ރާއްޖޭގައި ބޭއްވޭ އެންމެ ބޮޑު ފުޓްސަލް މުބާރާތް ކަމަށްވާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ރޭ ކުޅުނު މެޗުތަކުން ގދ. ވާދޫ، ކ. ގާފަރު، އއ. މަތިވެރި އަދި އއ. ބޮޑުފޮޅުދޫ އިން މޮޅުވެ ރަނގަޅު ފެށުމެއް ހޯދައިފި އެވެ.
ރެހެންދި ފުޓްސަލް ދަނޑުގައި ރޭ ކުޅުނު މެޗުތަކުގެ ނަތީޖާ އަށް ބަލާއިރު، ގދ. މަޑަވެލި އަތުން ގދ. ވާދޫ މޮޅުވީ 3-1 އިންނެވެ. ކ.ގުރައިދޫ އަތުން 3-1 އިން ގާފަރު މޮޅުވިއިރު، އއ. ރަސްދޫ އަތުން އއ. މަތިވެރި ވަނީ 4-1 އިން މޮޅުވެފަ އެވެ. އަދި އއ. ފެރިދޫ އަތުން ބޮޑުފޮޅުދޫ މޮޅުވީ 8-2 އިންނެވެ. އަދި ކ. ހުރާ އިން 2-1 އިން ކ.ތުލުސްދޫ ބަލިކުރިއިރު، ގދ. ތިނަދޫ ވަނީ 1-1 ގދ. ހޯޑެއްދޫއާ އެއްވަރުވެފަ އެވެ.
މަޑަވެލި ކޮޅަށް ވާދޫގެ މުސައްނިފު މުހައްމަދު މޮޅު ކުޅުމެއް ދައްކައި މެޗުގެ މޮޅު ކުޅުންތެރިޔާގެ މަގާމު ހޯދީ ދެ ގޯލު ޖަހައިގެންނެވެ. އެ ޓީމުގެ އަނެއް ގޯލު ޖެހީ މުހައްމަދު އިޔާދު އަލީ އެވެ. މަޑަވެލި ޓީމުގެ ހަމައެކަނި ގޯލު ޖެހީ ނަސީފް ހުސެއިން ސައީދު އެވެ.
ގޯލްޑަން ފުޓްސަލް ޗެލެންޖްގައި ކުޅޭ ހުރާ ޓީމު.
ތުލުސްދޫ ކޮޅަށް ހުރާގެ ދެ ގޯލު ޖެހީ މުހައްމަދު ތަސްމީން (ތައްތި) އާއި އަހުމަދު ނައުޝަދު އެވެ. ފުޓްބޯޅައިގެ މަޝްހޫރު ރަށެއް ކަމަށްވާ ހުރާގެ ބެންޗުގައި ރާއްޖޭގެ ފުޓްބޯޅައިގައި މަޝްހޫރު ލެޖެންޑުން ކޯޗިން ސްޓާފުންގެ ގޮތުގައި ހަރަކާތްތެރިވެ އެވެ. ތުލުސްދޫގެ ގޯލު ޖެހީ އާދަމް އަޒްމީން އެވެ.
ގާފަރުން ގުރައިދޫ ބަލިކުރިިއިރު ލަނޑުތައް ޖެހީ ސާމިން މުހައްމަދު ނަސީމް އާއި ސަނީމް ޝާމިލް އަދި ޝާފީ އުމަރު އެވެ. ގުރައިދޫގެ ހަމައެކަނި ގޯލު ޖެހީ އާލިމް އަބްދުލް ގައްޔޫމް އެވެ. މެޗުގެ މޮޅު ކުޅުންތެރިއަކީ ގާފަރުގެ ސާމިން އެވެ.
މަތިވެރި ޓީމުގެ މުހައްމަދު އިމްރާން ދެ ގޯލު ޖެހިއިރު، އިސްމާއިލް ނަސީމް އާއި އާދަމް އިމްރާން ވެސް ވަނީ ގޯލެއް ޖަހައިފަ އެވެ. މަތިވެރި ކޮޅަށް ރަސްދޫގެ ހަމައެކަނި ގޯލު ޖެހީ އިބްރާހިމް އާޒިމް އެވެ. މެޗުގެ މޮޅު ކުޅުންތެރިއަކީ އާދަމް އިމްރާން އެވެ.
ބޮޑުފޮޅުދޫ އިން ފެރިދޫ ތަފާތު ބޮޑުކޮށް ބަލިކުރިއިރު، ބޮޑުފޮޅުދޫ ޓީމުގެ އަލީ ޝާހު ވަނީ ހެޓްރިކެއް ހަދައި މެޗުގެ މޮޅު ކުޅުންތެރިޔާގެ މަގާމު ހޯދައިފަ އެވެ. އެ ޓީމުގެ މުހައްމަދު ޝިރުހާނާއި ޖާދުﷲ އަހުމަދު ކޮންމެ ކުޅުންތެރިއަކު ދެ ގޯލު ޖެހިއިރު، އަނެއް ލަނޑު ޖެހީ ހުސެއިން ޒަޔާން ހަސަން އެވެ. ފެރިދޫގެ އަލީ ޝުހާދު އަބްދުﷲ އާއި އަހުމަދު ސިރާޒް ވަނީ ގޯލެއް ޖަހައިފަ އެވެ.
ތިނަދޫގެ ގޯލު އިބްރާހިމް ސަނޫން ޖެހިއިރު، ހޯޑެއްދޫގެ ގޯލު ކާމިޔާބުކުރީ ގަނީ އެވެ.
މުބާރާތުގައި މިރޭ ކުޅޭ މެޗުތަކަކީ އދ ހަންޏާމީދޫ އާއި އދ ފެންފުށީގެ މެޗާއި މ. މުއްޔާއި މ. ކޮޅުފުށީގެ މެޗާއި އދ. ދަގެންޗާއި އދ. އޮމަދޫގެ މެޗާއި މ. ނާލާފުއްޓާއި މ. ދިއްގަރު ބައްދަލުކުރާ މެޗުގެ އިތުރުން ފ. ފީއަލީ އާއި ފ. ނިލަންދޫގެ މެޗުގެ އިތުރުުން ފ. މަގޫދޫ އާއި ފ. ބިލެއްދޫގެ މެޗެވެ.
