ބެއިޖިން، ޗައިނާ (ފެބްރުއަރީ 24) - ރަޝިއާއިން ޔޫކްރެއިންގައި ފެށި "އަސްކަރީ އޮޕަރޭޝަނަކީ" ޔޫކްރެއިނަށް އަރައި އެ ގައުމު ހިފުމުގެ އަމަލެއްގެ ގޮތުގައި ސިފަކޮށްގެން ނުވާނެ ކަމަށް ޗައިނާއިން ބުނެފި އެވެ.
ރަޝިއާގެ ރައީސް ލެޑިމިއަ ޕުޓިން ބުރާސްފަތި ދުވަހުގެ ފަތިހު އަސްކަރީ އޮޕަރޭޝަނެއް އިއުލާނު ކުރެއްވުމާއެކު ޔޫކްރެއިންގެ ސިޓީތަކުގައި ވަނީ ބާރުގަދަ ގޮވުންތަކެއް ގޮވާފަ އެވެ. އޭގެ ފަހުން ބޯޑަރު ހުރަސްކޮށް، ރަޝިއާ ސިފައިން ޔޫކްރެއިނަށް އެތެރެވެ، ދެ ގައުމުގެ ފައުޖުން ދަނީ ސީދާ ހަމަލާތައް ވެސް ބަދަލު ކުރަމުންނެވެ.
"ޗައިނާއިން ދަނީ މި ހާލަތް ވަރަށް ގާތުން ބަލަމުން. ހުރިހާ ފަރާތްތަކަށް ވެސް އަޅުގަނޑުމެން ގޮވާލަނީ ހަމަނުޖެހުމާ ދުރުވުމަށް އަދި މި ހާލަތު ކޮންޓްރޯލުން ނެއްޓިގެން ދިޔަ ނުދިނުމަށް،" ފޮރިން މިނިސްޓްރީގެ ތަރުޖަމާނު ހުއާ ޗުންޔިންގް ނޫސްވެރިންނަށް ވިދާޅުވި އެވެ.
ޔޫކްރެއިން މައްސަލައިގައި ރަޝިއާއާ ދެކޮޅަށް ހުޅަނގުން ފިޔަވަޅު އެޅުމުން ޗައިނާއިން ވަނީ އެކަން ކުށްވެރިކޮށްފަ އެވެ. އަދި ޗައިނާ އާއި ރަޝިއާ ގުޅިގެން ހުޅަނގަށް ފާޑުކިޔައި ދިގު ބަޔާނެއް ވެސް ވަރަށް ފަހުން ނެރުނެވެ.
ރަޝިއާއިން ޔޫކްރެއިނަށް ހަމަލާ ދިނުން ޗައިނާއިން ކުށްވެރި ކުރޭތޯ ނޫސްވެރިން ތަކުރާރުކޮށް ސުވާލު ކުރުމުން ވެސް ތަރުޖަމާނު ހުއާ ސީދާ ޖަވާބެއް ނުދެއްވަ އެވެ. އޭނާ ވިދާޅުވީ ރަޝިއާގެ އަސްކަރީ ފިޔަވަޅަކީ ޔޫކްރެއިނަށް އެރުން ނުވަތަ ޔޫކްރެއިން ހިފުމުގެ ގޮތުގައި ސިފަކޮށްގެން ނުވާނެ ކަމަށެވެ.
ޔޫކްރެއިން އަދި ރަޝިއާގެ ލީޑަރުންނާ މުއާމަލާތު ކުރަމުންދޭތޯ ސުވާލު ކުރުމުން ވެސް އޭނާ ޖަވާބެއް ނުދެއްވަ އެވެ.
"ޔޫކްރެއިން މައްސަލައިގައި ހިމެނެނީ ވަރަށް އުނދަގޫ މާޒީއަކާއި ފަސް މަންޒަރެއް،" ހުއާ ވިދާޅުވި އެވެ.
ޗައިނާއިން ތަކުރާރުކޮށް ބުނެފައި ވަނީ ޔޫކްރެއިން މައްސަލަ ހޫނު ކުރީ އެމެރިކާ އާއި ހުޅަނގުގެ ގައުމުތަކުން ކަމަށާއި އެމެރިކާއިން ވަނީ އަލިފާނަށް ތެޔޮ އަޅައި ހުޅުގަނޑު ބޮޑުކޮށްފައި ކަމަށެވެ.
