ވިޔަފާރި އާއި އިންވެސްޓްމަންޓް ފުޅާކޮށް، އިގްތިސާދު ވަރުގަދަ ކުރުމުގެ މުހިއްމު އެއްބަސްވުމެއްގައި އިންޑިއާ އާއި ޔޫއޭއީއިން ހުކުރު ދުވަހު ސޮއިކޮށްފި އެވެ.
ކޮމްޕްރިހެންސިވް އިކޮނޮމިކް ޕާޓްނާޝިޕް އެގްރީމެންޓާއި އެހެން އެއްބަސްވުންތަކުގައި ސޮއިކުރަން ބޭއްވި ވާޗުއަލް ބައްދަލުވުމުގައި އަބޫ ދާބީގެ ވަލީ އަހުދު މުހައްމަދު ބިން ޒައިދް އަލް ނަހްޔާން އަދި އިންޑިއާގެ ބޮޑު ވަޒީރު ނަރެންދްރަ މޯދީ ބައިވެރިވެވަޑައިގެންނެވި އެވެ.
އެއްބަސްވުމުގައި ސޮއިކުރުމަކީ "ދެ ގައުމުގެ ގުޅުމުގައި މުހިއްމު ހަރަކާތެއް"ގެ ގޮތުގައި އިންޑިއާގެ ފޮރިން މިނިސްޓަރު އެސް ޖެއިޝަންކަރް ސިފަކުރެއްވި އެވެ.
"އޭގެ ދަށުން މުދަލާއި ހިދުމަތުގެ ވިޔަފާރިއާ ގުޅޭ އާ ފުރުސަތުތައް ފަހިވެ، އިންވެސްޓްމަންޓްތައް ފުޅާވާން މަގުފަހިވާނެ."
ޔޫއޭއީގެ ރަސްމީ ނިއުސް އެޖެންސީއިން ބުނީ އެއްބަސްވުމުގެ ދަށުން "އިގްތިސާދީ ގުޅުމުގެ އާ ޒަމާނެއް ފެށި، ވިޔަފާރި އާއި އިންވެސްޓްމަންޓަށް އާ ފުރުސަތުތައް ހުޅުވަމުން ދާނެ" ކަމަށެވެ.
އިންޑިއާ އާއި ޔޫއޭއީގެ ވިޔަފާރީގެ އަގަކީ 59 ބިލިއަން ޑޮލަރެވެ. ތަފާސްހިސާބުން ދައްކާ ގޮތުގައި 2019-2020 އަށް އިންޑިއާގެ އެންމެ ބޮޑު ވިޔަފާރި ބައިވެރިއަކީ ޔޫއޭއީ އެވެ.
އޭގެ އިތުރުން 2020-2021 އަށް އިންޑިއާއިން ތިން ވަނައަށް އެންމެ ގިނަ މުދާ އެކްސްޕޯޓް ކުރީ ޔޫއޭއީ އަށެވެ. އެއީ 16 ބިލިއަން ޑޮލަރުގެ އެކްސްޕޯޓެވެ.
އެންމެ ގިނައިން އެކްސްޕޯޓް ކުރީ ޕެޓްރޯލިއަމް އުފެއްދުންތަކާއި، އަގުހުރި މައުދަނާއި، ހިލަ، ޖަވާހިރު، ގަހަނާ އަދި މިނެރަލް އާއި ކާބޯތަކެތި އަދި ޓެކްސްޓައިލްސް އެވެ.
އިންޑިއާ އާއި ޔޫއޭއީއިން ގުޅުން ގާއިމްކުރީ 1970ގެ ކުރީކޮޅުގަ އެވެ. ޔޫއޭއީގައި އެންމެ ގިނައިން އުޅޭ ބިދޭސީންނަކީ އިންޑިއާ ރައްޔިތުންނެވެ. ޔޫއޭއީގެ 10 މިލިއަން މީހުންގެ ތެރެއިން 35 ޕަސެންޓަކީ އިންޑިއާ މީހުންނެވެ.
ޔޫއޭއީގައި މަސައްކަތް ކުރާ އިންޑިއާ ރައްޔިތުން ގައުމަށް ފޮނުވާ ރެމިޓެންސްގެ އަގު 2019 ވަނަ އުޅުނީ 17.06 ބިލިއަން ޑޮލަރަށް ވުރެ މަތީގަ އެވެ.
