ރާއްޖޭގެ އެންމެ ޒަމާންވީ ސްކޫލްތަކުގެ ތެރޭގައި ހިމެނޭ މަދަރުސަތުލް އިފްތިތާހުގެ ހާލަތު ރަނގަޅުކުރަން ގޮވާލައި 18 ނުކުތާއެއް ހިމެނޭ ބޮޑު ގަރާރެއް ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް ރައްޔިތުންގެ މަޖިލީހަށް މިއަދު ގަރާރެއް ހުށަހަޅުއްވައިފި އެވެ.
މީގެ ދުވަސްކޮޅެއް ކުރިން ޝިޔާމް މަޖިލީހަށް ފޮނުއްވާފައިވާ ގަރާރު މަޖިލީހުގެ ތަޅުމަށް ހުށަހަޅުއްވަމުން އޭނާ ވިދާޅުވީ ދާއިރާއަށް އެންމެ ފަހުން ކުރެއްވި ދަތުރުގައި މަދަރުސަތުލް އިފްތިތާހަށް ޒިޔާރަތްކުރެއްވި އިރު އެތަނުގައި ވަސީލަތްތަކުގެ ދަތިކަން ވަރަށް ބޮޑަށް އެބަ ހުރި ކަމަށެވެ. ބަޖެޓް ނެތުމުގެ ސަބަބުން އެ ސްކޫލްގެ އާބާތުރަ ނުފިލުވި ހުރި ކަމަށާއި ބޭނުންކުރަން ކަމުނުދާ ވަރަށް އެތަނުގެ ފަރުނީޗަރުވެސް ބާވެފައިވާ ކަމަށް އޭނާ ވިދާޅުވި އެވެ.
ޅ. ނައިފަރުގައި ހުންނަ މަދަރުސަތުލް އިފްތިތާހަކަކީ މާލެ ފިޔަވައި ރާއްޖޭގައި އެހެން ރަށެއްގައި ގާއިމްކުރި ފުރަތަމަ ސްކޫލެވެ. އެއީ 88 އަހަރަށް ވުރެ ދިގު ތާރީހެއް އޮތް ސްކޫލެކެވެ.
"އެނގިވަޑައިގަންނަވާނެ، މަދަރުސަތުލް އިފްތިތާހަކީ އަތޮޅުތެރޭގައި ހުރި އެންމެ ދުވަސްވީ ސްކޫލް، 1932 ވަނަ އަހަރު ދިވެހިރާއްޖޭގެ ގާނޫނު އަސާސީއެއް އެކުލަވައިލެވިގެން ދިއުމަށް ފަހު 1933 ވަނަ އަހަރުގެ ޖޫން މަހުގެ 22 ވަނަ ދުވަހު މަދަރުސަތުލް އިފްތިތާހު ވުޖޫދު މިވީ،" އިފްތިތާހުގެ މުހިއްމުކަން ފާހަގަކުރައްވައި ޝިޔާމް ވިދާޅުވި އެވެ.
ޝިޔާމް ވިދާޅުވީ އޭނާގެ ގަރާރު މަޖިލީހަށް ފުރަތަމަ ހުށަހެޅުއްވީ މިދިޔަ އަހަރު ކަމަށާއި އެ ގަރާރުގައި ފާހަކޮށްފައިވާ ބައެއް ކަންތައްތައް ސަރުކާރުން މިހާރު ހައްލުކޮށްފައިވާ ކަމަށެވެ.
ޝިޔާމްގެ ބައެއް ކަންބޮޑުވުންތައް
- އާ ކްލާސްރޫމްތައް ނިމިފައި ހުރި ނަމަވެސް ކަރަންޓް ނުގުޅައި ހުރުމުން އެތަންތަނުގެ ބޭނުން ހިފެން ނެތުން.
- ކޮމްޕިއުޓާ ލެބް އަޕްގްރޭޑްކުރަން ޖެހި އެކަން ނުވެ ހުރުން.
- ދަރިވަރުން ކުޅިވަރު ކުޅެން އޮތް ސަރަހައްދުގައިވާ ތަކެތި ބާވެ ހަލާކުވެފައި ހުރުން
- ސެން ކްލާހުގައި އަސާސީ ހިދުމަތްތައް ލިބެން ނެތުން
- ސްކޫލް މަރާމާތުކޮށް އާބާތުރަ ފިލުވަން ބަޖެޓް ނެތުން
- ސައިންސްލެބްގެ ހިދުމަތް ނުލިބޭތާ ތިން އަހަރު ވެފައިވުން
- ޕްރިންޓިން ރޫމްގެ މެޝިނަރީ ހަލާކުވެފައި ހުރުން
ގަރާރުގައި ސަރުކާރަށް ޝިޔާމް ގޮވައިލެއްވީ މިކަންތައްތަކުގެ އިތުރުން ވެސް އެ ސްކޫލްގައި ރަނގަޅުކުރަން ހުރި ގިނަ ކަންތައްތަކެއް ރަނޅުކޮށްދެއްވުމަށެވެ. އެހެން ނަަމަވެސް އޭނާ ވިދާޅުވީ ގަރާރުގައިވާ ބައެއް ކަންތައްތަކަށް އެޑިއުކޭޝަން މިނިސްޓްރީން މިހާރު އެޑްރެސްކޮށްފައިވާ ކަމަށެވެ. އެކަމާ އުފާކުރައްވާ ކަމަށް ވެސް އޭނާ ވިދާޅުވި އެވެ. ގަރާރުގައި އޮތް ކަންބޮޑުވުމެއް ކަމަށްވާ އާ ކްލާސްރޫމްތައް ބޭނުން ނުކުރެވޭ މައްސަލަ ޝިޔާމް ވިދާޅުވި ގޮތުގައި މިހާރު ވަނީ ހައްލުކޮށްފަ އެވެ.
"އަޅުގަނޑު ފާހަގަކުރަން މި ގަރާރު [ފުރަަތަމަ] ހުށަހެޅުމާއި އެކު މިނިސްޓްރީން ތަންކޮޅެއް އިސްކަން ދެއްވައިގެން މިކަންތައްތައް މިހާރު ވަނީ ހައްލުކޮށްދެއްވާފައި،" އޭނާ ވިދާޅުވި އެވެ.
ޝިޔާމްގެ ގަރާރަށް ބަހުސް ކުރެއްވި އެމްޑީޕީގެ ބައެއް މެމްބަރުން ވެސް ވިދާޅުވީ އެއީ މުހިއްމު ގަރާރެއް ކަަމަށެވެ.
