ބާލިން، ޖަރުމަނުވިލާތް (ފެބްރުއަރީ 23) - ޖަރުމަނުގައި އެންމެ ކުޑަ އުޖޫރަ ގަޑިއަކު 13.60 ޑޮލަރަށް މަތިކޮށް، ޗާންސެލަރު އޯލާފް ޝޯލްޒްގެ ސޯޝަލް ޑިމޮކްރެޓް ޕާޓީގެ މުހިއްމު ވައުދެއް ފުއްދަން ގާތްވެއްޖެ އެވެ.
"އަޅުގަނޑުމެންގެ ގައުމުގެ ގިނަ ރައްޔިތުން ވަރަށް ބުރަކޮށް މަސައްކަތް ކުރޭ، އެކަމަކު ލިބެނީ ކުޑަ އުޖޫރައެއް. މިކަން ބަދަލުވާން ޖެހޭ،" އެންމެ ކުޑަ އުޖޫރަ މަތި ކުރިކަން އިއުލާނު ކުރައްވަމުން ޓްވިޓާ މެދުވެރިކޮށް ޝޯލްޒް ވިދާޅުވި އެވެ.
"އަޅުގަނޑުގެ ދެކޭ ގޮތުގައި އެންމެ މުހިއްމު އެއް ގާނޫނަކީ މިއީ އަދި މިއީ އިހްތިރާމާ ގުޅިފައިވާ ކަމެއް."
އެ ނިންމުމާ އެކު ޖުލައި އެއް ވަނަ ދުވަހުން ފެށިގެން އެންމެ ކުޑަ އުޖޫރައިގެ ގޮތުގައި ލިބޭ އަދަދު ގަޑިއަކު 9.82 ޔޫރޯއިން 10.45 ޔޫރޯއަށް މަތިވާނ އެވެ. އޭގެ ފަހުން އޮކްޓޯބަރު އެއް ވަނަ ދުވަހުން ފެށިގެން 12 ގަޑިއަކު 12 ޔޫރޯއަށް މަތިވާނެ އެވެ. އެ ނިންމުމުގެ ސަބަބުން 6.2 މިލިއަން މަސައްކަތްތެރިންނަށް ލިބޭ އުޖޫރަ އުފުލޭނެ އެވެ.
ލޭބާ މިނިސްޓަރު ހުބޭޓަސް ހެއިލް ވިދާޅުވީ އެ ނިންމުމުގެ އެންމެ ބޮޑު ފައިދާއެއް ކުރާނީ ކޭޓާ ކުރުމާއި، ހިދުމަތް ދިނުމުގެ މަސައްކަތްތަކާއި، ސާފު ކުރުމާއި، ގުދަނުގެ ލޮޖިސްޓިކް މަސައްކަތް ކުރާ މީހުންނަށް ކަމަށެވެ.
"އަޅުގަނޑުމެން މި ފާހަގަކުރަނީ ބަލިމަޑުކަމުގައި މުހިއްމު ދައުރެއް އަދާކުރި މަސައްކަތްތެރިންގެ ވާހަކަ."
ޖަރުމަނުގެ ކޯލިޝަން ސަރުކާރުން ހެދި އެއްބަސްވުމުގައި ހުރިހާ ޕާޓީއަކުން ވެސް އެންމެ ކުޑަ އުޖޫރަ މަތިކުރަން ރުހުން ދިނެވެ. ޖަރުމަނުގެ ޓްރޭޑް ޔޫނިއަން ކޮންފެޑޭރޭޝަނުން ބުނީ އެ ނިންމުމުގެ ސަބަބުން ޔޫރަޕްގެ އެންމެ ބޮޑު އިގްތިސާދުގައި ހޭދަކުރުމުގެ ގާބިލްކަން އިތުރުވާނެ ކަމަށެވެ.
ނަމަވެސް ބައެއް އެނެލިސްޓުން ބުނާ ގޮތުގައި އުޖޫރަ މަތި ކުރުމުން އިންފްލޭޝަނަށް މަގުފަހިވުމުގެ ފުރުސަތު އެބަ އޮތެވެ. ނިމުނު އަހަރުގެ ފަހުކޮޅު ޖަރުމަނުގެ އިންފްލޭޝަން ހުރީ ފަސް ޕަސެންޓަށް އަރާފަ އެވެ.
ކުޑަ އުޖޫރަ މަތިކުރަން ސަރުކާރުން ނިންމާފައިވާ އިރު، އެކަމަށް އަމަލު ކުރަން ފެށޭނީ ޕާލިމެންޓުގެ ރުހުން ލިބި، ގާނޫނަކަށް ބަދަލުވުމުންނެވެ.
