ.
ޔޫރަޕުގެ އެންމެ އުތުރުން ފިންލޭންޑާއި، ސްވިޑަން، ޑެންމާކް، ނޯވޭ އަދި އައިސްލޭންޑުން ވެސް ވަނީ ރަޝިއާގެ ބޯޓުތަކަށް ވައިގެ ސަރަހައްދު ބަންދުކޮށްފަ އެވެ.
އިޓަލީ، ސްޕެއިން އަދި މޯލްޓާއިން ވެސް އެގޮތަށް ނިންމީ "ޔޫކްރެއިނާ އެކު ތިބިކަން" ހާމަކުރުމަށް ކަމަށް ބުންޏެވެ. އޭގެ އިތުރުން ނޯތު މެސެޑޯނިއާއިން ވެސް އެ ފިޔަވަޅު އެޅުމުގައި ބައިވެރިވި އެވެ.
ޔޫރަޕްގެ ގައުމުތަކުން އެޅި ފިޔަވަޅަށް ރައްދު ދިނުމުގެ ގޮތުން ރަޝިއާއިން އާދީއްތަ ދުވަހު ވަނީ އެ ގައުމުގެ ވައިގެ ސަރަހައްދު އެސްޓޯނިއާ، ލެޓްވިއާ، ލިތުއޭނިއާ އަދި ސްލޮވީނިއާއަށް ބަންދުކޮށްފަ އެވެ.
އޭގެ ކުރިން ބަލްގޭރިއާ، ޕޮލޭންޑް، ޗެކް ރިޕަބްލިކް އަދި އިނގިރޭސިވިލާތުގެ ބޯޓުތަކަށް ވެސް ރަޝިއާގެ ވައިގެ ސަރަހައްދު ބަންދުކުރިކަން އިއުލާނު ކުރި އެވެ.
ރަޝިއާއާ ދެކޮޅަށް ގިނަ ގައުމުތަކުން އެ ފިޔަވަޅު އެޅުމުން، ދުނިޔޭގެ ހުޅަނގަށް ކުރަން ޖެހޭ ދަތުރުތަކަށް އެ ގައުމުގެ އެއާލައިންތަކަށް އޮތީ މަދު ރޫޓުތަކެކެވެ. އެހެންކަމުން، ފްލައިޓްތަކަށް ހޭދަވާ ވަގުތު އިތުރުވާނެ އެވެ.
މޮސްކޯގެ ޑޮމޮޑެޑޯވޯ އަދި ޝެރެމެތްޔެވޯ އެއާޕޯޓުން ގިނަ އަދަދެއްގެ ފްލައިޓްތައް އާދީއްތަ ދުވަހު ކެންސަލް ކުރަން ޖެހުނެވެ. އޭގެ ތެރޭގައި ޕެރިސް، ވިއެނާ އަދި ކެލިނިންގްރެޑްއަށް ކުރާ ޝެޑިއުލް ދަތުރުތައް ހިމެނެ އެވެ.
ރަޝިއާގެ އެސް7 އެއާލައިނުން ފޭސްބުކްގައި ކުރި ޕޯސްޓެއްގައި ބުނީ މާޗް 13 ވަނަ ދުވަހާ ހަމައަށް ޔޫރަޕްގެ މަންޒިލްތަކަށް ކުރާ ގިނަ ދަތުރުތަކެއް ކެންސަލް ކުރަން ޖެހިފައިވާ ކަމަށެވެ.
އެ ގައުމުގެ އެންމެ ބޮޑު އެއާލައިން، އެއިރޯފްލޮޓް އިން ބުނީ ލެޓްވިއާ އާއި ރޮމޭނިއާގެ ދަތުރުތައް މާޗް 26 އާ ހަމައަށް އަދި ޕްރޭގް އަދި ވޯސޯ ރޫޓުން ކުރާ ދަތުރުތައް މާޗް 28 އާ ހަމައަށް ކެންސަލް ވާނެ ކަމަށެވެ.
