ލަންޑަންގެ ތޭމްސް ކޯރުގައި ބޯޓު ދުއްވާލަން ނުކުމެ އުޅުނު މީހަކަށް، އެ ކޯރުގެ އައްސޭރި ފަށުގައި އޮތް 5000 އަހަރުވީ އިންސާނެއްގެ ކަށިގަނޑެއް ފެނިއްޖެ އެވެ.
ސައިމަން ހަންޓް ނަމަކަށް ކިޔާ ގްރެފިކް ޑިޒައިނަރު ބީބީސީއަށް ބުނީ ކަށިގަނޑު ފެނުނީ ހެނދުނު ބޯޓުގައި ފަލިޖަހަމުން ދަނިކޮށް، ކޯރުގެ ދިޔަވަރު ހިކިފައި އޮތް ގަޑިއެއްގައި ކަމަށެވެ.
އިންސާނެއްގެ ކަށިގަނޑާ ވައްތަރުވުމުން، ޝައްކުތަކެއް އުފެދި ކަންބޮޑުވި ނަމަވެސް، ކާބަން ޑޭޓިން ތަހުލީލުން އެނގުނު ގޮތުގައި އެއީ މީގެ 5000 އަހަރު ކުރިން އުޅުނު މީހެއްގެ ކަށިގަނޑެވެ.
ފުލުހުންނާ ހަވާލުކޮށްގެން ހެދި ތަހުލީލުން ދައްކާ ގޮތުގައި އެއީ "ސްޓޯން އޭޖް" ނިމުނު ދުވަސްވަރު "ބްރިޓިޝް ނިއޯލިތިކް" ޒަމާނުގައި އުޅުނު މީހެއްގެ ކަށިގަނޑެވެ.
"ނިއޯލިތިކް ބްރިޓަން" ޒަމާނުގައި ދަނޑުވެރިކަމުގެ މަސައްކަތް ބޮޑަށް ފެތުރި، ޔޫރަޕްގެ އެހެން ހިސާބުތަކުން ދަނޑުވެރިކަމަށް ހާއްސަ އާލާތްތަކާއި ޓެކްނީކްތައް އިނގިރޭސިންނާ ހަމައަށް ފޯރަން ފެށި އެވެ.
މި ވަގުތު ކަށިގަނޑު ރައްކާކޮށްފައި އޮތީ ސައިމަން ހަންޓްގެ އަތުގައި. -- ފޮޓޯ: ސައިމަން ހަންޓް
އާކިއޮލޮޖިސްޓަކު ލަފާކުރާ ގޮތުގައި ކަށިގަނޑު ނިސްބަތްވާ މީހާގެ ދިގު މިނުގައި ހުންނާނީ ގާތްގަނޑަކަށް ފަސް ފޫތު ހަތް އިންޗި އެވެ. ނަމަވެސް އެއީ ކޮން ޖިންސެއްގެ މީހެއްކަން ހޯދިފައެއް ނުވެ އެވެ.
ފަސް ހާސް އަހަރުވީ އެ ކަށިގަނޑަކީ އިނގިރޭސިވިލާތުގެ ގަދީމީ ސްޓޯންހެންޖް ބިނާ އާއި މިސްރުގެ ޕިރަމިޑްސް އޮފް ގީޒާއަށް ވުރެ ގިނަ ދުވަސްވީ އެއްޗެކެވެ.
ސައިމަން ހަންޓްގެ އުއްމީދަކީ އެ ކަށިގަނޑު ލަންޑަންގެ މިޔުޒިއަމްގައި ރައްކާ ކުރުމެވެ. އެ ތަނުގައި މިހާރު ވެސް ނިއޯލިތިކް ޒަމާނުގައި އުޅުނު މީހެއްގެ ބޯ ކަށިގަނޑުގެ ބަޔެއް ރައްކާކޮށްފައިވެ އެވެ.
ލަންޑަންގެ މިޔުޒިއަމުން ބުނީ އެ ބޯ ކަށިގަނޑަކީ ތޭމްސް ކޯރުން މިހާތަނަށް ފެނުނު އެންމެ ގިނަ ޒަމާންވީ އެތި ކަމަށެވެ. މީގެ ކުރިން ވެސް އެ ކޯރުން މިފަދަ ގިނަ ތަކެތި ފެނިފައިވެ އެވެ.
