ރައްޔިތުންގެ މަޖިލީހުގެ އިދާރީ މުވައްޒަފަކު އުމުރުން 65 އަހަރުވެގެން ރިޓަޔާ ކުރުމަށް ފަހު ވެސް ކޮންޓްރެކްޓް އުސޫލުން ވަޒީފާއަށް އަލުން ނެރެވޭ ގޮތަށް މަޖިލީހުގެ ގަވައިދު ބަދަލުކުރަން އާއްމު ކޮމިޓީން މިއަދު ފާސްކޮށްފި އެވެ.
މަޖިލީހުގެ މުވައްޒަފުންނާ ބެހޭ ގަވައިދަށް ގެންނަން އާއްމުން ކޮމިޓީން މިއަދު ފާސްކުރި އިސްލާހުގައިވާ ގޮތުން ޕާލަމެންޓްރީ މުވައްޒަފަކު ރިޓަޔާ ކުރުމަށް ފަހު ކޮންޓްރެކްޓް އުސޫލުން އަލުން ވަޒީފާ ދެވޭނީ ގިނަވެގެން ތިން އަހަރު ދުވަހުގެ މުއްދަތަކަށެވެ. އެގޮތަށް ވަޒީފާ ދޭނީ ގިނަ ޝަރުތުތަކެއް ހަމަވާ މުވައްޒަފުންނަށް ކަމަށް ވެސް އެ އިސްލާހުގައި ވެ އެވެ.
އާއްމުކޮމިޓީން މިއަދު ފާސްކުރި އިސްލާހުގައިވާ ގޮތުން މުވައްޒަފަކު 65 އަހަރު ވެގެން ރިޓަޔާ ކުރުމަށް ފަހު ކޮންޓްރެކްޓް އުސޫލުން އަލުން ނެގުމުގެ އިހުތިޔާރު އަމީން އާއްމަށް އޮންނާނެ އެވެ. އެގޮތަށް ނެގޭނީ އެ މުވައްޒަފަކީ ރިޓަޔާކުރި އިރު އޭގެ ކުރީގެ ތިން އަހަރުގެ ޕާފޯމެންސް އެޕްރައިޒަލް މާކްސް 75 ޕަސެންޓަށް ވުރެ މަތިން ލިބިފައިވާ މުވައްޒަފަކަށް ވާ ނަމަ އެވެ. އަދި އެއީ މަޖިލީހުގައި އަދާކުރަން ޖެހޭ ވަޒީފާއަށް އެކަށީގެންވާ ކުޅަދާނަކަމާއި ސިއްހަތު ހުރި މީހެއް ކަމަށް ވުމަކީ ވެސް ޝަރުތެކެވެ.
ރިޓަޔާކޮށްފައިވާ މުވައްޒަފަކު ކޮންޓްރެކްޓް އުސޫލުން ނަގާއިރު އެ ކޮންޓްރެކްޓް ހެދޭނީ އެއް އަހަރު ދުވަހުގެ މުއްތަކަށެވެ. އަހަރަކުން އަހަރަކުން އާކުރާ އެ ކޮންޓްރެކްޓް އާ ކުރެވޭނީ ވެސް ތިން އަހަެރު ދުވަހަށް ވުރެ ދިގުނޫން މުއްދަތަކަށް ކަމަށް ވެސް އެ އިސްލާހުގައި ވެ އެވެ. އެ އުސޫލުން ނަގާ މުވައްޒަފަކަށް ދެވޭނީ ރިޓަޔާކުރި އިރު ދެމުން އައި މުސާރައަށް ވުރެ ބޮޑު ނޫން މުސާރައެކެވެ.
އިސްލާހު ފާސްކުރީ އާއްމު ކޮމިޓީގެ މިއަދުގެ ބައްދަލުވުމުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
