ކުށްކުރާ މީހުން ދޫވާ މައްސަލަތައް ހައްލުވާނީ ރައްޔިތުންގެ މަޖިލީހުގައި އޮތް ހެއްކާ ބެހޭ ބިލު ފާސްކޮށްގެން ކަމަށް ބަންޑާރަ ނައިބު އިބްރާހީމް ރިފްއަތު އިއްޔެ ވިދާޅުވެއްޖެ އެވެ.
ކުށްވެރިން ދޫވާ ސަބަބުތަކާ ގުޅޭ ގޮތުން މަޖިލީހުގެ ޖުޑިޝަރީ ކޮމެޓީގެ މެމްބަރުން ސުވާލު ކުރުމުން ރިފްއަތު ވިދާޅުވީ ކުށްވެރިން ދޫވަނީ، ހާއްސަކޮށް މަސްތުވާތަކެތީގެ މައްސަލަތަކުގައި، ހެކި ވަޒަންކުރުމުގެ އުސޫލުތަކާ ހަމަތައް ލިޔެފައި ނެތުމުގެ ސަބަބުން ކަމަށެވެ.
"އެހެންވުން [ކުށްތަކުގައި މީހުން ދޫވުން] އެކަށީގެންވޭ، ތަފްސީލީ ގޮތެއްގައި ހެކި ވަޒަންކުރުމުގެ އުސޫލުތަކާ ހަމަތައް ލިޔެވިފައި ނެތީމާ، ނޫނީ ސާފުކޮށް އެނގެން ނެތީމާ، މިކަހަލަ ލޫޕްހޯލްތައް ހުރެގެން މައްސަލަތައް ސާބިތުނުވާ ކަމަށް،" ރިފްއަތު ވިދާޅުވި އެވެ.
މިހާރު ރާއްޖޭގައި އަމަލުކުރަމުން އަންނަ ހެއްކާ ބެހޭ ގާނޫނަކީ މާ ކުރީގެ ގާނޫނަކަށްވާތީ އެ ގާނޫނު އެހާ ތަފްސީލު ކުރެވިފައި ނުވާކަން އޭޖީ ފާހަގަކުރެއްވި އެވެ. އަދި ހެކި ވަޒަންކުރާނެ ރަނގަޅު އުސޫލުތަކެއް އެ ގާނޫނުގައި ނެތުމުން ހެކި ވަޒަން ކުރުމުގައި ފަނޑިޔާރުންނަށް ލިބޭ އިހްތިޔާރާ، ބާރުތައް ފުޅާ ކަމަށް ވެސް އޭނާ ވިދާޅުވި އެވެ.
"އިންސާފު ގާއިމް ކުރުމަށްޓަކައި މިކަން [ގާނޫނީ ބާގަނޑުތައް] އަޅުގަނޑުމެން އެބަ ޖެހޭ ހަމައަކަށް އަޅުވަން. އެހެންވީމަ އަޅުގަނޑު އުންމީދު ކުރަނީ ރައްޔިތުން މަޖިލީހަށް މިހާރު ހުށަހެޅިފައިވާ ހެއްކާ ބެހޭ ބިލް ވީ އެންމެ އަވަހަކަށް ތިބޭފުޅުން [ރައްޔިތުން މަޖިލީހުގެ މެމްބަރުން] ފާސްކޮށްދެއްވާނެ ކަމަށް،" ބަންޑާރަ ނައިބު ވިދާޅުވި އެވެ.
ރިއްފަތު ވިދާޅުވި ގޮތުގައި މިހާރު މަޖިލީހަށް ހުށަހަޅާފައިވާ 93 ސަފްހާގެ ހެއްކާ ބެހޭ ބިލުގައި ސިއްރު ހެކިވެރިންނަށް ހިމާޔަތް ދިނުމުގެ އަމުރު ނެރެދެވޭނެ އުސޫލެއް ވެސް އޮވެ އެވެ. އެއީ ސިއްރު ހެކިވެރިންގެ ސިއްރުވެރިކަން ގެއްލިދާ މައްސަލަ ހައްލު ކުރުމަށްޓަކައި ހިމެނި ނުކުތާއެއްކަން ރިއްފަތު ފާހަގަކުރެއްވި އެވެ.
މަސްތުވާ ތަކެތީގެ މައްސަލަތަކުގައާ، މަރުގެ މައްސަލަތަކުގައި ސިއްރު ހެކިވެރިންގެ ސިއްރުވެރިކަން ގެއްލުމުގެ ސަބަބުން، ހެކިބަހުން ރުޖޫއަވުމަކީ މިހާރަކަށް އައިސް ވަރަށް އާންމު ކަމެކެވެ. އެހެންވެ، ގިނަ މައްސަލަތައް ސާބިތު ނުވެ ދިއުމުގެ ފުރުސަތު ބޮޑުވެގެން ދެއެވެ.
