ރާއްޖޭގައި ބޭއްވޭ އެންމެ މަޝްހޫރު ފުޓްސަލް މުބާރާތް ކަމަށްވާ ސޮނީސްޕޯޓްސް ގޯލްޑަން ފުޓްސަލް ޗެލެންޖްގެ މި ފަހަރުގެ މުބާރާތުގައި ރޭ ކުޅުނު މެޗުތަކުން ހއ. އިހަވަންދޫ އާއި ހދ. ވައިކަރަދޫ އަދި ހދ. މަކުނުދޫ މޮޅުވެއްޖެ އެވެ.
ވައިކަރަދޫ މޮޅުވީ ހދ. ކުޅުދުއްފުއްޓާއި ވާދަކޮށް 7-2 އިންނެވެ. އިހަވަންދޫ އިން ވަނީ ހއ.ބާރަށް އަތުން 3-2 އިން މޮޅުވެފަ އެވެ. ހއ. ކެލާ އާއި ހއ. މުރައިދޫގެ މެޗު ނިމުނީ 1-1 އިން އެއްވަރުވެގެންނެވެ. ށ. މަރޮށި އަތުން ށ. ކަނޑިތީމު މޮޅުވީ ފަސޭހަކަމާ އެކު 5-0 އިންނެވެ. އަދި ށ. ގޮއިދޫން ވަނީ 3-1 އިން އެ އަތޮޅު ފީވައް ބަލިކޮށްފަ އެވެ.
ރޭގެ މެޗުގައި އިހަވަންދޫގެ ގޯލުތައް ޖަހާފައިވަނީ މެޗުގެ މޮޅު ކުޅުންތެރިޔާ ހަސަން ޝާމިލް ދެ ގޯލާއި އިބްރާހިމް ހާމިދު ގޯލެކެވެ. ބާރަށުގެ ދެ ގޯލު ޖެހީ އަބްދުﷲ މިސްބާހު އެވެ.
ކުޅުދުއްފުށީގެ މައްޗަށް ވައިކަރަދޫ އިން ކުރިހޯދީ މޮޅު ކުޅުމެއް ދައްކައިގެންނެވެ. ވައިކަރަދޫގެ އަހުމަދު ޝިފާއު އާއި އިބްރާހިމް އަގީލް ކޮންމެ ކުޅުންތެރިއަކު ދެ ގޯލު ޖެހި އެވެ. ދެން ވައިކަރަދޫގެ ގޯލުތައް ޖެހީ އަހުމަދު ރައުޝަން، އަލީ އަބްދުﷲ އަދި އަލީ ނާޒިމް އެވެ. ކުޅުދުއްފުށި ޓީމުގެ ގޯލުތައް ޖެހީ އަރުޝަދު ހަަސަން އާއި މުހައްމަދު އަބްދުލް ރަހުމާން އެވެ.
ރޭ ކުޅުނު މެޗުގައި މުރައިދޫގެ އުޝާމް އަބްދުﷲ އެ ޓީމަށް ލީޑުނަގައިދީފައިވަނިކޮށް ކެލާ ޓީމަށް އެއްވަރުކޮށްދިނީ އަލީ އިމާދު އެވެ. މެޗުގެ މޮޅު ކުޅުންތެރިއަކީ މުރައިދޫގެ އުޝާމް އެވެ.
މަކުނުދޫ އިން ހދ. ނެއްލައިދޫ ކޮޅަށް ޖެހި ހަތަރު ގޯލުގެ ތެރެއިން ދެ ގޯލު ޖެހީ ޓީމުގެ ކެޕްޓަން އަދި މެޗުގެ މޮޅު ކުޅުންތެރިއަކަށް ހޮވުނު އިބްރާހިމް ސާވީ އެވެ. އަނެއް ދެ ގޯލު ޖެހީ ޝައިބާން އަހުމަދާއި ޖުނާން އަބްދުލް މަޖީދު އެވެ. ނެއްލައިދޫގެ ތިން ގޯލު ޖެހީ މުހައްމަދު ވިސާމްގެ އިތުރުން މުހައްމަދު ސާވިން ދެ ގޯލެވެ.
މަރޮށީގެ މައްޗަށް ކަނޑިތީމުން ފުރިހަމަ މޮޅެއް ހޯދީ މުޅި މެޗު ކޮންޓްރޯލް ކޮށްގެން ކުޅެގެންނެވެ. ކަނޑިތީމުގެ ގޯލުތައް ޖެހީ ކެޕްޓަން ހުސެއިން ވާފިރު، އިސްމާއިލް ނިހާން، އިބްރާހިމް ނަދާދު، އަހުމަދު ރިޒާން އަދި މުހައްމަދު ޝާން އެވެ. މެޗުގެ މޮޅު ކުޅުންތެރިއަކީ ކަނޑިތީމު ޓީމުގައި މޮޅަށް ކުޅުނު ހުސެއިން ވާފިރު އެވެ.
ށ. ގޮއިދޫ ޓީމުން ފީވައް ބަލިކުރިއިރު، ތަފާތަކީ ހުސެއިން ނިހާލް އެވެ. މެޗުގެ މޮޅު ކުޅުންތެރިއާގެ މަގާމު ހޯދި ނިހާލް ވަނީ ހެޓްރިކެއް ހަދައިފަ އެވެ. ފީވައް ޓީމުގެ ގޯލު ޖެހީ އަބްދުﷲ ރިމާހް އެވެ.
މުބާރާތުގައި މިރޭ ކުޅޭ މެޗުތަަކަށް ބަލާއިރު، ހއ.ގެ ގްރޫޕް އޭގައި ހޯރަފުއްޓާއި މާރަންދޫގެ މެޗާއި ވަށަފަރާއި ދިއްދޫގެ މެޗު ކުޅޭނެ އެވެ. ހދ.ގެ ގްރޫޕް އޭގައި މިރޭ އޮންނާނީ ފިނޭ އާއި ނާވައިދޫގެ މެޗާއި ކުމުންދޫ އާއި ނޭކުރެންދޫ ބައްދަލުކުރާ މެޗެވެ. ދެން މިރޭ ކުޅެން އޮތީ ށ. ގްރޫޕް އޭގެ ދެ މެޗެވެ. އެއް މެޗުގައި ބިލެއްފަހި ނުކުންނާނީ ފޯކައިދޫއާ ދެކޮޅަށެވެ. އަދި މިލަންދޫ ބައްދަލުކުރާނީ ކޮމަންޑޫއާ އެވެ.
