އިންޑިއާގެ ވެރިރަށް ނިއު ދިއްލީގައި އުމުރުން 87 އަހަރުގެ އަންހެނަކު ރޭޕްކުރި ކަމުގެ ތުހުމަތުގައި އުމުރުން 30 އަހަރުގެ ފިރިހެނަކު ހައްޔަރުކޮށްފި އެވެ.
ފުލުހުން ބުނީ ތުހުމަތު ކުރެވޭ މީހާއަކީ އަންހެން މީހާގެ ގެ ހުންނަ ތިލަކް ނަގަރް ސަރަހައްދުގައި މަގުމަތު ކުނި ކަހަން އުޅޭ ފިރިހެނެއް ކަމަށެވެ.
މުސްކުޅިވުމުގެ ސަބަބުން އެނދުމަތިކޮށްފައި އޮންނަ އަންހެން މީހާ ރޭޕްކޮށް، ވައްކަން ކުރީ އާދީއްތަ ދުވަހުގެ މެންދުރު ފަހު ގޭގައި އެހެން އެކަކު ވެސް ނެތް ވަގުތުގަ އެވެ.
އަންހެން މީހާގެ އާއިލާއިން ބުނީ ރޭޕްގެ މައްސަލަ ހުށަހެޅި ވެސް ފުލުހުން އެކަން މައްސަލައެއްގެ ގޮތުގައި އެންމެ ފުރަތަމަ ނުބެލި ކަމަށެވެ. އެކަމަކު ފުލުހުން އެ ވާހަކަ ދޮގުކުރެ އެވެ.
ފުލުހުން ބުނީ އަންހެން މީހާގެ އާއިލާއިން އާދީއްތަ ދުވަހު ރިޕޯޓު ކުރީ ހަމައެކަނި ވައްކަމުގެ މައްސަލައެއް ކަމަށެވެ. ރޭޕްގެ މައްސަލަ ހުށަހެޅީ ދެ ވަނަ ޝަކުވާއެއްގެ ގޮތުގައި ހޯމަ ދުވަހު ކަމަށް ބުންޏެވެ.
ނަމަވެސް އާއިލާގެ މެމްބަރަކު އިންޑިއަން އެކްސްޕްރެސް ނޫހަށް ބުނީ "ސްޓްރެސް ބޮޑުވާނެތީ" ރޭޕްގެ މައްސަލަ ދޫކޮށްލަން ފުލުހުން އެދުނު ކަމަށެވެ.
ނޭޝަނަލް ވިމެންސް ކޮމިޝަނުން ބުނީ އެގޮތަށް ބުނި ފުލުހުންނާ މެދު ފިޔަވަޅު އަޅަން އެދި، ދިއްލީގެ ފުލުހުންނަށް ރަސްމީކޮށް ސިޓީ ފޮނުވާފައި ވާނެ ކަމަށެވެ.
މީގެ ކުރިން 2020 ވަނަ އަހަރު ވެސް ދިއްލީގައި އުމުރުން 86 އަހަރުގެ އަންހެނަކު ރޭޕްކުރި މައްސަލަ ފެންމަތިވެ، ގިނަ ބަޔަކު ކަންބޮޑުވުން ފާޅުކުރި އެވެ.
ރޭޕް އާއި ޖިންސީ އަނިޔާގެ ވާހަކަ އިންޑިއާގައި ބާރަށް ދެކެވެން ފެށީ 2012 ވަނަ އަހަރު ދިއްލީގައި ގޭންގަކުން އަންހެނަކު ރޭޕްކޮށް މަރާލި މައްސަލައަށް ފަހު އެވެ.
