ޗައިނާއަށް 2020 ވަނަ އަހަރު ރެކޯޑް މިންވަރަށް ވާރޭ ވެހުމާއި އެ އަހަރު ކޮވިޑްގެ ލޮކްޑައުނާ ގުޅިގެން ޖައްވަށް ވިހަ ގޭސް ބޭރު ކުރުން ކުއްލިއަކަށް ހުއްޓުމާ ގުޅުން އެބަ އޮތް ކަމަށް ސައިންސްވެރިން ބުނެފި އެވެ.
ޖައްވު ހޫނުކުރާ ގްރީންހައުސް ގޭހާއި އެއިރޮޒޯލް ޕާޓިކަލްތައް މަދުވުމާ އެކު އެޓްމޮސްފެރިކް ބަދަލުތަކެއް އައިސް، ބޯކޮށް ވާރޭ ވެހެން މަގުފަހިވީ ކަމަށް ސައިންސްވެރިން ގަބޫލުކުރެ އެވެ.
ޗައިނާއަށް 2020 ވަނަ އަހަރުގެ ހޫނު މޫސުމުގައި ރެކޯޑް މިންވަރަށް ވާރޭ ވެހުމުގެ ސަބަބުން އެތައް ސަތޭކަ ބަޔަކު މަރުވެ، އެތައް މިލިއަން މީހުން އިވެކުއޭޓް ކުރަން ޖެހުނެވެ.
އެގޮތުން 2020 ވަނަ އަހަރުގެ ޖޫން އަދި ޖުލައި މަހު ޗައިނާގެ އިރުމަތީގެ ގިނަ ހިސާބުތަކުގައި ވަރަށް ބޮޑަށް ފެންބޮޑުވި އެވެ. ސައިންސްވެރިން ބުނީ އޭރު ވެހުނު ވާރޭގެ ތިންބައި ކޮށްފައި އެއްބައި ވެހެން މެދުވެރިވީ ވިހަ ގޭސްތައް މަދުވުމުން ކަމަށެވެ.
ނަވާރަ ސަތޭކަ ފަސްދޮޅަސް އެއް ވަނަ އަހަރަށް ފަހު ޔާންގްޓްޒޭ ކޯރަށް ވާރޭ ނުވެހޭހާ ބޯކޮށް 2020 ވަނަ އަހަރު އެ ކޯރަށް ވާރޭ ވެހުނެވެ.
އެ އަހަރު އާދަޔާ ހިލާފަށް ބޯކޮށް ޗައިނާއަށް ވާރޭ ވެހުނު ސަބަބު ދެނެގަންނަން ގިނަ ޓީމުތަކަކުން ދަނީ މަސައްކަތް ކުރަމުންނެވެ. ބައެއް ސައިންސްވެރިން ބުނެފައިވާ ގޮތުގައި އެގޮތަށް މެދުވެރިވީ އިންޑިއާ ކަނޑު މާ ބޮޑަށް ހޫނުވާތީ އެވެ.
ނަމަވެސް ބައިނަލްއަގްވާމީ ސައިންސްވެރިންގެ ޓީމަކުން އެންމެ ފަހުން ބުނީ އެގޮތަށް މެދުވެރިވީ ކޮވިޑްގެ ލޮކްޑައުންގައި ފެކްޓްރީތައް ބަންދު ކުރުން ޖައްވަށް ކުއްލިއަކަށް އައި ބަދަލުގެ ސަބަބުން ކަމަށެވެ.
މޫސުމީ ބަދަލުގެ އަސަރު ކުޑަ ކުރަން ދުނިޔޭގެ ގައުމުތަކުން ޖައްވަށް ދޫކުރާ ވިހަ ގޭސް މަދުކޮށް، ތެޔޮ އެންދުމާ ދުރަށް ދާން މަސައްކަތް ކުރާއިރު، ޗައިނާގައި އެފަދަ ގޮތަކަށް ދިމާވުމުން ސުވާލުތަކެއް އުފެދެ އެވެ.
އެކަމަކު ދިރާސާ ހެދި ސައިންސްވެރިންގެ ޓީމުން ބުނީ ކުއްލިއަކަށް އަންނަ ބަދަލާއި ދުރާލައިގެން ރާވައިގެން މަޑުމަޑުން ގެންނަ ބަދަލާ ތަފާތު ކަމަށެވެ. އެހެންކަމުން މޫސުމީ ބަދަލުގެ އަސަރު ކުޑަކުރަން ގައުމުތަކުން އަޅާ ފިޔަވަޅުތަކުން ނޭދެވޭ އަސަރެއް ނުފެންނާނެ ކަމަށް އެ ޓީމުން ގަބޫލުކުރެ އެވެ.
