ހުޅުމާލޭގެ ދެވަަނަ ފިޔަވަހީގައި ނުގަވައިދުން ބަހައްޓާފައި ހުރި ތަކެތި ނަގަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީން) މިމަހުގެ 27 ވަނަ ދުވަހުގެ ނިޔަލަށް މުހުލަތު ދީފި އެވެ.
އެޗްޑީސީން މިއަދު ކުރި އިއުލާނެއްގައި ބުނީ ނުގަވައިދުން ބަހައްޓާފައި ހުރި ތަކެތި ނަގަން އެންގީ ދެވަނަ ފިޔަވަހީގައި ކުރިޔަށް ގެންދަން ނިންމާފައިވާ ހާބަރަކާއި، ދެ ޗެނަލް ހެދުމުގެ ޕްރޮޖެކްޓް ފަށަން ބިން ހުސްކޮށް ކޮންޓުރެކްޓަރާއި ހަވާލުކުރުމުގެ މަސައްކަތް އަންނަ މާޗްމަހު ކުރިއަށް ގެންދަން ޖެހޭތީ ކަމަށެވެ.
އެގޮތަށް ބަަހައްޓާފައި ހުރި ތަކެތި ނަގަން ފުރަތަމަ މުހުލަތު ޖެނުއަރީ 18 ގައި ވަނީ ހަމަވެފަ އެވެ.
"... ނަމަވެސް، ބައެއްފަރާތްތަކުން ހަވާލާދެވުނު އިޢުލާނާއި އެއްގޮތަށް ބިންތަށް ހުސްކޮށްފައި ނެތުމުގެ ސަބަބުން ދެންނެވުނު ޕްރޮޖެކްޓްތަށް ފެއްޓުމަށް ކަނޑައެޅިފައިވާ ސަރަހައްދު ސާފުކުރުމުގެ މަސައްކަތް މިކޯޕަރޭޝަނުން ކުރިޔަށް ގެންދިޔުމަށް ވަނީ ނިންމާފައެވެ،" އެޗްޑީސީގެ އިއުލާނުގަައި ބުންޏެވެ.
އެ އިއުލާނުގައި ބުނީ ބިން ސާފުކުރުމުގެ މަސައްކަތް މިމަހުގެ 27 ވަނަ ދުވަހު ފަށާނެ ކަމަށާއި އެ ތާރީހާ ހިސާބަށް ނުނަގައި ހުންނަ ތަކެއްޗަކީ ވެރިފަރާތުން ބޭނުން ނެތިގެން ބަހައްޓާފައި ހުރި ތަކެތި ކަމަށް ބަލައި އެޗްޑީސީއަށް ފެންނަ ގޮތަކަށް އަމަލުކުރާނެ ކަމަށެވެ. އެ މަސައްކަތުގައި ތަކެއްޗަށް ލިބޭ ގެއްލުމަށް އެޗްޑީސީން ޒިންމާނުވާނެ ކަމަށް ވެސް ބުންޏެވެ.
