މީގެ ތިން އަހަރު ކުރިން ވޮލޮޑިމިރް ޒެލެންސްކީ އަކީ ޔޫކްރެއިންގައި މަގްބޫލް ކޮމީޑިއަން އެކެވެ. އޭރު އާއްމުންގެ ލޯބި ލިބިވަޑައިގެންނެވީ މަޖާ އެކްޓުތަކުންނެވެ. އެކަމަކު މިއަދު އެމަނިކުފާނަށް ތައުރީފު އޮހެމުން ދަނީ ދުނިޔޭގެ ގަދަ ބާރަކާ ދެކޮޅަށް ހަނގުރާމައިގެ މައިދާނުގައި ދައްކަވަމުންދާ ނަމޫނާގެ ސަބަބުންނެވެ.
ރަޝިއާގެ ވަރުގަދަ ހަމަލާތަކުގެ ކުރި މައްޗަށް ނުކުންނަން ތައްޔާރަށް ހުރިކަން މިދިޔަ ބުރާސްފަތި ދުވަހުން ފެށިގެން ޒެލެންސްކީ ހާމަކުރައްވަމުން ދަނީ ރައްޔިތުންނަށް ދޭ ހިތާބުތަކާއި ސޯޝަލް މީޑިއާގައި ޕޯސްޓު ކުރާ ސެލްފީތަކުގެ ޒަރިއްޔާއިންނެވެ.
ޔޫކްރެއިނުން ޖަރީމާ ހިންގަމުންދާ ކަމަށާއި ޖަރުމަނިވިލާތުގެ ކުރީގެ ޑިކްޓޭޓަރު އެޑޯލްފް ހިޓްލަރުގެ ނާޒީ ޕާޓީގެ ފިކުރާ އެއް ގޮތަށް ކުރިއަށްދާ ކަމަށް ރަޝިއާއިން ތުހުމަތު ކުރާ އިރު، ޒެލެންސްކީ ނިސްބަތްވެވަޑައިގަންނަވަނީ ރަޝިއާ ބަހުން ވާހަކަ ދައްކާ ޔަހޫދީ އާއިލާއަކަށެވެ.
މާ ގިނަ ބަޔެއްގެ ތާއީދު އޮތް ކަމަށް ކުރިން ނުބެލުވުނު އުމުރުން 44 އަހަރުގެ ޒެލެންސްކީ ގައުމީ ބަތަލެއްގެ ގޮތުގައި މިހާރު ޔޫކްރެއިން ރައްޔިތުން ވެސް ސިފަކުރަމުން ދަނީ ރަޝިއާގެ "އަޅުވެތިކަމަށް" ނުދިޔުމަށް ދައްކަވަމުންދާ ގަދަ ހިތްވަރުގެ ސަބަބުންނެވެ.
މިދިޔަ ބުރާސްފަތި ދުވަހުގެ ފަތިހު ރަޝިއާއިން ޔޫކްރެއިނަށް ހަމަލާ ދޭން ފެށުމުގެ ކުޑައިރުކޮޅެއް ކުރިން ޒެލެންސްކީ ދެއްވި ހިތާބުގައި ޔޫކްރެއިން ބަހާއި ރަޝިއާ ބަހުން ވާހަކަ ދައްކަވަމުން ވިދާޅުވީ ހަނގުރާމަ ނުފަށާ ވާނެ ގޮތަށް ހޯދަން ރަޝިއާގެ ރައީސް ލެޑިމިއަ ޕުޓިންއަށް ގުޅުއްވަން މަސައްކަތް ކުރި ނަމަވެސް، ޖަވާބެއް ނުދެއްވާ ކަމަށެވެ.
"މި ދެ ގައުމަށް ހަނގުރާމައެއް ބޭނުމެއް ނުވޭ. ފިނި ހަނގުރާމައެއް، ހޫނު ހަނގުރާމައެއް، ހައިބްރިޑް ހަނގުރާމައެއް ވެސް ބޭނުމެއް ނުވޭ،" ޔޫކްރެއިނުގެ ޗާޓެއްގެ ކުރިމަތީގައި ކަޅު ކުލައިގެ ސޫޓެއް ތުރު ކުރައްވައިގެން ހުންނެވި ޒެލެންސްކީ އެ ހިތާބުގައި ވިދާޅުވި އެވެ.
ޔޫކްރެއިންގެ ރައީސް ޒެލެންސްކީ.
ނަމަވެސް ރަޝިއާއިން ހަމަލާ ދޭން ފަށައިފި ނަމަ، އެންމެ ފަހު ވަގުތާ ޖެހެން ދެން ވެސް ޔޫކްރެއިންގެ ރައްޔިތުން ދިފާއުގައި ހަމަލާ ދޭނެ ކަމަށް ވިދާޅުވި އެވެ.
އޭގެ ކުޑައިރުކޮޅެއް ފަހުން ރަޝިއާގެ ހަމަލާތައް ފެށި އެވެ. ބުރާސްފަތި ދުވަހުގެ މެންދުރު ވަގުތު ޒެލެންސްކީ އަނެއްކާވެސް ގައުމާ މުހާތަބު ކުރެއްވި އެވެ. އެ ފަހަރު އެމަނިކުފާނު ހުންނެވީ ސިފައިންގެ ހެދުމުގަ އެވެ. އަނެއްކާ ވެސް އެ ދުވަހުގެ ހަވީރު ގައުމާ މުހާތަބު ކުރައްވަމުން ހުޅަނގުގެ ގައުމުތަކަށް އިންޒާރެއް ދެއްވި އެވެ.
އެގޮތުން ހުޅަނގުން ޔޫކްރެއިނަށް އެހީ ނުވާ ނަމަ، މާދަމާ "ހަނގުރާމަ ފޯރާނީ އެ މީހުންގެ ދޮރާށިތަކާ ހަމައަށް" ކަމަށް ވިދާޅުވި އެވެ.
ޔޫކްރެއިންގެ ރައީސް ޒެލެންސްކީ.
ކޮމާންޑާ އިން ޗީފް ނުވަތަ ސިފައިންގެ އެންމެ އިސްވެރިޔާގެ ގޮތުގައި ޒެލެންސްކީ ގެންދަވަނީ ޓްވިޓާގައި ވެސް ހިތްވަރު ދެއްވަމުންނެވެ. ޔޫކްރެއިންގެ ބައެއް މީހުން ޓްވިޓާގައި ބުނީ އޭޕްރިލް 2019 ވަނަ އަހަރު ޒެލެންސްކީ އިންތިހާބުވެވަޑައިގެންނެވުމުން ހިތްހަމަނުޖެހުނު ކަމަށެވެ. ނަމަވެސް ރަޝިއާއާ ދެކޮޅަށް ކުރާ ހަނގުރާމައިގައި ޒެލެންސްކީގެ ލީޑާޝިޕް ފެނި، ފުރިހަމަ ތާއީދު ކުރަން ފަށާފައިވާ ކަމަށެވެ.
ގިނަ ބަޔަކު ގަބޫލުކުރާ ގޮތުގައި ޒެލެންސްކީ ސިޔާސީ ދާއިރާއަށް ވަދެވަޑައިގެންނެވީ ވެސް ޖޯކެއްގެ ގޮތުގަ އެވެ. އެމަނިކުފާނުގެ އެންމެ މަގްބޫލު ރޯލަކީ ޓީވީ ސީރީޒް "ސާވަންޓް އޮފް ދަ ޕީޕަލް" ގައި ކުޅުއްވި މަޖާ ރޯލެކެވެ. އެއީ ސްކޫލް ޓީޗަރަކަށް ކުއްލިއަކަށް ރައީސްކަން ލިބުމުން ވާ ގޮތް ދައްކުވައިދޭ ސީރީޒެކެވެ.
ސާވަންޓް އޮފް ދަ ޕީޕަލް ސީރީޒްގެ ޕޯސްޓަރެއް.
ދެހާސް ނަވާރަ ވަނަ އަހަރުގެ ރިޔާސީ އިންތިހާބުގައި ޒެލެންސްކީގެ ކެންޑިޑެސީ އިއުލާނު ކުރެއްވުމުން އެއީ ސީރިއަސް ކަމެއްގެ ގޮތުގައި ގިނަ މީހުން ނުދެކެ އެވެ. އެމަނިކުފާނުގެ ޕާޓީގެ ނަމަކީ ވެސް ޓީވީ ސީރީޒްގެ ނަމެވެ. "ސާވަންޓް އޮފް ދަ ޕީޕަލް" ޕާޓީ އެވެ. ނަމަވެސް ވޯޓުގެ 73 ޕަސެންޓު ކާމިޔާބު ކުރައްވައި، ކޮރަޕްޝަނާ ދެކޮޅަށް މަސައްކަތްކޮށް، އިރުމަތީ ޔޫކްރެއިނަށް ސުލްހަ ގެންނަން ވައުދުވެވަޑައިގެންނެވި އެވެ.
titledesc
ކޮލޮމޮއިސްކީ އަކީ މަނީ ލޯންޑާ ކުރުމާއި މަކަރާއި ހީލަތުގެ މައްސަލަތަކުގައި އެމެރިކާއިން ތަހުގީގު ކުރަމުންދާ މީހެކެވެ. އޭނާގެ ތާއީދު ޒެލެންސްކީއަށް ލިބިވަޑައިގެންނެވުމުން، ޒެލެންސްކީ ވަނީ "ގޮނޑިކޮއްކޮ" ލީޑަރަކަށް ކަމަށް ބައެއް މީހުން ސިފަކުރި އެވެ. ނަމަވެސް އެނެލިސްޓުން ބުނާ ގޮތުގައި ހީކުރި ވަރަށް ވުރެ މިނިވަންކޮށް ޒެލެންސްކީގެ މަސައްކަތް ކުރިއަށް ގެންދެވި އެވެ.
ބިލިއަނަރު އައިހޯރް ކޮލޮމޮއިސްކީ.
އޭގެ އިތުރުން ކޮރަޕްޝަނާ ދެކޮޅަށް މާ ބައިވަރު މަސައްކަތެއް ނުކުރެވޭ އިރު، މުޅިން އާ ގާނޫނެއްގެ ދަށުން ހަމައެކަނި ބައެއް މަހުޖަނުންނަށް ފިޔަވަޅު އަޅާނެ ކަމުގެ ކަންބޮޑުވުން ވެސް އޮތެވެ. އޭގެ އިތުރުން ކުރީގެ ރައީސް ޕެޓްރޯ ޕޮރޮޝެންކޯއާ ދެކޮޅަށް ކޮރަޕްޝަންގެ ދައުވާ އުފުލީ ސިޔާސީ މަގްސަދެއްގައި ކަމަށް ހުޅަނގުގެ ބައެއް ގައުމުތަކުން ދެކެ އެވެ.
އިތުރުން އިރުމަތީ ޔޫކްރެއިންގެ މައްސަލަ ހައްލު ކުރަން ކުރެއްވި މަސައްކަތަށް ވެސް މާ ބޮޑު ކުރިއެރުމެއް ނުލިބެ އެވެ. މިންސްކް އެއްބަސްވުމުގެ ދަށުން ގައިދީން ބަދަލުކޮށް، ސުލްހައާ ދިމާލަށް ދިޔުމުގެ ބައެއް މަސައްކަތް ކުރި އެވެ. އެކަމަކު ބޭނުންވާ ވަރުގެ ކުރިއެރުމެއް ނުލިބެ އެވެ. އެހެންވެ، 2020 ވަނަ އަހަރު ޒެލެންސްކީއަށް އޮތް ތާއީދު ވަރަށް ބޮޑަށް ދަށްވި ކަމަށް ޕޯލްތަކުން ދައްކަ އެވެ.
ޒެލެންސްކީ އެންމެ ބާރަށް ދެއްކެވި ވާހަކަ އަކީ ޔޫކްރެއިނަށް އީޔޫގެ މެމްބަރުކަން ހޯދުމާއި ނޭޓޯގެ ދަށަށް ދިޔުމެވެ. މިއީ ރަޝިއާގެ ރައީސް ޕުޓިން އެންމެ ހިތްހަމަނުޖެހޭ ކަންތައް ނަމަވެސް، ތަކުރާރުކޮށް އެކަންކަން ހާސިލް ކުރަން މަސައްކަތް ކުރެއްވި އެވެ.
އެނެލިސްޓުން ދެކޭ ގޮތުގައި ޒެލެންސްކީއާ މެދު އިހްތިރާމް ބޮޑު ވާން ފެށީ މިދިޔަ ފެބްރުއަރީ 19 ވަނަ ދުވަހު އޮތް ސެކިއުރިޓީ ކޮންފެރެންސްގައި ދެއްކެވި ވާހަކަތަކުންނެވެ. އެގޮތުން މީގެ ކުރިން ދުވަހަކު ވެސް ޔޫކްރެއިންގެ ވެރިއަކު ސާފު ސީދާކޮށް، ހުޅަނގުގެ ގައުމުތަކަށް ފާޑުކިޔާފައި ނުވާކަން އެ މީހުން ފާހަގަކުރެ އެވެ.
"އަޅާ ނުލާ ތިބުމަކީ، އެކަމުގައި ބައިވެރިވުން،" ޔޫކްރެއިންއަށް ކުރިމަތިވަމުން ދިޔަ ހަނގުރާމައިގެ ބިރަށް އިޝާރާތްކޮށް ހުޅަނގުގެ އޮފިޝަލުންނާ ދިމާލަށް ޒެލެންސްކީ ވިދާޅުވި އެވެ.
ޔޫކްރެއިންގެ ރައީސް ޒެލެންކީ އާއިލާއާ އެކު.
ހުޅަނގުގެ ޖާސޫސީ މައުލޫމާތުން ބުނާ ގޮތުގައި ރަޝިއާއިން ނައްތާލަން ބޭނުންވާ މީހުންގެ ލިސްޓުގެ އެއް ވަނައިގައި އޮތީ ޒެލެންސްކީގެ ނަމެވެ. އެމަނިކުފާނު ވިދާޅުވީ ލިސްޓުގައި ދެ ވަނަ އަށް އޮތީ އެމަނިކުފާނުގެ އާއިލާގެ ނަން ކަމަށެވެ.
ދެހާސް ތިން ވަނަ އަހަރުން ފެށިގެން ޒެލެންސްކީގެ އަނބިކަނބަލުންނަކީ އޮލޭނާ ޒެލެންސްކާ އެވެ. އެ ކައިވެންޏަށް ދެ ކުދިން ލިބިފައިވެ އެވެ. އާއިލާއަށް ނުރައްކާ އޮތް ނަމަވެސް ޒެލެންސްކީ އާއި އާއިލާ ވެސް ތިބީ ޔޫކްރެއިންގައި ކަމަށް ސޯޝަލް މީޑިއާގައި އާއްމުކުރަމުންދާ ވީޑިއޯތައް މެދުވެރިކޮށް ދަނީ ވިދާޅުވަމުންނެވެ.
