ރާއްޖޭގައި އިތުރު ސަބްމެރީން ކޭބަލެއް އެޅުމަށް، އިންޑިޔާގެ ކުރިއަރާފައިވާ މުއާސަލާތީ ކުންފުނި ރިލަޔަންސް ޖިއޯ ލިމިޓެޑާއި އޯޝަން ކަނެކްޓް މޯލްޑިވްސްއާ އެކު އެއްބަސްވުމެއްގައި ސޮއިކޮށްފި އެވެ.
އިންޑިޔާގެ އެންްމެ މުއްސަނދި މީހާގެ ގޮތުގައި ހުންނެވި ބިލިއަނަަރު މުކޭޝް އަރުބާނީގެ ޖިއޯ ކުންފުންޏަކީ، މޯބައިލް ފޯނުގެ ހިދުމަތް ދިނުމުގައި އިންޑިޔާގެ އެއްވަނަ އަދި ދުނިޔޭގެ ތިން ވަނަ ކުންފުންޏެވެ. މީގެ 15 އަހަރު ކުރިން ހިދުމަތް ދޭންފެށި އެ ކުންފުނިން ފޯނާއި އިންޓަނެޓާއި ޓީވީގެ ހިދުމަތް ވެސް ފުޅާ ދާއިރާ އެއްގައި ދެ އެވެ.
އޯޝަން ކަނެކްޓް މޯލްޑިވްސްއަކީ ސަރުކާރުގެ މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) ގެ ސަބްސިޑަރީ ކުންފުންޏެކެވެ.
ރާއްޖޭގައި 5-ޖީގެ ހިދުމަތް ދިނުމަށް އިތުރަށް މަގުފަހިކުރުމަށްޓަކައި އަޅާ ސަބްމެރީން ކޭބަލް ގާއިމު ކުރުމުގެ އެއްބަސްވުމުގައި ސޮއިކުރުން އޮތީ ކްރޮސް ރޯޑްސްގަ އެވެ.
މުވާސަލާތީ ހިދުމަތްތަކުގެ އަގުތަކާއި ފެންވަރަށް ހެޔޮ ބަދަލުތައް ގެނައުމަށްޓަކައި ރާއްޖޭ އާއި ބޭރުދުނިޔެ އާ ގުޅުވާލަދޭ އިތުރު ސަބްމެރީން ކޭބަލްތައް ކުރިމަގުގައި ގާއިމް ކުރުމުގެ މަސައްކަތް ކުރަމުން އަންނަ ކަމަށް ޓެކްނޮލޮޖަކީ މިނިސްޓަރު މަރިޔަމް ޝައުނާ މިދިޔަ އަހަރުގެ މޭ މަހު ވިދާޅުވެފައިވެ އެވެ.
ރާއްޖޭގައި މުއާސަލާތީ ހިދުމަތް ދެމުން ގެންދާ ދިރާގާއި އުރީދޫން ވެސް ވަނީ ސަބްމެރީން ކޭބަލް ގާއިމުކޮށްފަ އެވެ.
