ފިލިޕީންސްގެ ސަރުކާރާ ދެކޮޅަށް ދިގު ހަނގުރާމައެއް ކުރަމުންދާ މާއޮއިސްޓް ގްރޫޕްގެ ވެރިޔާ ކަމަށް ބެލެވޭ ޑޮކްޓަރެއް ވެރިރަށް މެނީލާއިން ހައްޔަރުކޮށްފި އެވެ.
އުމުރުން 53 އަހަރުގެ މާރިއާ ނެތިވިދާދް ކާސްޓްރޯ ހައްޔަރުކޮށްފައިވާ އިރު، ރަހީނު ކުރުމުގެ ދައުވާ އޭނާގެ މައްޗަށް ވަނީ އުފުލާފަ އެވެ. އޭނާ ހައްޔަރު ކުރީ ރަހީނު ކުރުމުގެ މައްސަލައިގައި 2020 ވަނަ އަހަރު ނެރުނު ކޯޓު އަމުރެއްގެ ދަށުންނެވެ.
ނަމަވެސް ކާސްޓްރޯގެ ކުރީގެ އޮފީސް، އިންސާނީ ހައްގުތައް މޮނީޓާ ކުރާ ކަރަޕަޓަން އިން ބުނީ އޭނާއާ ދެކޮޅަށް އުފުލާފައިވަނީ "ސިޔާސީ ދައުވާތަކެއް" ކަމަށެވެ.
އެގޮތުން ހަމަނުޖެހުން ބޮޑު މިންޑަނާއޯ ސަރަހައްދުގައި ކޮމިއުނިޓީ ހެލްތު ސެންޓަރުތަކެއް އަޅަމުން ދިޔަ އިރު، އެ ތަނުގައި އިންސާނީ ހައްގުތަކާ ހިލާފަށް ހިންގާ އަމަލުތައް އޭނާ ތަހުގީގު ކުރި ކަމަށް ކަރަޕަޓަން އިން ބުންޏެވެ.
ހުކުރު ދުވަހު، ކާސްޓްރޯ ހައްޔަރު ކުރީ އޭނާ ދިރިއުޅޭ ގެއިންނެވެ. އޭނާއަށް ތުހުމަތު ކުތީ ފިލިޕީންސްގެ ކޮމިއުނިސްޓް ޕާޓީގެ ސެންޓްރަލް ކޮމިޓީގެ މެމްބަރެއްގެ ގޮތުގައި އުޅޭ ކަމަށެވެ.
ފާޑުކިޔާ ފަރާތްތަކުން ބުނާ ގޮތުގައި ކޮމިއުނިޒަމްގެ ތުހުމަތު ނުވަތަ ފިލިޕީންސްގައި އާއްމުކޮށް ކިޔާ ގޮތަށް "ރަތް ޓެގު އަޅުވައިގެން" އެކްޓިވިސްޓުންނާއި ނޫސްވެރިންނާއި ވަކީލުން އަދި އިދިކޮޅު ފިކުރުގެ މީހުން ހައްޔަރު ކުރުމަކީ އާއްމު ކަމެކެވެ.
އިންސާނީ ހައްގުތަކަށް މަސައްކަތް ކުރާ ގްރޫޕްތަކުން ބުނާ ގޮތުގައި ފިލިޕީންސްގެ ކުރީގެ ސަރުކާރުތަކަށް ވުރެ ބޮޑަށް ރައީސް ރޮޑްރިގޯ ޑުޓާޓޭގެ ސަރުކާރުން ދަނީ "ރަތް ޓެގު އަޅުވަމުންނެވެ".
ޑުޓާޓޭ 2016 ވަނަ އަހަރު ވެރިކަމަށް ވަޑައިގެން، މާއޮއިސްޓުންނާ އެކު ސުލްހައިގެ އެއްބަސްވުމެއްގައި ސޮއިކުރި އެވެ. ނަމަވެސް 2017 ވަނަ އަހަރު މަޝްވަރާތައް ފެއިލްވުމުން، ޑުޓާޓޭ ވިދާޅުވީ މާއޮއިސްޓުންނަކީ ޓެރަރިސްޓުން ކަމަށެވެ.
އޭގެ އިތުރުން އަންހެން މާއޮއިސްޓުންގެ ޖިންސީ ގުނަވަނަށް އަމާޒުކޮށް ބަޑި ޖެހުމަށް ވެސް ޑުޓާޓޭ ސިފައިންނަށް އަމުރު ކުރެއްވި އެވެ.
