ޝަންހާއީ، ޗައިނާ (ފެބްރުއަރީ 24) - ޗައިނާގެ އީ-ކޮމާސް ކުންފުނި އަލީބާބާއަށް 2021 ވަނަ އަހަރުގެ ފަހު ކުއާޓާގައި ލިބުނު ފައިދާ 74 ޕަސެންޓު ދަށްވެއްޖެ އެވެ.
ވިހި އެކާވީސް ވަނަ އަހަރުގެ އޮކްޓޯބަރުން ޑިސެމްބަރަށް ހޭދަވި މުއްދަތުގައި ފައިދާ ދަށްވި އިރު، އޭގެ ކުރިން އައި ދެ ކުއާޓާގައި ވެސް ކުންފުނީގެ ފައިދާ ދަށަށް ދިޔަ އެވެ.
އަލީބާބާއިން ބުނީ ފައިދާ ދަށަށް ދަނީ "އުނދަގޫ އަދި އަވަހަށް ބަދަލުވަމުންދާ މާކެޓެއްގެ ތެރޭގައި" ކުރިއަށް ދާން ޖެހޭތީ ކަމަށެވެ. އެ ކުންފުނިން އިއުލާނު ކުރި އާމްދަނީގެ އަދަދަކީ 3.2 ބިލިއަން ޑޮލަރެވެ.
ކުންފުންޏަށް ދިމާވެފައިވާ ގޮންޖެހުންތަކާ ހެދި ފާއިތުވި 12 މަހުގެ ތެރޭގައި ހިއްސާގެ އަގު ވަނީ 50 ޕަސެންޓު ކުޑަވެފަ އެވެ.
މާކެޓު މޮނޮޕޮލީ ބޭނުންކޮށް، އަލީބާބާއިން ނަހަމަ ގޮތުގައި ކުރި ހޯދަމުންދާ ކަމަށް ޗައިނާގެ ކަމާ ބެހޭ އިދާރާތަކުން ބުނާ މައްސަލަ އޮތީ ފެންމަތިވެފަ އެވެ.
އެ މައްސަލައިގައި އަލީބާބާއާއިން ރެކޯޑް އަދަދަކަށް 2.75 ބިލިއަން ޑޮލަރުގެ ޖޫރިމަނާއެއް ވެސް ދައްކަން ޖެހުނެވެ. ޓެކްނޮލޮޖީ ދާއިރާގެ އެހެން ބޮޑެތި ކުންފުނިތައް ވެސް އޭރު ޖޫރިމަނާކޮށް، ފިޔަވަޅު އެޅި އެވެ.
ބޮޑެތި ކުންފުނިތައް މޮނީޓާ ކުރުން އިތުރުކޮށް، ފިޔަވަޅު އެޅީ ކުންފުނިތައް މާ ބޮޑަށް ބާރުގަދަވެފައިވާ އިރު ބޯލަނބަން ޖެހޭ ގަވާއިދުތައް މަދުވުމުން ނާޖައިޒު ފައިދާ ހޯދާކަމުގެ ތުހުމަތު ބޮޑުވެފައި ވަނިކޮށެވެ.
