ކޮލޮމްބޯ، ސްރީލަންކާ (ފެބްރުއަރީ 14) - ބަޑި ހިފައިގެން އުޅުނު ބަޔަކު ސްރީލަންކާގެ މަގްބޫލު ޓީވީ ނޫސްވެރިޔެއްގެ ގޭތެރެއަށް ގަދަކަމުން ވަދެގަނެ، ހަމަލާ ދޭން މަސައްކަތްކޮށްފި އެވެ.
ޗަމުދިތަ ސަމަރަވިކްރަމައަކީ ވެރިކަމުގައި މިހާރު ތިއްބެވި ރާޖަޕަކްސަ އާއިލާއަށް ވަރަށް ބޮޑަށް ފާޑުކިޔާ ނޫސްވެރިއެކެވެ. އެގޮތުން ފަހަކަށް އައިސް، ޓީވީ އާއި ޔޫޓިއުބްގައި ވެސް ރާޖަޕަކްސަ އާއިލާއަށް ފާޑުކިޔައި ގިނަ ކޮންޓެންޓް އޭނާ ގެނެސްދީފައިވެ އެވެ.
ފުލުހުން ބުނީ ހޯމަ ދުވަހު ފަތިސް ވަގުތާ ދިމާކޮށް ހިނގި ހާދިސާގައި އޭނާއަށް އަނިޔާއެއް ނުވި ނަމަވެސް، ވަރަށް ބޮޑަށް ސިހިފައި ހުރި ކަމަށެވެ.
"އެ މީހުން އައީ ބަޑި ހިފައިގެން. އައިސް ގާޑަށް ބިރު ދައްކައިގެން، ގެ ހުންނަ ބިމުގެ ތެރެއަށް އެތެރެވި،" ފުލުހަކު ބުންޏެވެ. މައްސަލައިގެ ތަހުގީގަށް ފޮރެންސިކް ތަޖުރިބާކާރުންގެ އެހީ ދަނީ ހޯދަމުންނެވެ.
"މަދުވެގެން ތިން ފިރިހެނުން ތިބި. ކޮންމެ މީހެއްގެ އަތުގައި ވެސް ހަތިޔާރު އޮތް. އެ މީހުން އައީ ހުދު ކުލައިގެ ވޭނެއްގައި. އެންމެ ފުރަތަމަ އިވުނީ ބަޑި ޖެހި އަޑު. ގޭގެ ކުޑަދޮރުތައް ތަޅާލައި، ފާރަށް ނަޖިސް އުކި. އެ މަންޒަރު ވަނީ ސީސީޓީވީއަށް އަރާފައި،" ސަމަރަވިކްރަމަ އޭއެފްޕީއަށް ބުންޏެވެ.
"މި ހަމަލާގެ ފަހަތުގައި ތިބީ ކޮން ބަޔެއް ކަމެއް ނޭނގޭ. އެކަމަކު އެ މީހުންނަށް ބޭނުން ވަނީ ބިރު ދައްކައިގެން އަޑު ކަނޑުވައެއް ނުލެވޭނެއޭ."
ލަންކާގެ އިންސާނީ ހައްގުތަކަށް މަސައްކަތް ކުރާ ގްރޫޕުތަކުން އަންނަނީ އެ ހަމަލާ ކުށްވެރި ކުރަމުންނެވެ.
"މި ހަމަލާއިން ދައްކުވައިދެނީ ފަހަކަށް އައިސް ލަންކާގެ ނޫސްވެރިން މަސައްކަތް ކުރަން އުޅޭ ނުރައްކާތެރި މާހައުލު،" ފްރީ މީޑިއާ މޫވްމަންޓުން ބުންޏެވެ.
ރިޕޯޓާޒް ވިތައުޓް ބޯޑާޒް އިން ލަފާކުރާ ގޮތުގައި މިހާރުގެ ބޮޑު ވަރީޒު އަދި ކުރީގެ ރައީސް މަހިންދަ ރާޖަޕަކްސަގެ ވެރިކަމުގައި 2005 އިން 2015 އަށް މަދުވެގެން 14 ނޫސްވެރިން މަރާލާފައިވެ އެވެ.
މީގެ ދެ ހަފްތާ ކުރިން ފުލުހުން ވަނީ ސަމަރަވިކްރަމަ އާއި އޭނާ ނިސްބަތްވާ ހިރޫ ޓީވީ ނެޓްވޯކްގެ މައްސަލައެއް ބަލަން ފަށާފަ އެވެ. އެއީ ފުލުހުންނަށް ފާޑުކިޔަމުން ދާތީ އަދި ފުރާނައަށް ނުރައްކާވާ ކަމަށް ބުނެ ދޮގު ޝަކުވާއެއް ހުށަހެޅުމުން ކަމަށް ފުލުހުން ބުންޏެވެ.
މިދިޔަ ހަފްތާގައި އޭނާ ހުށަހެޅި އިންޓަވިއުއެއްގައި ގެނެސްދިނީ އިނގިރޭސިވިލާތުން ރައްކާތެރިކަން ހޯދައިގެން ދިރިއުޅެމުންދާ ކުރީގެ ފުލުހެއްގެ ވާހަކަތަކެވެ. ސަމަރަވިކްރަމަ ގެނެސްދޭ އެންމެ މަގްބޫލް ޝޯއަކީ "ޓްރުތް ވިތް ޗަމުދިތަ" އެވެ.
