ނިއު ދިއްލީ، އިންޑިއާ (ފެބްރުއަރީ 27) - ރަޝިއާއާ ދެކޮޅަށް އދ. ގެ ސަލާމަތީ މަޖިލީހުގައި ނެގި ވޯޓުގައި އިންޑިއާއިން ވަކި ކޮޅަކަށް ވޯޓު ދީފައި ނުވާތީ، އެ ގައުމުގެ "މިނިވަން އަދި ހަމަހަމަ" ވިސްނުމަށް ރަޝިއާއިން ތައުރީފުކޮށްފި އެވެ.
މިދިޔަ ބުރާސްފަތި ދުވަހުން ފެށިގެން ރަޝިއާއިން ޔޫކްރެއިނަށް އަރައި ދެމުންދާ ހަމަލާތައް ވަގުތުން ވަގުތަށް ހުއްޓާލަން ގޮވާލައި އދ. ގެ ސަލާމަތީ މަޖިލީހަށް އެމެރިކާ އާއި އަލްބޭނިއާއިން ހުށަހެޅި ގަރާރުގައި ރަޝިއާއާ ދެކޮޅަށް ވޯޓު ނުދެނީ އެންމެ ތިން ގައުމެވެ.
އެއީ އިންޑިއާ، ޗައިނާ އަދި ޔޫއޭއީއެވެ. އެކަމާ ގުޅިގެން ޔޫކްރެއިންގެ ރައީސް ވޮލޮޑިމިރް ޒެލެންސްކީ ހޮނިހިރު ދުވަހު އިންޑިއާގެ ބޮޑު ވަޒީރު ނަރެންދްރަ މޯދީއަށް ގުޅުއްވައި އދ. ގައި އިންޑިއާގެ އެހީ މުހިއްމު ކަމަށް ފާހަގަކުރައްވައި، އެ ގައުމުގެ ތާއީދަށް އެދިވަޑައިގެންނެވި އެވެ.
ނަމަވެސް ރައްދުގައި އިންޑިއާއިން ވަކި އެއްޗެއް ނުބުނެ އެވެ. އާދީއްތަ ދުވަހު އިންޑިއާގައި ހުންނަ ރަޝިއާ އެމްބަސީން ކުރި ޓްވީޓެއްގައި ވަނީ އިންޑިއާގެ ވިސްނުމަށް މަރުހަބާ ކިޔާ ކަމަށް ބުނެފަ އެވެ.
"އދ. ގެ ސަލާމަތީ މަޖިލީހުގެ ވޯޓާ ދިމާކޮށް އިންޑިއާއިން ގެންގުޅުނު މިނިވަން އަދި ހަމަހަމަ ވިސްނުން ވަރަށް ބޮޑަށް ބަލައިގަންނަން،" ޓްވީޓުގައި ބުންޏެވެ.
"ރަޝިއާ އާއި އިންޑިއާއާ ދެމެދުގައިވާ ހާއްސަ ސްޓްރެޓެޖިކް ޕާޓްނާޝިޕްގެ ދަށުން، ޔޫކްރެއިން މައްސަަލައިގައި އިންޑިއާއާ އެކު ގާތް މަޝްވަރާތައް ދަމަހައްޓަން ރަޝިއާއިން ތައްޔާރު."
އިންޑިއާއަކީ ދުނިޔޭގެ އެންމެ ބޮޑު ޑިމޮކްރަސީ އެވެ. އަދި އެއީ އޮސްޓްރޭލިއާ އާއި ޖަޕާނާއި އެމެރިކާ ހިމެނޭ "ކުއެޑް" ގްރޫޕްގެ މެމްބަރެކެވެ. ނަމަވެސް ރަޝިއާގެ އަމަލުތައް އިންޑިއާއިން މިހާތަނަށް ކުށްވެރިއެއް ނުކުރެ އެވެ.
އެހެން ގައުމެއްގެ ސިފައިން އަރައިގެން އުޅޭ ހާދިސާއެއްގެ ގޮތުގައި ސިފަކުރުމުގެ ބަދަލުގައި އިންޑިއާއިން ޔޫކްރެއިންގެ ހާލަތަށް އިޝާރާތް ކުރަނީ "ޔޫކްރެއިންގައި ހިނގަމުންދާ ކަންކަމުގެ" ގޮތުގަ އެވެ.
ހޮނިހިރު ދުވަހު އިންޑިއާގެ ފޮރިން މިނިސްޓްރީން ނެރުނު ބަޔާނެއްގައި ބުނީ އެއީ "ހަނގުރާމައިގެ ހާލަތެއް" ކަމަށާއި "ވަގުތުން ހަމަލާތައް ހުއްޓާލާ، މަޝްވަރާ ފެށުމަށް" މޯދީ ތަކުރާރުކޮށް ގޮވާލައްވާ ކަމަށެވެ.
ފިނި ހަނގުރާމައިގެ ދުވަސްވަރު އިންޑިއާ އާއި ރަޝިއާއަކީ ގާތް ދެ ގައުމެވެ. މިއަދާ ހަމައަށް ވެސް އިންޑިއާ އާއި ރަޝިއާއިން ދަމަހައްޓަނީ އެފަދަ ގުޅުމެކެވެ.
މިދިޔަ އަހަރުގެ ފަހުކޮޅު ޕުޓިން ވަނީ އިންޑިއާއަށް ވަޑައިގެންފަ އެވެ. އިންޑިއާއަށް އެންމެ ގިނައިން ހަތިޔާރު ސަޕްލައިކޮށްދޭ ގައުމަކީ ރަޝިއާ އެވެ.
ޔޫކްރެއިންގެ މައްސަލައިގައި އިންޑިއާގެ ވިސްނުން ހުރި ގޮތާ މެދު އެމެރިކާއިން ވެސް ކަންބޮޑުވެ އެވެ. ވައިޓް ހައުސްގެ ޕްރެސް ސެކެޓްރީ ޖެން ސާކީ ހުކުރު ދުވަހު ނޫސްވެރިންނަށް ވިދާޅުވީ "އިންޑިއާގެ އޮފިޝަލުންނާ އެކު މަޝްވަރާ ކުރަމުންދާ" ކަމަށެވެ.
އޭގެ އިތުރުން ސްޓޭޓް ޑިޕާޓްމަންޓުގެ ތަރުޖަމާނު ނެޑް ޕްރައިސް ވިދާޅުވީ އެމެރިކާ އާއި އިންޑިއާއާ ދެމެދު ދިފާއީ އަދި ސަލާމަތާ ބެހޭ ގުޅުމެއް ނެތް ކަމަށާއި އިންޑިއާއިން އެ ގުޅުން ބާއްވަނީ ރަޝިއާއާ އެކު ކަމަށެވެ.
"ރަޝިއާއާ އެކު ގުޅުމެއް އޮންނަ ކޮންމެ ގައުމަކުން ވެސް ސުލްހައަށް މަސައްކަތްކޮށްދޭން އަޅުގަނޑުމެން ވާނީ އެދިފައި."
