އިންޑިއާގެ ގުޖަރާތު ސްޓޭޓުގައި ހިންދޫންގެ ނުރައްކާ ކުރިމަތިވެ، ބައެއް ބައިނަލްއަގްވާމީ ވިޔަފާރިތަކުގެ ފިހާރަތައް ބަންދުކުރަން ޖެހިއްޖެ އެވެ.
ހިންދޫން ރުޅިގަދަވީ ވިޔަފާރިތަކުގެ ޕާކިސްތާން ގޮފިން ކަޝްމީރަށް ތާއީދުކޮށް ސޯޝަލް މީޑިއާގައި ޕޯސްޓު ކުރުމުންނެވެ. އެ ޕޯސްޓުތައް ކުރީ ފެބްރުއަރީ ފަސް ވަނަ ދުވަހު ޕާކިސްތާނުގައި ފާހަގަކުރާ ކަޝްމީރް ސޮލިޑާރިޓީ ޑޭއާ ދިމާކޮށެވެ.
އެއީ ކަޝްމީރުގެ ރައްޔިތުން އިންޑިއާގެ ބާރުގެ ދަށުން ސަލާމަތް ވާން ކުރާ މަސައްކަތް އަގު ވަޒަން ކުރުމުގެ ގޮތުން ފާހަގަކުރާ ދުވަހެކެވެ.
މަލްޓިނެޝަނަލް ކުންފުނިތަކުގެ ޕާކިސްތާން ގޮފިން އެ ދުވަހާ ދިމާކޮށް ސޯޝަލް މީޑިއާގައި ޕޯސްޓު ކުރުމުން ގުޖަރާތުގެ މަގުތަކަށް މުޒާހަރާ ކުރަން ނުކުތީ ހިންދޫ ދީނުގެ ގްރޫޕުތަކުންނެވެ.
އެގޮތުން ބޮޑު ވަޒީރު ނަރެންދްރަ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އާ ގުޅުން އިންނަ ބަޖްރަންގް ދާލް އާއި ވިޝްވާ ހިންދޫ ޕަރިޝާދް ނުވަތަ ވޯލްޑް ހިންދޫ ކައުންސިލްގެ މެމްބަރުން މުޒާހަރާގައި ބައިވެރިވި އެވެ.
އެ މީހުން އެއްވީ ގުޖަރާތުގައި ހުންނަ މަލްޓިނެޝަނަލް ކުންފުނިތަކުގެ ފިހާރަތައް ކައިރިއަށެވެ. ނުރައްކާ ބޮޑުވުމުން ބަންދު ކުރި ތަންތަނުގެ ތެރޭގައި ޕިއްޒާ ހަޓް، ކޭއެފްސީ އަދި ދެކުނު ކޮރެއާގެ ކާރު އުފައްދާ ހަޔުންޑާއި އާއި ކިއާ މޮޓޯޒް ހިމެނެ އެވެ.
ކަޝްމީރް އޮންނަނީ އިންޑިއާ އާއި ޕާކިސްތާނަށް ދެ ފަޅިކޮށްފަ އެވެ. ނަމަވެސް ދެ ގައުމުން ވެސް މުޅި ކަޝްމީރު ބޭނުންވެ އެވެ. ނަމަވެސް ކަޝްމީރުގެ ބައެއް މީހުން ބޭނުން ވަނީ އިންޑިއާއާ ވަކިވެ، ޕާކިސްތާނުގެ ދަށަށް ބަދަލުވާށެވެ.
ހިންދޫ ގްރޫޕްތަކުން ބުނީ ސުލްހަވެރި މުޒާހަރާއަކަށް ނުކުންނަން ޖެހުނީ ކަޝްމީރަކީ އަބަދުވެސް އިންޑިއާގެ ތަނެއްގެ ގޮތުގައި ދެމިއޮންނާނެކަން ކުންފުނިތަކަށް އެންގުމުގެ ގޮތުން ކަމަށެވެ.
ހަޔުންޑާއި، ކިއާ މޮޓޯޒް، ޑޮމިނޯޒް ޕިއްޒާ، ޕިއްޒާ ހަޓް، ކޭއެފްސީ އަދި ޖަޕާނުގެ ސުޒުކީ މޮޓޯ، ހޮންޑާ މޮޓޯ އަދި އިސުޒު މޮޓޯއިން ވަނީ ޕޯސްޓުތަކާ ގުޅިގެން މައާފަށް އެދިފަ އެވެ.
އެ ވިޔަފާރިތައް ބޮއިކޮޓް ކުރަން އިންޑިއާގެ ސޯޝަލް މީޑިއާ ބޭނުން ކުރާ މީހުން ގޮވާލަމުންދާ އިރު، ޕޯސްޓުތަކުގެ މައްސަލައިގައި ޑިޕްލޮމެޓިކް ފިޔަވަޅުތައް ވެސް އިންޑިއާއިން ވަނީ އަޅާފަ އެވެ.
އެގޮތުން މިދިޔަ ހަފްތާގައި އިންޑިއާއިން ވަނީ ދެކުނު ކޮރެއާގެ ސަފީރު ފޮރިން މިނިސްޓްރީއަށް ހާޒިރުކޮށް، އިންޑިއާ ސަރުކާރުގެ ހިތްހަމަނުޖެހުން ފާޅުކޮށްފަ އެވެ.
އަދި ދެކުނު ކޮރެއާގެ ފޮރިން މިނިސްޓަރު ވަނީ އިންޑިއާގެ އެކްސްޓާނަލް އެފެއާޒް މިނިސްޓަރަށް ފޯނުން ގުޅުއްވައި، އެ މައްސަލައާ ގުޅޭ ގޮތުން ވާހަކަދައްކަވާފަ އެވެ.
